Hosea 1:1-11
1 O le afioga a Ieova+ na oo mai iā Hosea,+ le atalii o Peeri i aso+ o Usia,+ o Iotama,+ o Aasa+ ma Esekia,+ o tupu o Iuta, ma i aso foʻi o Ierepoamo+ le atalii o Ioasa+ le tupu o Isaraelu.
2 Ua amata ona folafola atu e Ieova ana afioga e ala iā Hosea, ma ua fetalai mai Ieova iā Hosea: “Inā alu ia+ ma e fai avā i le fafine faitaaga ma o le a iai sau fanau ona o lana faitaaga, talu ai o le faitaaga ua liliuese ai le nuu mai iā Ieova.”+
3 Ona alu lea o ia ma faaipoipo iā Komeri le afafine o Tipelaima, ma ua tō o ia ma fanau mai ai sona atalii.+
4 Ua toe fetalai mai Ieova iā Hosea: “Ia faaigoa o ia iā Isereelu,+ auā ua toeitiiti ona ou taui atu lea i le aiga o Ieu+ ona o le totomasaa o Isereelu,* ma ou te faamutaina le pulega tautupu a le aiga o Isaraelu.+
5 I lenā aso, ou te gausia ai le ʻaufana+ a Isaraelu i le fanua laugatasi o Isereelu.”
6 Ua toe tō Komeri ma fanau mai ai se tama teine. Ona fetalai mai lea o le Atua iā Hosea: “Ia faaigoa o ia iā Loruama,*+ auā ou te lē toe alofa mutimutivale+ i le aiga o Isaraelu, ma ou te matuā aveesea i latou.+
7 Ae ou te alofa mutimutivale+ i le aiga o Iuta, o le a ou laveaʻiina i latou, o aʻu o Ieova lo latou Atua;+ ae ou te lē faaolaina i latou i se ʻaufana, po o se pelu, po o se taua, po o solofanua po o tagata tiʻetiʻe solofanua.”+
8 Ua faateʻa mālie e ia Loruama ma le susu, ma ua toe tō o ia ma fanau mai ai se tama tama.
9 Ona Ia fetalai mai lea: “Ia faaigoa o ia iā Loama,* auā e lē o outou o loʻu nuu, ma e lē o so outou Atua foʻi aʻu.
10 “O le faitau aofaʻi o le fanauga a Isaraelu o le a pei o le oneone o le sami e lē mafai ona fuatia pe faitauina.+ O le mea ua masani ona faapea atu ai iā i latou, ‘E lē o soʻu nuu outou,’+ ae o le a faapea atu iā i latou, ‘O atalii o le Atua soifua outou.’+
11 O le a faapotopoto faatasi le fanauga a Iuta ma le fanauga a Isaraelu i le autasi, ma o le a latou tofia se taʻitaʻi e toʻatasi,+ ma ō ese mai i le atunuu,+ auā o se aso tāua tele lea iā Isereelu.*+
Faamatalaga Pito i Lalo
^ O le aai lea sa nonofo ai tupu o Isaraelu i mātū, e ui o Samaria lo latou laumua. Tagaʻi i le 1Tu 21:1.
^ O lona uiga, “e leʻi faaalia iā te ia le alofa mutimutivale.”
^ O lona uiga, “e lē o soʻu nuu.”
^ O lona uiga, “O le a totōina e le Atua fatu.”
