Ieremia 33:1-26
33 Ua faalua ona oo mai le afioga a Ieova iā Ieremia, a o taofia o ia i le Lotoā o le Leoleo,+ e faapea:
2 “O le mea lenei ua fetalai mai ai Ieova o Lē na faia le lalolagi,+ o Ieova o le Mataisau+ na ia matuā faatumauina ai,+ o Ieova o lona suafa lea,+
3 ‘Ia e valaau mai iā te aʻu, ona ou tali atu ai lea iā te oe,+ ma ou nofosauni e taʻu atu iā te oe mea tetele ma mea faigatā e te leʻi iloaina.’”+
4 “Auā o le mea lenei ua fetalai mai ai Ieova le Atua o Isaraelu, e faatatau i fale o lenei aai ma e faatatau foʻi i fale o tupu o Iuta ua talepe i lalo e fai ma puipuiga mai i mea mautiʻetiʻe ma le pelu a le fili;+
5 e faatatau foʻi iā i latou ua ō mai e tau faasaga i tagata Kaletaia, ma faatumu na mea i tino oti o tagata o ē na ou fasiotia i loʻu ita ma loʻu ita tele,+ ona o a latou mea leaga uma na ʻalo ese ai oʻu mata mai i lenei aai,+
6 ‘Ou te aumaia le faamālōlōga ma le ola mālōlōina mo ia;+ ou te faamālōlō foʻi i latou ma faaali atu i ai le tele o le filemu ma le upu moni.+
7 Ou te toe aumaia o ē na ave faapagota o Iuta ma ē na ave faapagota o Isaraelu,+ ou te atiaʻe foʻi i latou e pei ona iai muamua.+
8 Ou te faamamāina i latou mai i a latou mea sesē uma na latou agasala ai iā te aʻu,+ ou te faamagaloina foʻi a latou mea sesē uma na latou agasala mai ai iā te aʻu, ma latou fouvale mai ai iā te aʻu.+
9 E avea lava o ia ma igoa fiafia iā te aʻu,+ o le viiga ma le matagofie i atunuu uma o le lalolagi, o ē e faalogo i mea lelei uma ua ou faia iā i latou.+ E matataʻu+ foʻi i latou ma gatete+ ona o mea lelei uma, ma ona o le filemu uma ua ou tuuina atu iā te ia.’”+
10 “O le mea lenei ua fetalai mai ai Ieova, ‘I lenei mea, e tou te faapea mai ua tuufua, ua leai se tagata o iai ma ua leai foʻi ni manu lalata, o aai foʻi o Iuta ma auala o Ierusalema, ua faatafunaina+ ua leai se tagata, e leai nisi e nonofo ai ma ua leai foʻi ni manu lalata o iai, e toe lagona ai le leo+
11 o le fiafia ma le olioli,+ o le leo o le alii faaipoipo ma le tamaʻitaʻi faaipoipo, o leo o i latou ua faapea mai: “Ia outou faaneenee iā Ieova o ʻau, auā e lelei Ieova;+ auā e faavavau lava lona alofa faamaoni!”’+
“‘E latou te avatu le taulaga faafetai i le fale o Ieova,+ auā ou te toe faafoʻisia mai o ē na ave faapagota o le nuu e pei ona iai muamua,’+ ua fetalai mai ai Ieova.”
12 “O le mea lenei ua fetalai mai ai Ieova o ʻau, ‘I lenei mea ua tuufua, ua leai se tagata po o ni manu lalata,+ o ona aai uma foʻi o le a avea ma fanua e aai ai lafumanu a leoleo mamoe, o ē e ave a latou lafu e taooto ai.’+
13 “‘I aai o vaega maugā, i aai o le nofoaga maulalo,+ i aai foʻi o le itu i saute,+ ma le nuu o Peniamina,+ atoa ma mea o siʻomia ai Ierusalema,+ ma aai o Iuta,+ e toe ui ane ai lafu mamoe i lalo o lima o lē na te faitauina,’+ ua fetalai mai ai Ieova.”
14 “‘Faauta! E oo mai aso,’+ ua fetalai mai ai Ieova, ‘ou te faataunuuina lava le upu lelei na ou fai atu ai,+ e faatatau i le aiga o Isaraelu+ ma e faatatau foʻi i le aiga o Iuta.
15 I na aso ma i lenā taimi, ou te faatupuina ai iā Tavita se tātupu amiotonu,+ o ia lava na te faia le faamasinogatonu ma le amiotonu i le nuu.+
16 I na aso, e faaolaina ai Iuta+ ma e nonofo Ierusalema ma le saogalemu.+ E taʻua foʻi o ia, O Ieova o La Tatou Amiotonu.’”+
17 “Auā o le mea lenei ua fetalai mai ai Ieova, ‘E lē motu mai i le gafa o Tavita se tagata e nofo i le nofoālii o le aiga o Isaraelu.+
18 A o le ʻauositaulaga, o le ʻau sa Levī, e lē motu mai i oʻu luma lo latou gafa o se tasi e ofoina atu le taulaga mū ma susunu le taulaga i meaʻai, ma ofo atu le taulaga i aso uma.’”+
19 Ua toe oo mai foʻi le afioga a Ieova iā Ieremia, ua faapea mai:
20 “O le mea lenei ua fetalai mai ai Ieova, ‘Afai e tou te mafaia ona lepeti laʻu feagaiga ma le ao, ma laʻu feagaiga ma le pō, ina ia lē toe iai se ao po o se pō i o latou taimi,+
21 e faapena foʻi ona mafai ona lepeti laʻu feagaiga ma Tavita laʻu auauna,+ ina ia leai sona atalii e pule o se tupu i lona nofoālii;+ e faapea foʻi ma le ʻau sa Levī, o le ʻauositaulaga, o aʻu auauna.+
22 E pei ona lē mafai ona faitauina o ʻau o le lagi, ma lē mafai foʻi ona fuatia le oneone o le sami,+ e faapea lava ona ou faatoʻateleina le fanau a Tavita laʻu auauna, atoa ma sa Levī o ē o loo auauna mai iā te aʻu.’”+
23 Ua toe oo mai le afioga a Ieova ia Ieremia, ua faapea mai:
24 “Pe e te lē o iloa ea mea ua tautatala mai ai lenei nuu, ua faapea, ‘O aiga e lua na filifilia e Ieova,+ o le a teena foʻi i latou e ia’? Ua latou lē faaaloalo pea i loʻu nuu,+ ina ia lē toe avea ma nuu i o latou luma.
25 “O le mea lenei ua fetalai mai ai Ieova, ‘Ana faapea ou te leʻi osia se feagaiga ma le ao ma le pō,+ o tulafono foʻi o le lagi ma le lalolagi,+
26 semanū ua ou teena le fanau a Iakopo ma le fanau a Tavita laʻu auauna,+ ou te lē aumaia ai mai i lana fanau o ē e pule i le fanau a Aperaamo, o Isaako, ma Iakopo. Auā ou te faapotopotoina mai i latou na ave faapagota,+ ma ou alofa iā i latou.’”+
