Ieremia 35:1-19
35 O le afioga a Ieova na oo mai iā Ieremia i aso o Ioakima+ le atalii o Iosia, o le tupu o Iuta, e faapea:
2 “Ia e alu i le fale o tagata Rakapa,+ ia e tautala atu iā i latou ma aumaia i latou i le fale o Ieova, i se tasi o potu ʻai; ma ia e avatu iā i latou le uaina e feinu ai.”
3 Ona ou ave ai lea o Iaasenaia le atalii o Ieremia le atalii o Havasinia ma ona uso, ma ona atalii uma, ma le aiga uma o Rakapa,
4 ma ou aumaia i latou i le fale o Ieova, i le potu ʻai o atalii o Hanana le atalii o Iketalia, o le tagata o le Atua moni, sa i tafatafa o le potu ʻai+ o perenise sa i luga aʻe o le potu ʻai o Maaseia le atalii o Saluma,+ o le leoleo faitotoʻa.
5 Ona ou tuuina atu lea i luma o le fanauga o le aiga o tagata Rakapa, o ipu ua tutumu i le uaina ma ipu e inu ai, ma faapea atu iā i latou: “Inā feinu ia i le uaina.”
6 A ua latou faapea mai: “E matou te lē feinu i le uaina, auā na tuuina mai e Ionatapa le atalii o Rakapa,+ o lo matou augātamā o le poloaʻiga iā i matou, e faapea, ‘Aua tou te feinu i le uaina, o outou ma a outou fanau, e oo i le faavavau.+
7 Aua tou te fausia se fale, aua foʻi tou te lūlūina se fatu; aua tou te totōina se togāvine, pe fai foʻi mo outou. A ia outou nonofo i faleʻie i o outou aso uma, ina ia ola ai pea outou i aso e tele i luga o le fogāeleele, o loo outou nonofo ai o ni tagata ese.’+
8 O lea, ua matou usiusitaʻi ai i le upu a Ionatapa le atalii o Rakapa, o lo matou augātamā, i mea uma na poloaʻi mai ai o ia iā i matou,+ e aua neʻi feinu i le uaina i o matou aso uma, o i matou, o a matou avā, o o matou atalii ma o matou afafine,+
9 aua neʻi fausia ni fale mo i matou e nonofo ai, e lē fai foʻi mo i matou se togāvine, o se fanua, po o se fatu.
10 Ua matou nonofo pea i faleʻie ma usiusitaʻi, ma faia e tusa o mea uma na poloaʻi mai ai Ionatapa+ lo matou augātamā iā i matou.+
11 Ae ina ua sau Nepukanesa le tupu o Papelonia e tau faasaga i le nuu,+ ona matou faapea atu lea, ‘Sau ia ma tatou ō atu i Ierusalema, ona o le ʻautau a tagata Kaletaia ma ona o le ʻautau foʻi a tagata Suria, ma o tatou nonofo ai i Ierusalema.’”+
12 Ona oo mai lea o le afioga a Ieova iā Ieremia, ua faapea mai:
13 “O le mea lenei ua fetalai mai ai Ieova o ʻau, o le Atua o Isaraelu, ‘Inā alu ia ma ia e fai atu i tagata o Iuta ma ē o loo nonofo i Ierusalema: “Pe e tou te leʻi maua pea le apoapoaʻiga ina ia usiusitaʻi mai i aʻu upu?”+ ua fetalai mai ai Ieova.
14 “Ua faataunuuina lava upu a Ionatapa le atalii o Rakapa+ na ia poloaʻi mai ai i ona atalii, e aua le feinu i se uaina, ma ua latou lē feinu ai lava e oo mai i le aso nei, auā ua latou usiusitaʻi i le poloaʻiga a lo latou augātamā.+ A o aʻu, na ou tautala atu iā te outou,+ na ou alapō lava ma tautala atu, ae e tou te leʻi usiusitaʻi mai iā te aʻu.+
15 Na ou aauina atu pea iā te outou o aʻu auauna uma o le ʻauperofeta,+ na ou alapō ma aauina atu i latou, e faapea, ‘Faamolemole, inā taʻitasi ia ma liliuese mai i lona ala leaga,+ ma fai ia lelei a outou amioga,+ aua foʻi le mulimuli atu i isi atua e auauna ai iā i latou.+ Ia nonofo pea i le laueleele na ou tuuina atu iā te outou ma o outou augātamā.’+ Ae e leʻi uaʻi mai o outou taliga, e tou te leʻi faalogo mai foʻi iā te aʻu.+
16 A ua faia lava e atalii o Ionatapa le atalii o Rakapa+ le poloaʻiga a lo latou augātamā na ia poloaʻi atu ai iā i latou;+ a o lenei nuu, ua latou lē faalogo mai iā te aʻu.”’”+
17 “O lea, o le mea lenei ua fetalai mai ai Ieova, o le Atua o ʻau, o le Atua o Isaraelu, ‘Ou te aumaia i luga o Iuta ma luga o ē uma o loo nonofo i Ierusalema, le mala uma na ou fai atu ai e oo iā i latou, auā na ou tautala atu iā i latou,+ a ua latou lē faalogo mai, na ou valaau atu pea iā i latou, ae e latou te leʻi tali mai foʻi.’”+
18 Ua fai atu foʻi Ieremia i le aiga o tagata Rakapa: “O le mea lenei ua fetalai mai ai Ieova o ʻau, o le Atua o Isaraelu, ‘Ona ua outou usiusitaʻi i le poloaʻiga a Ionatapa+ lo outou augātamā, ma tausia pea ana poloaʻiga uma ma faia e tusa ma mea uma na ia poloaʻi mai ai iā te outou,+
19 o le mea lea ua fetalai mai ai Ieova o ʻau, o le Atua o Isaraelu: “E lē motu mai i le gafa o Ionatapa le atalii o Rakapa, se tagata e tū+ i oʻu luma i aso uma lava.”’”+
