Ieremia 34:1-22
34 O le afioga a Ieova na oo mai iā Ieremia, a o tau Nepukanesa le tupu o Papelonia,+ o ana ʻautau uma,+ o malo uma o le lalolagi, o ē o loo ia pule ai,+ ma nuu uma, faasaga iā Ierusalema ma ona aai uma,+ ua faapea mai:
2 “O le mea lenei ua fetalai mai ai Ieova le Atua o Isaraelu, ‘Inā alu ia ma fai atu iā Setekaia le tupu o Iuta,+ ia e fai atu iā te ia: “O le mea lenei ua fetalai mai ai Ieova, ‘Ou te tuuina atu lenei aai i le lima o le tupu o Papelonia,+ e susunuina lava e ia i le afi.+
3 A o oe, e te lē sao mai i lona lima, auā e puʻea lava oe ma tuuina atu i lona lima.+ E faafesagaʻi lava ou mata ma mata o le tupu o Papelonia,+ e te lua talanoa faafesagaʻi foʻi, ma e te alu atu lava i Papelonia.’
4 Ae peitaʻi, ia e faalogo mai i le afioga a Ieova, Setekaia e, le tupu o Iuta,+ ‘O le mea lenei ua fetalai mai ai Ieova e faatatau iā te oe: “E te lē oti i le pelu.
5 Ae e te oti lava ma le filemu;+ o afi foʻi na faamūina mo ou tamā, o tupu anamua o ē na muamua atu iā te oe,+ e faapea foʻi ona latou faamūina+ se afi mo oe, ma e latou te faapea ane ma le auē+ mo oe, ‘Auē! le matai e!’+ auā ‘ua ou fai atu ai lenei upu,’ ua fetalai mai ai Ieova.”’”’”
6 Ona fai atu lea e le perofeta o Ieremia iā Setekaia le tupu o Iuta, o nei upu uma+ i Ierusalema,
7 a o tau ʻautau uma a le tupu o Papelonia ma Ierusalema, o aai uma o Iuta na totoe,+ ma Lakisa+ ma Aseka;+ auā o aai+ malupuipuia ia na totoe i aai o Iuta.+
8 O le afioga a Ieova na oo mai iā Ieremia, ina ua mavae ona osia se feagaiga e le Tupu o Setekaia ma le nuu uma o ē na i Ierusalema, e folafola atu iā i latou le saʻolotoga,+
9 ina ia taʻitasi ma faasaʻoloto lana auauna tane, ma lana auauna fafine, o le tamāloa Eperu+ ma le fafine Eperu, ina ia lē toe faia i latou ma auauna a se Iutaia, o lona uso lea.+
10 Ua usiusitaʻi perenise uma,+ ma le nuu uma na osia le feagaiga, ina ia taʻitasi ma faasaʻoloto lana auauna tane ma lana auauna fafine, ina ia lē toe fai i latou ma auauna, ona latou usiusitaʻi lea ma ua latou tuu atu i latou e ō.+
11 Ae mulimuli ane, na toe liliu atu i latou+ ma toe aumaia auauna tane ma auauna fafine o ē na latou faasaʻolotoina, ma ua toe fai foʻi i latou ma auauna tane ma auauna fafine.+
12 Ona oo mai lea o le afioga a Ieova iā Ieremia, ua faapea mai:
13 “O le mea lenei ua fetalai mai ai Ieova le Atua o Isaraelu, ‘O aʻu lava na ou osia le feagaiga ma o outou augātamā,+ i le aso na ou aumaia ai i latou mai i le nuu o Aikupito,+ mai i le mea na latou nofo pologa ai,+ e faapea:
14 “I le iʻuga o tausaga e fitu, ia taʻitasi outou ma tuuina atu lona uso e alu,+ o le tamāloa Eperu,+ o lē na faatauina atu iā te oe+ ma o lē foʻi na auauna iā te oe i tausaga e ono; ia e faasaʻolotoina o ia mai iā te oe.” Ae peitaʻi, e leʻi faalogo mai o outou augātamā iā te aʻu, e leʻi uaʻi mai foʻi o latou taliga.+
15 A o outou, ua outou liliu mai ma faia le mea e tonu i oʻu luma, i le taʻitasi ma folafola atu le saʻolotoga i lana aumea, ma ua outou osia se feagaiga i oʻu luma,+ i le fale ua taʻua ai loʻu igoa.+
16 A ua outou liliuese+ ma faaleaga loʻu igoa,+ ma ua taʻitasi ma toe aumai i lana auauna tane ma lana auauna fafine, o ē na outou faasaʻolotoina e tusa ma la latou lava faitalia, a ua outou fai i latou e avea ma a outou auauna tane ma auauna fafine.’+
17 “O le mea lea ua fetalai mai ai Ieova, ‘Ua outou lē usiusitaʻi iā te aʻu i le taʻitasi o outou ma folafola atu le saʻolotoga+ i lona uso ma lana aumea. A o lenei, ua ou folafola atu iā te outou le saʻolotoga,’+ ua fetalai mai ai Ieova, ‘i le pelu,+ i le faamaʻi,+ ma le oge,+ ou te tuuina atu lava outou ina ia gatete ai i malo uma o le lalolagi.+
18 Ou te tuuina atu foʻi i tagata ua solia laʻu feagaiga,+ i lo latou lē tausisia o upu o laʻu feagaiga na latou osia i oʻu luma, o le tamaʻi povi na latou isiluaina+ ina ia latou ui ane ai i le va o mea na isiluaina;+
19 o perenise o Iuta, o perenise o Ierusalema,+ o tagata aloaʻia, o ositaulaga, ma tagata uma o le nuu, o ē na ui ane i le va o le tamaʻi povi poʻa na isiluaina,
20 ou te tuuina atu lava i latou i lima o o latou fili, ma lima o i latou o loo saʻili ia oti i latou;+ e avea foʻi o latou tino oti ma meaʻai a manufelelei o le lagi ma manu o le fanua.+
21 Ou te tuuina atu Setekaia le tupu o Iuta+ ma ona perenise, i lima o o latou fili ma lima o i latou o loo saʻili e fasiotia i latou, ma lima o vaegaʻau a le tupu o Papelonia+ o ē ua solomuli mai iā te outou.’+
22 “‘Ua ou poloaʻi atu,’ ua fetalai mai ai Ieova, ‘ma ou te toe faafoʻisia mai lava i latou i lenei aai,+ e latou te tau ai, ma puʻea ma susunu i le afi;+ ou te faia foʻi aai o Iuta e avea ma mea ua faatafunaina, e leai se tasi e nofo ai.’”+
