Galuega 9:1-43
9 A ua faamataʻu atu pea Saulo i soo+ o le Alii ma matuā naunau e fasiotia+ i latou, ua alu atu o ia i le ositaulaga sili,
2 ma talosaga atu mo ni tusi e avatu i sunako i Tamaseko, ina ia saisaia e ia i latou uma o tane ma fafine e maua ua ʻau i Le Ala,*+ ma avatu i latou i Ierusalema.
3 A o malaga atu o ia ua latalata i Tamaseko, ona faafuaseʻi lea ona suluia faataaliʻoliʻo o ia+ i le malamalama mai i le lagi,
4 ua paʻū o ia i le eleele ma faalogoina se leo o faapea mai iā te ia: “Saulo, Saulo e, aiseā ua e faasauā mai ai iā te aʻu?”+
5 Ua fai atu o ia: “O ai ea oe le Alii e?” Ua ia faapea mai: “O aʻu o Iesu o lē ua e faasauā i ai.+
6 E ui i lea, tū ia i luga+ ma alu atu i le aai, o le a faamatala atu ai iā te oe le mea e tatau ona e faia.”
7 Ua tutū tagata o loo malaga faatasi ma ia,+ ua lē magagana+ ina ua faalogo i le leo,+ ae e leʻi vāai atu i se tagata.
8 A ua tū i luga Saulo, e ui ina pupula ona mata a ua lē iloa e ia se mea.+ Ona latou uu lea i ona lima ma taʻitaʻi atu o ia i Tamaseko.
9 E tolu aso e na te leʻi iloa ai se mea,+ e leʻi ʻai foʻi pe inu.
10 E iai se tasi soo e igoa iā Anania+ i Tamaseko, ma ua fetalai mai le Alii iā te ia i se faaaliga: “Anania e!” Ua ia faapea atu: “O aʻu lenei le Alii e.”
11 Ua faapea mai le Alii iā te ia: “Inā tū ia i luga ma alu i le auala e igoa o Saʻo,+ i le fale o Iuta ma saʻili ai le tagata e igoa iā Saulo mai i Taso. Faauta! o loo tatalo o ia
12 ma ua ia vaaia i se faaaliga le tagata e igoa iā Anania, ua sau ma faaee ona lima iā te ia ina ia toe lelei ai lana vaai.”+
13 A ua tali atu Anania: “Le Alii e, ua ou faalogo i le toʻatele e uiga i lenā tagata, i le tele o mea leaga ua ia faia i ou tagata paia i Ierusalema.
14 Ua iā te ia le pule mai i le ʻaufaitaulaga sili e saisaia ai i latou ua valaau i lou suafa.”+
15 A ua fetalai mai le Alii iā te ia: “Inā alu ia oe, auā o lenei tagata o le ipu ia ua filifilia+ mo aʻu, e talaʻi atu loʻu igoa i nuu ese+ faapea foʻi ma tupu,+ ma le fanauga a Isaraelu.
16 Ou te faailoa manino atu foʻi iā te ia le tele o mea e tatau ona ia mafatia ai ona o loʻu igoa.”+
17 Ona alu lea o Anania ma ulufale atu i le fale, ma faaee ona lima iā te ia ma faapea atu: “Loʻu uso e, Saulo, ua auina mai aʻu e le Alii o Iesu, lea na faaali atu iā te oe i le auala na e sau ai, ina ia e toe vaai ma faatumuina oe i le agaga paia.”+
18 Ona paʻuʻū ese loa lea o mea e pei o ni una mai i ona mata, ma ua ia toe vaai ai. Ua ia tulaʻi ma ua papatisoina o ia,
19 ua ʻai ma ua toe maua lona malosi.+
Ua nofo foʻi o ia faatasi ma le ʻausoo i Tamaseko+ mo ni nai aso,
20 ona amata loa lea ona ia talaʻia Iesu+ i le sunako e faapea, o Ia lenei o le Alo o le Atua.
21 A ua matuā maofa i latou uma ua faalogo iā te ia, ma faapea ane: “Pe e lē o le tagata ea lenei na soona faasauā+ iā i latou na valaau i lenā suafa i Ierusalema, ma o le mea foʻi lea ua sau ai o ia i inei, ina ia saisaia i latou ma taʻitaʻi atu i le ʻaufaitaulaga sili?”+
22 Ua atili ai ona malosi Saulo, ma ua maofa tagata Iutaia o loo nonofo i Tamaseko, a o ia faailoa manino atu iā i latou, o le Keriso+ lava lenei.
