Galuega 28:1-31
28 Ina ua matou taunuu saogalemu, ona matou iloa ai lea o le igoa o le motu o Melita.+
2 Na matuā agalelei+ mai iā i matou nei tagata e ese le gagana e tautatala ai, auā ua latou tafu se afi ma talileleia i matou, ona o timuga ma le mālūlū.+
3 Ina ua faaputuputu e Paulo ni fafie ma tuu i le afi, ona o le vevela, ua sau ai se gata feʻai ma pipii i lona lima.
4 Ina ua vāai atu tagata o le nuu* o tautau le gata feʻai i lona lima, ona faapea ane lea o le tasi i le isi: “E mautinoa lava o ia o se fasioti tagata, ma e ui lava ua sao mai o ia mai i le sami, ae e lē ola o ia ona o lona faasalaga lenā.”
5 Ae peitaʻi, ua ia liaʻi ese le meaola taufeʻai i le afi, ma e leʻi afāina o ia.+
6 Ua faatalitali i latou pe e fulafula lona tino pe oti faafuaseʻi. Ua fai sina umi o latou faatalitali, ae vāai atu lava e lē o afāina o ia. Ona suia lea o o latou manatu, ma faapea ane o ia o se atua.+
7 E iai le alii sili i le motu e tuaoi ma lenā nofoaga e igoa iā Popilio, e iai ni ona fanua. Ua ia talileleia i matou ma talimālō mo aso e tolu.
8 Peitaʻi, o loo faataotolia le tamā o Popilio, ona ua maʻi tigāina i le fiva ma le sanatoto. Ona alu atu lea o Paulo, ua tatalo, ma faaee atu ona lima+ iā te ia, ma ua faamālōlōina ai o ia.+
9 Ina ua uma lenā mea, ona ō mai ai lea iā te ia o isi tagata mamaʻi uma o le motu, ina ia faamālōlōina+ i latou.
10 Na latou aumaia foʻi le tele o meaalofa, o ni faaaloaloga iā i matou. A o matou sauni le folauga, ua latou laʻu i le vaa le tele o mea na matou manaʻomia.
11 Ua mavae atu masina e tolu, ona matou folau atu lea i se vaa mai i Alesania,+ lea sa taula i le motu i le tau mālūlū, o loo iai le faailoga o “Atalii o Seu.”
12 Ua matou taula i le taulaga o Surakusa, ma nonofo ai inā mo aso e tolu,
13 ona matou folau atu lea i gatai ane ma taunuu ai i Rekiu. Ina ua mavae le aso e tasi, ona agi mai ai lea o le matagi mai i saute, ma ua matou taunuu ai i Puteoli i le aso lona lua.
14 Ua matou maua uso i inā ma latou ʻaiʻoi mai ina ia matou nonofo mo ni aso se fitu; ma o le auala lenā ua matou ui atu ai i Roma.
15 Ina ua logotala uso i inā iā i matou, ona latou ō mai ai lea e faafetaui i matou i le Maketi o Apio ma Faletalimālō e Tolu. Ina ua iloa atu i latou, ona faafetai ai lea o Paulo i le Atua ma ua lototele ai.+
16 Ina ua matou taunuu i Roma, ona faataga+ lea o Paulo e nofo na o ia, e leoleoina e se fitafita.
17 Ae ina ua mavae aso e tolu, ona ia talosagaina lea o alii sili o Iutaia ina ia faapotopoto ane. Ina ua latou ō ane, ona ia fai atu lea iā i latou: “Alii e, ma uso e, e ui lava ou te leʻi faia se mea sesē i tagata pe solia aganuu a o tatou augātamā,+ ae na auina atu aʻu o se pagota mai i Ierusalema i lima o tagata Roma.+
18 Ona latou suʻesuʻeina+ lea o aʻu, ma mananaʻo ai e faasaʻoloto aʻu,+ auā e leai se mea na ou faia e tatau i ai le oti.+
19 Peitaʻi, ina ua tetee mai pea tagata Iutaia i le faasaʻolotoina o aʻu, ona avatu lea o laʻu tagi+ iā Kaisara, ae e lē faapea ua iai se mea ou te tuuaʻia ai loʻu nuu.
20 O le mea lea na ou talosaga atu ai ina ia tatou feiloaʻi ma talanoa atu iā te outou, auā ua saisaitia aʻu+ i lenei filifili ona o le faamoemoe+ o Isaraelu.”
21 Ua latou faapea mai iā te ia: “Matou te leʻi mauaina ni tusi mai i Iutaia e uiga iā te oe, e leai foʻi se tasi o le ʻauuso na sau, ua fai se tala leaga e uiga iā te oe.
22 A ua matou manatu, e lelei ona faalogo atu pea iā te oe i sou manatu, auā ua iloa e i matou ua salalau solo tala lē lelei e faatatau+ i lenei lotu.”+
23 Ona latou fuafuaina lea o se aso mo ia, ma ua ō mai le toʻatele o i latou iā te ia i le mea o loo nofo ai. Ua ia faamatala atu le mataupu iā i latou, e ala i le avatu o se molimau māeʻaeʻa e faatatau i le malo o le Atua,+ ma faia faamatalaga e faatalitonu ai i latou iā Iesu, mai i le tulafono a Mose+ ma le ʻau Perofeta,+ na amata mai i le taeao seʻia oo i le pō.
24 Ona talitonu+ lea o nisi tagata, ae e leʻi talitonu isi tagata.+
25 O le mea lea, talu ai o loo feeseeseaʻi i latou, ona latou ō eseese ai lea a o faia le faamatalaga lenei a Paulo:
“E moni le mea na taʻu atu e le agaga paia e ala iā Isaia le perofeta i o outou augātamā,
26 e faapea: ‘Inā alu atu ia i nei tagata ma fai atu i ai: “E tou te faalogo ae e lē malamalama, ma e tou te vaavaai ae e lē iloa.+
27 Auā ua maaa loto o nei tagata, ua faalogo o latou taliga ae e lē tali mai, ma ua moeiini o latou mata; ina ia aua neʻi o latou iloa se mea i o latou mata, ma faalogo o latou taliga ma malamalama o latou loto ma liliu mai, ma ou faamālōlōina i latou.”’+
28 O lea la, ia outou iloa lenei mea, ua auina atu i nuu ese+ le tala i le auala e aumaia ai e le Atua le faaolataga; e faalogo foʻi i latou i ai.”+
29 * ——
30 Ona nofo lea o ia mo le lua tausaga i lona fale mautotogi,+ ma ia talileleia i latou uma ua ō mai iā te ia,
31 ua talaʻi atu le malo o le Atua iā i latou, ma aʻoaʻo atu mea e faatatau i le Alii o Iesu Keriso ma saʻoloto e tautala+ atu, e leʻi vaoia lava.
Faamatalaga Pito i Lalo
^ Po o tagata o le nuu o ē tautatala i se isi gagana.
^ O lenei fuaiupu o loo maua i nisi faaliliuga o le Tusi Paia, peitaʻi e lē o maua i isi manusikulipi Eleni anamua.
