Ieremia 21:1-14
21 O le afioga+ a Ieova na oo mai iā Ieremia, ina ua aauina atu e le Tupu o Setekaia+ o Pasura+ le atalii o Malakia, ma Sefanaia+ le atalii o Maaseia, o le ositaulaga, e faapea:
2 “Faamolemole lava, seʻi e fesili atu iā Ieova+ mo i tatou, ona ua siitaua mai iā i tatou Nepukanesa le tupu o Papelonia.+ Atonu e faia e Ieova iā i tatou e tusa ma ana galuega ofoofogia uma, ina ia alu ese ai o ia mai iā i tatou.”+
3 Ona fai mai lea o Ieremia iā i latou: “O le mea lenei e tou te fai atu ai iā Setekaia,
4 ‘O le mea lenei ua fetalai mai ai Ieova le Atua o Isaraelu: “Ou te faaliliuina atu auupega o le taua o loo i o outou lima, o loo outou tau ai ma le tupu o Papelonia+ ma tagata Kaletaia+ o ē o loo siʻomia outou i fafo o le pā, ou te faapotopoto foʻi i latou i le ogatotonu o lenei aai.+
5 O aʻu foʻi, ou te faasagatau atu iā te outou+ i le lima faaloaloa ma le lima malosi, ma le ita, o le lotoa, ma le ita tele.+
6 Ou te taia ē o loo nonofo i lenei aai, o tagata atoa ma manu. E oti foʻi i latou i le faamaʻi tele.”’+
7 “‘Ua fetalai mai Ieova, “Pe a mavae lenā, ou te tuuina atu Setekaia le tupu o Iuta ma ana auauna, o tagata ma i latou o ē o loo totoe i le aai mai i le faamaʻi, ma le pelu, ma le oge, i le lima o Nepukanesa le tupu o Papelonia, e oo foʻi i lima o o latou fili, ma lima o i latou o loo saʻili ia oti i latou, e na te taia lava i latou i le pelu.+ E lē alofa o ia iā i latou, e lē tigā alofa i ai, pe alofa mutimutivale foʻi i ai.”’+
8 “E te fai atu foʻi i lenei nuu, ‘O le mea lenei ua fetalai mai ai Ieova: “O lenei, ua ou tuuina atu i o outou luma le ala o le ola, ma le ala o le oti.+
9 O lē e nofo pea i lenei aai, e oti o ia i le pelu, o le oge, ma le faamaʻi;+ a o lē e alu ese, ma vavaeese atu i tagata Kaletaia o ē o loo siʻomia outou, e ola o ia ma e avea foʻi lona ola ma ana vete.”’+
10 “ʻ“Auā ua ou faasaga atu i lenei aai ia oo i ai le malaia, ae e lē o le manuia,”+ ua fetalai mai ai Ieova. “E tuuina atu i le lima o le tupu o Papelonia,+ e na te susunuina lava i le afi.”+
11 “‘A o le aiga o le tupu o Iuta, ia outou faalogologo mai i le afioga a Ieova.+
12 Le aiga o Tavita e,+ o le mea lenei ua fetalai mai ai Ieova: “Ia faia le faamasinoga+ tonu i taeao uma,+ ma ia laveaʻiina lē ua faoa ana mea mai i le lima o lē ua ia ave faagaoia,+ ina ia lē alu atu ai loʻu ita e pei o se afi+ ma susunu ai, ae e leai foʻi se tasi e na te mafaia ona tineia, ona o le leaga o mea na outou faia.”’+
13 “‘O oe o lē e nofo i le fanua laugatasi,+ o le papa o le mea laugatasi, ua ou tetee iā te oe,’ ua fetalai mai ai Ieova. ‘A o outou o ē ua faapea mai: “O ai e alu ifo e tau ma i tatou? O ai foʻi e sau i mea o loo tatou nonofo ai?”+
14 Ou te faasalaina outou+ e tusa ma le fua o mea na outou faia,’+ ua fetalai mai ai Ieova. ‘Ou te faamūina foʻi se afi i lona vaomatua,+ ma e matuā faaumatia ai mea uma o loo siʻomia ai o ia.’”+