23 Ua mavae aso e tele, ona taupulepule ai lea o tagata Iutaia e fasioti iā te ia.+
24 Ae peitaʻi, ua iloa e Saulo la latou faufauga. Ua latou lamalama foʻi i faitotoʻa i le ao ma le pō ina ia fasiotia o ia.+
25 Ona ave lea o ia e ona soo ma tuutuu ifo iā te ia i le pō i se ato+ mai i se faamalama i le pā o le aai.
26 Ina ua taunuu i Ierusalema,+ ona ia taumafai lea e aufaatasi atu i soo, peitaʻi ua latou fefefe uma iā te ia, auā latou te leʻi talitonu o ia o se soo.
27 O lea, ua fesoasoani+ atu ai Panapa iā te ia ma avatu i aposetolo, ua faamatala atu foʻi e Panapa iā i latou mea uma e faapea, na vaaia e ia le Alii+ i le auala, ma na ia fetalai atu iā te ia,+ faapea ma lona molimau atu ma le lototele i le suafa o Iesu i Tamaseko.+
28 Ua ia faatasi pea ma i latou, ma faaauau ona ia faia mea masani o le olaga i Ierusalema, ma talaʻi atu ma le lototele le suafa o le Alii,+
29 ua talanoa atu foʻi o ia ma fefinauaʻi ma tagata Iutaia e tautatala i le gagana Eleni. A ua taumafai foʻi i latou nei e fasioti iā te ia.+
30 Ina ua iloa e le ʻauuso lenei mea, ona latou ave lea o ia i Kaisareia ma auina atu i Taso.+
31 O le mea moni, ua nonofo filemu le faapotopotoga+ i Iutaia atoa ma Kalilaia ma Samaria, ua faamalosia foʻi i latou; ua faatoʻateleina pea i latou ona o le faamāfanafana mai o le agaga paia,+ a o savavali i le mataʻu iā Ieova.+
32 A o malaga atu Peteru i vaega uma o le nuu, ona alu ifo ai lea o ia i le ʻaupaia o loo nonofo i Lita.+
33 Ua ia iloa ai i inā se tasi tagata e igoa iā Ainea, o lē ua valu tausaga o taoto i lona moega auā ua pē lona tino.
34 Ua fai atu Peteru iā te ia:+ “Ainea e, ua faamālōlōina+ oe e Iesu Keriso. Inā tū ia i luga ma teu lou moega.” Ona ia tū loa lea i luga.
35 Ua vāai iā te ia i latou uma o loo nonofo i Lita, ma le fanua laugatasi o Sarona,+ ma ua liliu ai i latou i le Alii.+
36 E iai se tasi soo fafine i Iopa+ e igoa iā Tapita, o lona uiga pe a faaliliuina, o Toreka. Ua ia faia le tele o galuega lelei+ ma foaʻi atu meaalofa.
37 I na aso, ua maʻi o ia ma ua oti ai. Ona latou faatāʻele lea o ia ma faataoto i le potu i luga.
38 Talu ai e felataʻi Lita ma Iopa,+ ma ina ua faalogo soo o loo iai Peteru i lenā aai, ona latou aauina atu lea o ni tamāloloa se toʻalua ina ia ʻaiʻoi atu iā te ia: “Faamolemole, ia e vave sau iā i matou.”
39 Ona tulaʻi lea o Peteru ua ō faatasi ma i laʻua. Ina ua taunuu atu, ona latou ave lea o ia i le potu i luga. Ua faaali mai foʻi e fafine uma ua oti a latou tane o loo fetagisi, le tele o ofu tetele ma isi ofu+ sa faia e Toreka, a o iai o ia ma i latou.+
40 Ua tuu atu e Peteru tagata uma i fafo,+ a ua tootuli ma tatalo ma liliu atu i le tino ma faapea atu: “Tapita e, inā tulaʻi ia!” Ua pupula ona mata ma ina ua vaai atu iā Peteru, ona nofo lea o ia i luga.+
41 Ua tago atu o ia i lona lima ma faatū iā te ia i luga,+ ona valaau atu lea i le ʻaupaia ma fafine ua oti a latou tane, ma tuu atu o ia iā i latou, ua ola.+
42 Ua lauiloa lenei mea i Iopa uma, ma ua talitonu ai le toʻatele i le Alii.+
43 Ua nofo ai pea o ia i Iopa+ mo ni nai aso, faatasi ma le tasi tagata e igoa iā Simona o lē e galue e saunia paʻu o manu.+
Faamatalaga Pito i Lalo
^ E faasino atu i le olaga ma aʻoaʻoga faa-Kerisiano.
