Ieremia 25:1-38
25 O le afioga na oo mai iā Ieremia e faatatau i le nuu uma o Iuta, i le tausaga lona fā o le nofoaiga a Ioakima+ le atalii o Iosia, o le tupu o Iuta, o le tausaga muamua lea o le nofoaiga a Nepukanesa le tupu o Papelonia;
2 na fai atu ai le perofeta o Ieremia e faatatau i le nuu uma o Iuta, ma e faatatau foʻi i ē uma o loo nonofo i Ierusalema, e faapea:
3 “E amata mai i le tausaga lona sefulu tolu o le nofoaiga a Iosia+ le atalii o Amone, o le tupu o Iuta, e oo mai i le aso nei, e lua sefulu tolu tausaga na oo mai ai iā te aʻu le afioga a Ieova, ma na ou tautala atu ai pea iā te outou, na ou alapō i le taeao ma tautala atu, ae e tou te leʻi faalogo mai lava.+
4 Na aauina atu foʻi e Ieova iā te outou o ana auauna uma o perofeta, ua alapō ma aauina atu i latou, ae e tou te leʻi faalogo mai lava,+ pe e uaʻi mai foʻi o outou taliga e faalogo mai ai,+
5 ua latou faapea atu, ‘Faamolemole, ia taʻitasi ma liliuese mai i lona ala leaga, ma a outou amioga leaga,+ ma ia outou nonofo pea i le laueleele na foaʻiina mai e Ieova iā te outou ma o outou augātamā, mai i aso anamua e oo atu lava i le lumanaʻi.+
6 Aua neʻi mulimuli atu i isi atua ina ia auauna ma ifo i ai, ina neʻi outou faatigā mai ai iā te aʻu i galuega a o outou lima, ina ia ou lē faaoo atu ai le malaia iā te outou.’+
7 “‘Ae e tou te leʻi faalogo mai iā te aʻu,’ ua fetalai mai ai Ieova, ‘ua outou mananaʻo e faatigā mai iā te aʻu i galuega a o outou lima, e oo ai le malaia iā te outou.’+
8 “O le mea lea ua fetalai mai ai Ieova o ʻau, ʻ“Ona ua outou lē faalogo mai i aʻu upu,
9 o le mea lea, ou te auina atu ai le feʻau ma ou aumaia aiga uma o le itu i mātū,”+ ua fetalai mai ai Ieova, “e auina atu foʻi le feʻau iā Nepukanesa laʻu auauna,+ o le tupu o Papelonia, ma ou aumaia i latou e tau ma lenei nuu,+ o ē o loo nonofo ai, ma atunuu uma o loo siʻomia ai;+ ou te faaumatia foʻi i latou ma faia ma mea e ofo ai,+ ma mea e tuufaaili ai, ma mea ua faatafunaina e oo i le faavavau.+
10 Ou te faaumatia mai iā i latou le leo o le fiafia,+ o le leo o le olioli, o le leo o le alii faaipoipo, o le leo o le tamaʻitaʻi faaipoipo,+ o le leo o le mea e olo ai saito,+ ma le malamalama o le molī.+
11 E avea lenei laueleele uma ma mea e faatafunaina, ma mea e ofo ai, e auauna foʻi nei atunuu i le tupu o Papelonia i tausaga e fitu sefulu.”’+
12 “Ua fetalai mai Ieova, ‘Afai e atoa tausaga e fitu sefulu,+ ona ou taui atu lea i le tupu o Papelonia ma lenā atunuu,+ e tusa o a latou mea sesē, e oo lava i le laueleele o tagata Kaletaia,+ ou te faia foʻi ia avea ma mea ua faatafunaina e faavavau.+
13 Ou te faaoo foʻi i lenā nuu upu uma na ou fai atu e oo i ai, ma mea uma foʻi o loo tusia i lenei tusi na valoia e Ieremia i atunuu uma.+
14 Auā e oo foʻi iā i latou, o le tele o atunuu ma tupu sili,+ ua faaaogā i latou e fai ma auauna;+ ma ou te toe taui atu iā i latou e tusa ma a latou gaoioiga, ma e tusa foʻi ma galuega a o latou lima.’”+
15 Auā o le mea lenei ua fetalai mai ai Ieova le Atua o Isaraelu iā te aʻu: “Ia e ave lenei ipu o le uaina o loʻu toʻasā mai i loʻu lima, ma ia e faainu ai atunuu uma o ē ou te auina atu i ai oe.+
16 E latou te feinu ma tautevateva ai, ma gaoioi ai e pei o ni tagata vālea ona o le pelu ou te auina atu iā i latou.”+
17 Ona ou aumaia lea o le ipu mai i le aao o Ieova, ma faainu ai atunuu uma lava na auina atu i ai aʻu e Ieova:+
18 o Ierusalema ma aai o Iuta, o ona tupu ma ona perenise, ua faia i latou ma mea ua faatafunaina ma mea e ofo ai,+ o se mea e tuufaaili ai, o le malaia foʻi, e pei ona faia i le aso nei;+
19 o Farao le tupu o Aikupito ma ana auauna, o ana perenise, ma lona nuu uma;+
20 o tagata eseese uma, o tupu uma o le nuu o Usa,+ o tupu uma o le nuu o Filisitia,+ o Asekelona,+ o Kasa,+ o Ekerona,+ ma ē o totoe o Asetota;+
21 o Etoma,+ o Moapi,+ o le fanauga a Amoni;+
22 o tupu uma o Turo,+ o tupu uma o Saitonu,+ o tupu o le motu i le isi itu o le sami;
23 o Titana,+ o Tema,+ o Pusa, ma i latou uma o ē e sele o latou manifinifi;+
24 o tupu uma o Arapi,+ o tupu uma o tagata eseese o ē o loo nonofo i le toafa;
25 o tupu uma o Semeri, o tupu uma o Elama,+ o tupu uma o Metai;+
26 o tupu uma o le itu i mātū o ē e latalata ma mamao, o le tasi ma le isi, ma isi malo uma o le lalolagi o loo i le laueleele; e mulimuli foʻi ona inu le tupu o Sesaka+ iā i latou.
