Galuega 8:1-40
8 Ua ioe foʻi Saulo i le fasiotiga o ia.+
I lea aso, ua oo ai sauāga+ e tele i le faapotopotoga i Ierusalema; ua faataapeapeina+ ai foʻi i latou uma i vaipanoa o Iutaia ma Samaria seʻi vaganā ai le ʻauaposetolo.
2 A ua ave e tagata matataʻu i le Atua Setefano ma tanu,+ ma ua matuā fetagisi+ foʻi ona o ia.
3 Peitaʻi, ua soona sauā Saulo i le faapotopotoga, ua osofaʻi atu i lea fale ma lea fale, ma fetoso mai tane ma fafine, ua ia tuuina atu i latou i le falepuipui.+
4 Ona ō solo ai lea o i latou ua faataapeapeina i le nuu, ma folafola atu le tala lelei o le afioga a le Atua.+
5 O le tasi o Filipo, ua alu ifo i le aai o Samaria,+ ma talaʻi atu le Keriso iā i latou.
6 Ua uaʻi atu le motu o tagata ma le lotogatasi i mea ua fai mai ai Filipo a o latou faalogologo atu, ma vāai i faailoga ua ia faia.
7 Auā e toʻatele foʻi ua iai agaga leaga,+ ma ua alalaga leotetele ma ō mai i fafo mai iā i latou. E toʻatele foʻi tagata ua pepē tino+ ma pipili, ua faamālōlōina.
8 Ona matuā olioli ai lea o tagata o lenā aai.+
9 Ua iai i le aai se tasi tagata e igoa iā Simona, o lē na faia muamua faiga faaagaga,+ ma matuā ofo ai le nuu o Samaria, ma ua ia faapea e sili lava o ia.+
10 O i latou uma lava, e amata mai i tagata faatauvaa e oo i ē e aloaʻia, e uaʻi atu iā te ia ma faapea atu: “O le Mana o le Atua lenei tagata, lea e taʻua e Sili.”
11 Ua latou uaʻi atu foʻi iā te ia auā ua leva ona ia faia faiga faaagaga e ofo ai i latou.
12 Ae ina ua latou talitonu iā Filipo, o lē ua folafola atu le tala lelei o le malo o le Atua,+ ma le suafa o Iesu Keriso, ona papatisoina lea o i latou o tane ma fafine.+
13 Ua talitonu foʻi Simona ma papatisoina o ia, ua ia aufaatasi pea ma Filipo,+ ua maofa foʻi o ia ina ua vaai atu i faailoga ma galuega mamana ua faia.
14 Ina ua faalogo aposetolo i Ierusalema ua talia e tagata Samaria le afioga a le Atua,+ ona latou aauina atu lea o Peteru ma Ioane iā i latou;
15 ua ō ifo i laʻua ma tatalo ina ia maua e i latou le agaga paia.+
16 Auā e leʻi liligi ifo i se tasi o i latou le agaga paia, ae ua na o le suafa o le Alii o Iesu+ ua papatisoina ai i latou.
17 Ona faaee atu lea o o la lima iā i latou,+ ma latou maua ai le agaga paia.
18 Ina ua iloa e Simona e maua le agaga paia e ala i le faaee o lima o aposetolo, ona ia ofo atu lea o tupe+ iā i laʻua,
19 ua faapea mai: “Ia aumai foʻi iā te aʻu lenā pule, ina ia maua ai e se tasi e faaee i ai oʻu lima le agaga paia.”
20 A ua fai atu Peteru iā te ia: “Ia fano au siliva faatasi ma oe, auā ua e manatu e mafai ona e maua le meaalofa foaʻifua a le Atua+ i tupe.
21 E leai sau vaega po o sou tofi i lenei mea, auā e lē tonu lou loto i le silafaga a le Atua.+
22 O lea la, inā salamō ia i lou leaga, ma ia faatoga atu iā Ieova,+ pe afai e mafai, ia faamagalo oe ona o manatunatuga leaga o lou loto.
