Galuega 4:1-37
4 A o la talanoa atu i tagata, a ua ō mai loa iā i laʻua o le ʻaufaitaulaga sili, o le taʻitaʻiʻau o le malumalu,+ ma le ʻau Satukaio,+
2 ua feita i latou ona ua la aʻoaʻo atu i tagata, ma faailoa manino atu le toetutū mai o ē ua oti, i le taʻua o le toetū o Iesu;+
3 ua latou puʻe iā i laʻua ma tuu i le falepuipui seʻia oo i le isi aso,+ auā ua leva le afiafi.
4 Ae peitaʻi, ua talitonu+ le toʻatele o i latou na faalogo i le lauga, ma o le aofaʻiga o tane e tusa ma le lima afe.+
5 I le aso na sosoo ai, ua faapotopoto faatasi ai i Ierusalema o latou taʻitaʻi, o toeaina, ma le ʻautusiupu,+
6 (atoa foʻi ma Ana+ le faitaulaga sili, o Kaiafa+ ma Ioane, o Alesana ma le toʻatele o le ʻauaiga o le faitaulaga sili),
7 ua latou faatutū iā i laʻua i o latou luma ma fesili atu: “O le ā le mana, ma o le igoa o ai ua oulua faia ai lenei mea?”+
8 Ona faapea atu lea o Peteru o lē ua tumu i le agaga paia+ iā i latou:
“Taʻitaʻi e, o le nuu ma toeaina,
9 afai ua suʻesuʻeina i maʻua i le asō ona o le mea lelei ua faia i le tagata maʻi,+ ma e faatatau i lē ua mafai ai ona malosi lenei tagata,
10 ia iloa e outou faapea foʻi ma tagata uma o Isaraelu, o le suafa o Iesu Keriso le Nasareta,+ o lē na outou tutuʻia i luga o le laau+ a ua toe faatūina e le Atua mai i le oti,+ o ia lea ua malosi ai lenei tagata ua tū atu i o outou luma.
11 O le ‘maa lenei na faalēaogā e outou tufuga, a ua avea ma maa tulimanu sili.’+
12 E leai foʻi se isi e mafai ona maua ai le faaolataga, auā e leai se isi igoa+ i lalo o le lagi ua tuuina mai e le Atua i tagata, e tatau ona faaolaina ai i tatou.”+
13 O lea, ina ua vāai i latou i le lototetele o Peteru ma Ioane e tautatala atu, ma ua iloa ai o i laʻua o ni tagata e leʻi lava ni aʻoaʻoga ma e faatauvaa,+ ona latou taufaiofo ai lea. Ua latou iloa foʻi sa masani ona faatasi i laʻua ma Iesu,+
14 ma a o vāai atu i latou i le tamāloa na faamālōlōina o loo tutū faatasi ma i laʻua,+ e leʻi toe fai atu sa latou upu.+
15 Ona latou faatonu lea o i laʻua, ina ia ō i fafo mai i le potu o le Faamasinoga Sili, ma ua latou talatalanoa
16 e faapea: “O le ā sa tatou mea o le a fai i nei tagata?+ Auā o le mea moni, ua faia e i laʻua se faailoga mataʻina lea ua iloa e tagata uma i Ierusalema;+ e lē mafai foʻi ona tatou faafitia.
17 Ae ina neʻi atili salalau atu i tagata lenei tala, seʻi o tatou faafefe iā i laʻua, ua sā ona toe tautala atu i se tagata i lenā igoa.”+
18 Mulimuli ane, ona latou aami lea o i laʻua ma fai atu i ai, ua matuā sā lava ona toe taʻua pe aʻoaʻo atu i le igoa o Iesu.
19 A ua tali atu Peteru ma Ioane iā i latou: “Pe e tonu i le silafaga a le Atua ona ma faalogo iā te outou nai lo o le Atua, ia pule outou.
