Hosea 11:1-12
11 “A o tamaitiiti Isaraelu, na ou alofa iā te ia,+ ma na ou valaauina loʻu atalii mai i Aikupito.+
2 “O le tele o le valaau o tagata iā Isaraelu,+ o le tele foʻi lenā o le ō ese o i latou mai iā i latou.+ Ua latou faia taulaga i tupua o Paala,+ ma ua latou faamū foʻi taulaga i tupua ua tā.+
3 A o aʻu, na ou aʻoaʻoina Efaraima ina ia iloa savali,+ ma sii i latou i oʻu lima;+ ma e latou te leʻi iloa o aʻu lea na faamālōlōina i latou.+
4 Na ou tosina mai pea i latou i maea o le agalelei a le tagata, i manoa o le alofa,+ ma na pei ai aʻu iā i latou o ē e sii aʻe le amo i o latou auvae,+ ma avatu mālie meaʻai iā i latou taʻitoʻatasi.+
5 O le a lē toe foʻi o ia i le laueleele o Aikupito, ae o le a avea Asuria ma ona tupu,+ auā ua latou mumusu e toe foʻi mai iā te aʻu.+
6 E feliuliuaʻi le pelu i ona aai ma lepetia ona pou faalava,+ ma faaumatia tagata+ ona o a latou faufauga.+
7 Ua tele ina lē faamaoni loʻu nuu iā te aʻu.+ Ua latou valaau iā i latou e toe foʻi i lē ua sili; ae e leai lava se tasi e tulaʻi atu.*
8 “Efaraima e, e faapefea ona ou tuu atu oe?+ Isaraelu e, e faapefea ona ou tuuina atu oe?+ Ou te mafai faapefea ona tuuina atu o oe e pei o Atama?+ Ou te tuuina atu oe faapefea e pei o Sepoiima?+ Ua suia loʻu loto e faatatau iā te oe;+ ma ua faagaeetia oʻu lagona alofa mutimutivale i lea lava taimi.
9 Ou te lē faaoo atu loʻu ita tele.+ O le a ou lē toe faaumatia Efaraima,+ auā o aʻu o le Atua+ ae e lē o se tagata, o Lē e Paia o loo iā te outou;+ ma ou te lē alu atu ma le ita.
10 E latou te mulimuli atu iā Ieova.+ E tagi leotele o ia e pei o se leona;+ auā o le a tagi leotele o ia,+ e ō mai foʻi ma le gatete lana fanau mai i le itu i sisifo.+
11 E latou te ō mai ma le gatete e pei o se manulele mai i Aikupito,+ ma e pei foʻi o se lupe mai i le atunuu o Asuria;+ ma o le a ou faanonofo i latou i o latou fale,” ua fetalai mai ai Ieova.+
12 “Ua siʻomia aʻu e Efaraima i le pepelo+ ma le taufaasesē e tagata o Isaraelu. A ua savavali Iuta ma le Atua,+ ma e maufaatuatuaina o ia e Lē e Sili ona Paia.”
Faamatalaga Pito i Lalo
^ Pe “vivii atu iā te ia.”
