Ieremia 4:1-31
4 “Isaraelu e, afai e te foʻi mai,” ua fetalai mai ai Ieova, “inā foʻi mai ia iā te aʻu.+ Afai e te aveesea au mea inosia ona o aʻu,+ ona lē avea lea o oe ma sē e maumausolo.
2 Afai foʻi e te tautō lava,+ ‘O loo soifua Ieova i le faamaoni, i le faamasinotonu,+ ma le amiotonu!’+ ona manuia ai lea o atunuu ona o ia, ma e latou te mitamita foʻi iā i latou lava ona o ia.”+
3 Auā o le mea lenei ua fetalai mai ai Ieova i tagata o Iuta ma Ierusalema: “Inā faatoʻa ia o lo outou fanua e leʻi galueaʻiina, ae aua le lūlūina pea a outou fatu i laau tuitui.+
4 Inā peritome ia outou iā Ieova, ma aveese paʻu o outou loto,+ o outou tagata o Iuta ma tagata o loo nonofo i Ierusalema; ina ia lē alu atu ai loʻu ita e pei o se afi, ma susunu ai ae e leai se tasi e na te tineia, ona o a outou mea leaga na fai.”+
5 Ia outou taʻu atu i Iuta ma faalauiloa atu i Ierusalema,+ ia taʻu atu foʻi ma ilia se pū i le nuu.+ Ia valaau leotele atu e faapea: “Inā faapotopoto faatasi ia outou, ma tatou ulu atu i aai malupuipuia.+
6 Inā faatū ia se faailoilo e iloa ai le ala i Siona. Ia saunia foʻi se mea e tou te malu ai. Aua neʻi outou tutū mai.” Auā ou te aumaia le mala mai i le itu i mātū,+ ma le malaia tele.
7 Ua alu aʻe o ia e pei o se leona mai i le vao putuputu,+ ma ua alu ese lē na te faafanoina nuu;+ ua alu atu o ia mai i lona nofoaga ina ia faia lou laueleele ma mea e ofo ai. E faatafunaina foʻi ou lava aai ina ia leai sē e nofo ai.+
8 Inā fusi ia outou i ʻie talatala ona o lenei mea.+ Ia outou tagituʻi ma uiō,+ auā e lē liliuese le toʻasā aasa o Ieova mai iā i tatou.+
9 Ua fetalai mai Ieova: “I lea aso e vaivai ai le loto o le tupu,+ faapea loto o perenise; e maofa foʻi ositaulaga ma taufaiofo perofeta.”+
10 Ona ou faapea atu lea: “Auē, Ieova e, le Alii Pule Silisili Ese! E moni ua e matuā ʻolegiaina lenei nuu+ ma Ierusalema, e faapea, ‘E iā te outou le filemu,’+ a ua oo lava le pelu i le loto.”
11 O le taimi lenā e faapea atu ai i lenei nuu ma Ierusalema: “E iai se matagi vevela e sau mai i auala i le toafa,+ e alu atu i le tama fafine a loʻu nuu;+ e lē o se matagi e faasavili pe faamamā ai saito.
12 E agi mai iā te aʻu le matagi malosi mai i na mea. O lea, ou te faailoa atu ai foʻi faamasinoga iā i latou.+
13 Faauta! E alu aʻe o ia e pei o ao timuga, o ona kariota e pei o se matagi malosi.+ O ana solofanua e sili atu ona televavave nai lo o aeto.+ Oi talofa iā i tatou, auā ua faoa a tatou mea!
14 Ierusalema e, inā faamamā ia lou loto mai i mea leaga, ina ia faaolaina ai oe.+ O le ā ea le umi e teu ai na manatunatuga leaga i totonu iā te oe?+
15 Auā ua taʻu mai e se leo mai i Tanu,+ ma faailoa mai se mea tigā mai i vaega maugā o Efaraima.+
16 Ia outou taʻu atu i atunuu e uiga iā te ia. Ia folafola atu foʻi i Ierusalema.”
“Ua ō mai tagata leoleo mai i se nuu e mamao lava,+ ma e latou te alalaga atu foʻi e faasaga i aai o Iuta.
17 E pei o leoleo fanua, ua latou siitaua atu iā te ia i itu uma,+ auā ua fouvale o ia iā te aʻu,”+ ua fetalai mai ai Ieova.
18 “O lou ala ma au mea na fai, ua oo ai nei mea iā te oe.+ O le malaia lea iā te oe, auā e oona; ua oo lava i lou loto.”
19 Loʻu manava e, loʻu manava e! Ua matuā tigā lava loʻu loto.+ Ua tātā vale loʻu fatu i totonu iā te aʻu.+ Ua ou lē manofo, auā ua ou faalogo atu i le leo o le pū, o le alaga o le taua.+
20 Ua sau le alaga, ua faaumatia, ua faaumatia, auā ua faatafunaina le nuu atoa.+ Ua faafuaseʻi foʻi ona faatafunaina oʻu faleʻie,+ o oʻu faleʻie e pei o le emo o le mata.
21 O le ā le umi ou te vaai atu ai pea i le faailoilo, ma faalogo ai pea i le leo o le pū?+
22 Auā ua valelea loʻu nuu.+ Ua latou lē ano mai lava iā te aʻu.+ O i latou o se fanau e lē atamamai; e lē o i latou foʻi o nisi e malamalama.+ E atamamai i latou e fai mea leaga, ae latou te lē iloa lava fai ni mea lelei.+
23 Na ou vaai atu i le nuu, faauta! ua gaogao ma tuufua;+ na ou vaai atu foʻi i le lagi, a ua lē toe iai se malamalama.+
24 Na ou vaai atu i mauga, faauta! ua gatete, ma ua lūlūina foʻi aʻega uma.+
25 Na ou iloa, faauta! ua leai se tagata, ua sosola foʻi manufelelei uma o le lagi.+
26 Na ou iloa, faauta foʻi! ua avea le fanua lauolaola ma toafa, ua lepetia ona aai uma lava.+ Ona o Ieova, ona o le aasa foʻi o lona toʻasā.
27 Auā o le mea lenei ua fetalai mai ai Ieova: “E avea le laueleele uma ma faatafunaga,+ ma po ou te lē matuā faaumatia ai ea?+
28 O le mea lea e faavauvau ai le nuu,+ e matuā pōuliuli ai foʻi le lagi i lugā.+ Auā ua ou fai ane, ua ou manatu i ai, ua ou filifili e fai, ma ou te lē liliuese mai ai.+
29 Ua sosola le aai atoa ona o le leo o tagata tiʻetiʻe solofanua ma ē e fanafana aū.+ Ua latou ulu atu i vao putuputu, ma ua latou ō aʻe i papa.+ Ua tuua aai uma, ua leai foʻi se tagata e nofo ai.”
30 Ona o lea ua faatafunaina oe, o le ā nei lau mea o le a fai, talu ai sa masani ona e ofu i ofu mūmū sesega, sa masani ona e teuteu iā te oe i auro, sa masani foʻi ona e faamanaia ou mata i vali uliuli?+ O se mea faatauvaa lou faalalelei o oe lava.+ Ua teena oe e i latou sa tuʻinanau atu iā te oe; ma ua latou saʻili atu pea e fasioti iā te oe.+
31 Auā ua ou faalogo i le leo e pei o se fafine ua maʻi, o le tigā e pei o le tigā o se fafine o le a fanau mai lana tama ulumatua,+ o le leo o le tama fafine a Siona o lē o loo fia mānava. O loo faaloloa mai pea ona lima:+ “Auē, talofa iā te aʻu, auā ua ou matuā fiu lava ona o ē e fasioti tagata!”+