23 Auā ua ou iloa, o oe o le mea oona+ ma ua tumu i le amiolētonu.+
24 Ua tali mai Simona: “Ia oulua faatoga atu iā Ieova mo aʻu,+ ina ia aua neʻi oo mai iā te aʻu se mea, o mea ua oulua fai mai ai.”
25 O lea, ina ua la molimau māeʻaeʻa atu ma tautatala i le afioga a Ieova, a o la toe foʻi atu i Ierusalema, na la folafola atu ai le tala lelei i le tele o nuu o Samaria.+
26 Ae peitaʻi, ua taʻu atu e se agelu+ a Ieova iā Filipo e faapea: “Inā tulaʻi ia ma alu atu i saute i le auala e ui mai Ierusalema e oo atu i Kasa.” (O se auala i le toafa.)
27 Ona tulaʻi lea o ia ma alu, seʻi faauta! ua iai le eunuka+ Aitiope,+ o se tagata maualuga i le pulega a Kanake, le tupu tamaʻitaʻi o Aitiope, ma e vaaia e ia ana oloa uma. Sa alu atu o ia i Ierusalema e tapuaʻi,+
28 a ua toe foʻi o ia ma o loo nofo i lana kariota ma faitau leotele le tusi a le perofeta o Isaia.+
29 O lea, ua fai atu+ ai le agaga iā Filipo: “Ia e faalatalata atu i lenā kariota.”
30 Ua tamoʻe atu Filipo i tafatafa o le kariota, ma faalogo atu o loo ia faitauina le tusi a le perofeta o Isaia, ona ia faapea atu lea: “Po ua e malamalama i mea ua e faitauina?”
31 Ua fai mai o ia: “E faapefea ona ou malamalama pe a lē faasino mai e se tasi iā te aʻu?” Ona ia ʻaiʻoi atu lea iā Filipo, ina ia oso atu i luga la te nonofo faatasi.
32 Ua taʻua i le mau mai i Tusitusiga Paia ua ia faitauina e faapea: “E pei o le mamoe ua taʻitaʻi atu e fasia, ma e pei o le tamaʻi mamoe i luma o ē e sele ona fulufulu, e lē tagi, e lē tautala o ia.+
33 Ua aveesea le faamasinogatonu i le taimi na faalumaina ai o ia.+ O ai na te taʻu atu faamatalaga uma e uiga i lona tupuaga? Auā ua aveesea lona ola mai i le lalolagi.”+
34 Ua tali mai le eunuka iā Filipo: “Ou te fesili atu iā te oe, po o ai lea e talanoa i ai le perofeta? Pe e faatatau iā te ia po o se isi tagata?”
35 Ona tautala+ atu lea o Filipo, e amata i lenei mau mai i Tusitusiga Paia,+ ua ia folafola atu iā te ia le tala lelei e uiga iā Iesu.
36 A o la ō i le auala, ona la tau atu lea i le vai ma ua faapea mai le eunuka: “Faauta! O le vai, o le ā se mea e taofia ai aʻu mai i le papatisoina?”+
37 * ——
38 Ona ia fai atu lea e taofi le kariota, ona la ō ifo uma lea i le vai, o Filipo ma le eunuka; ona ia papatisoina lea o ia.
39 Ina ua la ō aʻe mai i le vai, ona taʻitaʻi ese loa+ lea o Filipo e le agaga o Ieova, ma ua lē toe vaai le eunuka iā te ia, a ua alu o ia ma le olioli tele.
40 Peitaʻi, na iloa Filipo i Asetota, ua alu atu o ia i lenā vaipanoa, ma folafola+ atu pea le tala lelei i aai uma lava, seʻia oo ina taunuu o ia i Kaisareia.+
Faamatalaga Pito i Lalo
^ O lenei fuaiupu o loo maua i nisi faaliliuga o le Tusi Paia, peitaʻi e lē o maua i isi manusikulipi Eleni anamua.