27 “Ia e fai atu iā i latou, ‘O le mea lenei ua fetalai mai ai Ieova o ʻau, o le Atua o Isaraelu: “Ia outou feinu ma onanā, ia puaʻi ma paʻuʻū, ia lē mafai ona outou toe tutū i luga,+ ona o le pelu ou te auina atu iā te outou.”’+
28 Ae afai e mumusu i latou e ave le ipu mai i lou lima e feinu ai, ona e faapea atu lea iā i latou, ‘O le mea lenei ua fetalai mai ai Ieova o ʻau: “E tou te matuā feinu ai lava.+
29 Auā faauta! e amata atu i le aai ua taʻua ai loʻu igoa ona ou aumaia le malaia,+ ae pe tou te sao ai ea i lenā faasalaga?”’+
“‘E tou te lē sao ai lava i lenā faasalaga, auā ou te valaau i le pelu e oo i ē uma o loo nonofo i le lalolagi,’ ua fetalai mai ai Ieova o ʻau.
30 “A o oe, e te vavalo atu nei upu uma iā i latou, ma ia e faapea atu iā i latou, ‘E leotele+ mai Ieova mai i lugā, e tulei mai foʻi lona siʻufofoga mai i lona afioaga paia.+ E leotele mai lava o ia mai i le mea o loo afio ai. E alaga o ia e pei o leo o i latou o loo soli le vine i le soligavine, e alaga o ia i ē uma o loo nonofo i le lalolagi.’+
31 “‘E oo le vāvāō i tuluʻiga mamao o le lalolagi, auā o loo faia e Ieova le finauga ma atunuu.+ E faamasino foʻi e ia tagata uma.+ E tuuina atu e ia o ē e amioleaga i le pelu,’+ ua fetalai mai ai Ieova.
32 “O le mea lenei ua fetalai mai ai Ieova o ʻau, ‘Faauta! E alu atu le malaia mai i lea atunuu i lea atunuu,+ e oso aʻe foʻi le afā mataʻutia mai i vaega pito i mamao o le lalolagi.+
33 O i latou e fasia e Ieova i lea aso, e amata mai lava i le tasi pito o le lalolagi e oo atu i le isi pito o le lalolagi.+ E leai nisi e tagituʻi iā i latou, e lē aoaoina foʻi pe tanuina i latou.+ E fai i latou ma otaota i luga o le laueleele.’+
34 “O outou leoleo mamoe, inā uiō ia ma alalaga atu!+ O outou alii sili o le lafu mamoe, inā taafifili+ ia i le lefulefu,+ ona ua oo mai aso e fasia ai outou ma faasalalauina ai outou,+ e paʻuʻū foʻi outou e pei o se ipu matagofie!+
35 Ua leai se mea e sosola i ai leoleo mamoe, ma ua leai foʻi se mea e sao ai alii sili o le lafu mamoe.+
36 Faalogo! O le alalaga a leoleo mamoe ma le uiō a alii sili o le lafu mamoe, auā ua faaumatia e Ieova fanua e aai ai a latou lafu!
37 Ua lē toe iai foʻi se mea e ola ai i nofoaga filemu na nonofo ai, ona o le toʻasā aasa o Ieova.+
38 Ua ia tuua lona lafitaga e pei o se tamaʻi leona taanoa,+ auā ua avea lo latou nuu ma mea e ofo ai, ona o le pelu sauā ma lona toʻasā aasa.”+
