Galuega 3:1-26
3 Ua ō aʻe Peteru ma Ioane i le malumalu i le itula e fai ai tatalo, o le itula lea e iva,*+
2 ma ua sii atu se tamāloa na fanau+ mai o pipili, ua latou tuu o ia i aso uma i tafatafa o le faitotoʻa o le malumalu ua taʻua o le Matagofie.+ E masani ona ia ʻaisi atu iā i latou o ē ō atu i le malumalu+ mo ni meaalofa.
3 Ina ua ia iloa atu Peteru ma Ioane o le a ulu i le malumalu, ona ia talosaga atu lea iā i laʻua mo ni meaalofa.+
4 Ua pulatoʻa+ atu Peteru ma Ioane iā te ia ma faapea atu: “Ia vaai mai iā i maʻua.”
5 Ona taulaʻi atu lea o lana vaai iā i laʻua, ma le manatu e maua mai ai se mea mai iā i laʻua.
6 A ua fai atu Peteru: “E leai saʻu siliva po o se auro, ae ou te avatu iā te oe+ le mea lea ua iā te aʻu: I le suafa o Iesu Keriso le Nasareta,+ inā savali ia!”+
7 Ona tago atu lea o ia i le lima taumatau+ o le tamāloa ma faatū i luga. Ona malolosi+ ai lea o ona alofivae ma ona tapuvae;
8 ua oso+ o ia i luga ma tū, ma amata ona savali, ona ulufale atu lea o ia ma i laʻua i le malumalu,+ ua savali ma oso ma vivii i le Atua.
9 Ua iloa atu foʻi e tagata+ uma o ia ua savali ma vivii i le Atua.
10 Ua latou iloa foʻi, o le tagata lenei e masani ona nofo i le Faitotoʻa Matagofie+ o le malumalu, ma ʻaisi mo ni meaalofa. Ona matuā ofo ai lea o i latou ma ua matuā fiafia+ lava i le mea ua tupu iā te ia.
11 O lea, a o pipii atu le tamāloa iā Peteru ma Ioane, ona taufetuli faatasi atu lea o tagata uma iā i latou i le mea ua taʻua o le faapaologa+ o Solomona, ua matuā ofo i latou.
12 Ina ua vaai atu Peteru i lenei mea, ona ia faapea atu lea i tagata: “Tagata o Isaraelu e, aiseā ua outou ofo ai i lenei mea? Aiseā foʻi ua outou pulatoʻa mai ai iā i maʻua, e peiseaʻī o so maʻua mana, po o lo maʻua faamaoni i le Atua ua mafai ai ona savali o ia?+
13 O le Atua o Aperaamo, Isaako ma Iakopo,+ o le Atua o o tatou augātamā, ua ia faamamaluina+ lana Auauna+ o Iesu, o lē na outou tuuina atu+ ma faafitia o ia i luma o Pilato, a o loto e faasaʻoloto iā te ia.+
14 Ioe, na outou faafitia lē e paia ma amiotonu,+ ma na outou talosaga mai e tatala atu iā te outou sē e fasioti tagata,+
15 ae na outou fasiotia le Sui Sili o le ola.+ O lea ua toe faatūina o ia e le Atua mai i le oti, ua avea i maʻua ma molimau+ i lenei mea.
16 Ona o lona suafa ma lo ma faatuatua i lona suafa, ua malosi ai lenei tagata, o lē ua outou vāai i ai ma iloa, o le faatuatua foʻi iā te ia ua malosi lelei ai lona tino i la outou vaai.
17 O lenei le ʻauuso e, ua ou iloa na outou faia lenei mea ma le lē iloa+ e pei foʻi o o outou taʻitaʻi.+
18 Ae peitaʻi, o le auala lenei ua faataunuu ai e le Atua mea na ia muaʻi folafolaina mai, e ala i fofoga o perofeta uma e faapea, o le a faapuapuagatiaina+ lana Keriso.
19 “O le mea lea, inā salamō+ ia ma liliu,+ ina ia soloiesea+ a outou agasala, ma ia oo mai ai le taimi e toe faafouina+ ai mai iā Ieova lava ia
20 ma ia auina mai e ia le Keriso, ua tofia mo outou, o Iesu lea
21 o lē e tatau ona iai pea i le lagi,+ seʻia oo i le taimi e toefuataʻi+ ai mea uma, na fetalai mai ai le Atua i fofoga o ana perofeta paia+ i aso ua mavae.
22 O le mea moni, ua fai mai Mose, ‘E tofia e Ieova le Atua mo outou o se perofeta e pei o aʻu+ mai i o outou uso. E tatau ona outou faalogo iā te ia e tusa ma mea uma ua fai atu ai o ia iā te outou.+
23 O le mea moni, o sē e lē faalogo i lenā Perofeta, e matuā faaumatia o ia mai i tagata.’+
24 O perofeta uma e amata mai iā Samuelu ma ē na sosoo mai ai, o ē na faia valoaga, na matuā taʻutino mai foʻi e uiga i nei aso.+
25 O outou o atalii+ o perofeta ma le feagaiga lea na osia e le Atua ma o outou augātamā, ma faapea atu iā Aperaamo, ‘O lau fanau e manuia+ ai aiga uma o le lalolagi.’
26 Ina ua tofia e le Atua lana Auauna, na ia auina atu muamua+ o ia iā te outou, e faamanuia atu iā te outou, e ala i le faaliliuese o outou taʻitoʻatasi mai i a outou amioga leaga.”
Faamatalaga Pito i Lalo
^ Pe tusa o le tā o le 3 i le aoauli e amata mai i le oso aʻe o le lā.