20 A o i maʻua, e lē mafai ona ma lē taʻu atu mea ua ma vāai ma faalogo i ai.”+
21 Ua atili ai ona latou faafefe iā i laʻua, ona latou tatala lea o i laʻua, auā latou te leʻi maua se mea e faasala ai i laʻua. Ua faia foʻi faapea ona o tagata,+ auā ua latou faamamaluina uma le Atua ona o le mea ua tupu;
22 talu ai o le tamāloa lea na faia i ai lenei faailoga o le faamālōlōga, e sili atu i le fā sefulu tausaga lona matua.
23 Ina ua uma ona tatala i laʻua, ona la ō atu lea i le ʻauuso,+ ma faamatala atu mea na fai atu ai le ʻaufaitaulaga sili ma toeaina iā i laʻua.
24 Ua faalogo i latou i lenei mea, ona tatalo atu lea i le Atua+ ma le lotogatasi ma faapea atu:
“Le Alii Pule Silisili Ese e,+ o Oe na e faia le lagi ma le lalolagi, o le sami ma mea uma o iai,+
25 ma o lē na fetalai mai e ala i le agaga paia i le fofoga o lo matou augātamā o Tavita+ lau auauna, ‘Aiseā ua vevesi ai atunuu ma mafaufau ai tagata i mea e lē aogā?+
26 Ua tutū faatasi tupu o le lalolagi ma ua taupulepule faatasi taʻitaʻi e faasagatau iā Ieova ma lē na ia faauuina.’+
27 O lea foʻi, na faapotopoto faatasi ai Herota ma Ponotio Pilato+ ma tagata o atunuu, faapea tagata Isaraelu i lenei aai, e faasagatau i lau auauna paia+ o Iesu o lē ua e faauuina,+
28 ina ia faia mea na muaʻi tofia e lou mana* ma lou finagalo ia oo mai.+
29 O lenei, Ieova e, ia e silasila mai i la latou faamataʻu,+ ma ia tuuina mai i au pologa le malosi e tautatala atu ai pea i lau afioga ma le lototetele,+
30 a o e faaloaloa mai lou aao e faamālōlō ai ma a o tutupu faailoga ma mea ofoofogia,+ e ala i le suafa+ o lau auauna paia+ o Iesu.”
31 Ina ua uma la latou tatalo, ona lūlūina+ lea o le mea o loo latou faapotopoto faatasi ai; ua faatutumuina foʻi i latou uma i le agaga paia,+ ma ua taʻutaʻu atu le afioga paia a le Atua ma le lototetele.+
32 Ua tasi lava le loto ma le manatu+ o le motu o tagata e toʻatele o ē ua talitonu, ma e leai se tasi ua faapea mai, o mea ua iā te ia, o ana lava mea; a ua tuufaatasi a latou mea uma.+
33 O le tele o le mana, ua faaauau ai foʻi e le ʻauaposetolo ona talaʻi atu e uiga i le toetū o le Alii o Iesu;+ ma ua faamanuiaina i latou uma i le tele o le agalelei faifua.
34 O le mea moni, e leai se tasi o i latou ua mativa i se mea,+ auā o i latou ua iai fanua po o fale, ua latou faatau atu ma aumai le tau o ia mea na faatau atu,
35 ma ua latou tuu atu i luma o le ʻauaposetolo.+ Ona tufatufaina+ lea i tagata taʻitoʻatasi e tusa ai ma le mea e manaʻomia e ia.
36 O lea la, o Iosefa lea na faaigoa e le ʻauaposetolo iā Panapa,+ o lona uiga pe a faaliliuina, o le Atalii o Faamāfanafanaga, o se sa Levī, ma e sau mai i Kuperu,
37 sa iai lona fasi fanua na faatau atu, ona aumai lea o le tupe ma tuu atu i luma o le ʻauaposetolo.+
Faamatalaga Pito i Lalo
^ Po o “lou aao.”
