Iakopo 1:1-27
1 O aʻu o Iakopo,+ o le pologa+ a le Atua ma le Alii o Iesu Keriso, o le tusi lenei i ituaiga e sefulu lua+ o loo nonofo solo:+
Talofa!
2 Oʻu uso e, ia outou manatu o se mea e olioli tele ai, pe a outou fesagaʻi ma tofotofoga eseese.+
3 Ua outou iloa, o le tofotofoina o lo outou faatuatua, e iʻu ina outou tumau ai.+
4 Ia atoatoa galuega o lo outou tumau, ina ia atoatoa+ ma lelei ai outou i mea uma, ma ia leai se mea e mativa ai.+
5 O lea, pe afai ua leai se atamai+ i se tasi o outou, inā ōle atu pea ia i le Atua,+ auā o ia na te foaʻi tele mai ma le lē toe taʻutaʻua,+ ona foaʻiina mai lea iā te ia.+
6 Peitaʻi, ia ōle atu pea+ iā te ia i le faatuatua ae aua le masalosalo.+ Auā o lē e masalosalo, ua pei o ia o peau o le sami ua fesouaʻiina ma felafoaʻiina e le matagi.+
7 O lenei, aua neʻi manatu lenā tagata e na te maua se mea mai iā Ieova;+
8 o ia o le tagata faalotolotolua+ e faalētumau+ i ona ala uma.
9 Ia fiafia le uso faatauvaa ina ua faaeaina o ia,+
10 o le tagata mauʻoa+ foʻi ina ua faamaulaloina o ia, auā o le a mavae atu o ia e pei o se fugālaau o le fanua.+
11 Auā e oso aʻe le lā ma faasolo ina vevela tele, e mamae ai le fanua, e toʻulu ai ona fuga ma mavae ai lona matagofie. E faapena ona mou atu le tagata mauʻoa ma ona ala uma o le olaga.+
12 E fiafia le tagata e tumau e ui lava i tofotofoga,+ auā a uma ona tofotofoina o ia, ona maua ai lea e ia o le pale o le ola,+ lea na folafola mai e Ieova iā i latou o ē e alolofa pea iā te ia.+
13 Pe a faaosoosoina se tasi,+ aua neʻi manatu: “Ua faaosoosoina aʻu e le Atua.” E lē mafai ona faaosoosoina le Atua i mea leaga. E lē faaosooso atu foʻi o ia i se tasi.
14 A ua faaosoosoina tagata taʻitoʻatasi ona ua tosina ma maileia i ona lava tuʻinanau.+
15 Auā a tō le tuʻinanau, ona fanau mai ai lea o le agasala,+ a matua le agasala ona fanau mai ai lea o le oti.+
16 Oʻu uso pele e, aua neʻi faasesēina+ outou.
17 O meaalofa lelei+ uma ma mea uma e atoatoa ona lelei, e mai i lugā,+ auā e sau mai i le Tamā o le malamalama,+ e lē fesuisuiaʻi pe liliu* o ia.+
18 Auā o lona finagalo+ lea, ina ia avea ai i tatou ma ana fanau ona o le upu moni,+ o nisi o uluaʻi fua+ o mea na ia faia.
19 Ia outou iloa lenei mea oʻu uso pele e. Ia faalogologo lelei* tagata uma, ae aua le vave ona tautala,+ ma aua foʻi le vave ona ita.+
20 Auā o le ita o le tagata e lē tupu mai ai le amiotonu mai le Atua.+
21 Inā lafoaʻi ia o mea eleelea uma ma le amioleaga lea e lē aogā,+ ae ia talia ma le agamalu le upu+ ua aʻoaʻoina, lea ua mafai ai ona faasaoina o outou ola.+
22 Ia avea outou ma ē e usiusitaʻi i le upu+ ae e lē na o le faalogologo i ai, ua faasesēina ai outou i o outou lava manatu sesē.+
23 Afai e na o le faalogologo o se tasi i le upu ae e lē usiusitaʻi i ai,+ ua pei lava o ia o se tagata ua vaavaai i le faata i ona lava foliga.
24 Ua vaavaai o ia iā te ia lava, ona alu ese lea o ia ma ua galo loa ona foliga.
25 A o lē e vaavaai totoʻa i le tulafono lelei atoatoa+ o le saʻolotoga, ma tausisi i ai, ona o lona faalogologo ma le lē faagalogalo, o le a fiafia+ ai o ia ona o lona faia o lea galuega.+
26 Afai e manatu se tasi iā te ia lava o sē e toʻaga i le tapuaʻiga+ ae lē pulea lona laulaufaiva,+ ua faasesēina e ia lona lava loto,+ ua lē aogā la lana tapuaʻiga.+
27 O le tapuaʻiga lenei e mamā+ ma lē taʻuleagaina+ i le silafaga a le Atua lo tatou Tamā: ia tausi i tamaiti ua mātua oti+ ma fafine ua oti a latou tane+ i taimi o o latou puapuaga,+ ma ia puipuia le tagata lava ia neʻi pisia+ mai i le lalolagi.+
Faamatalaga Pito i Lalo
^ I le gagana Eleni, “e lē liliu pe fesuisuiaʻi e pei o se ata lafoia.”
^ I le gagana Eleni, ia “vave ona faalogologo.”
