Ieremia 41:1-18
41 O le masina lona fitu, na ō mai ai iā Ketalia le atalii o Aikamo i Mesepa,+ o Isamaeli+ le atalii o Netanaia le atalii o Elisama,+ o lē na tupuga mai i le aiga tupu,+ ma tagata faamoemoeina a le tupu, faatasi ai ma isi tagata e toʻasefulu na iā te ia.+ O i inā na latou aai faatasi ai i Mesepa.+
2 Ona tulaʻi lea o Isamaeli le atalii o Netanaia ma tagata e toʻasefulu na iā te ia, ma fasiotia Ketalia le atalii o Aikamo le atalii o Safana i le pelu.+ Ua ia fasiotia lē na tofia e le tupu o Papelonia e pule i le nuu.+
3 Ua fasiotia foʻi e Isamaeli tagata Iutaia uma o ē na faatasi ma Ketalia i Mesepa, atoa ma le ʻau Kaletaia o ē na maua ai i inā, o tagata ia o le taua.
4 Ua oo i le aso lona lua talu ona fasiotia o Ketalia, ae e leai ma se isi na ia iloaina,+
5 ona ō mai ai lea o tagata mai i Sekema,+ mai i Sailo,+ ma Samaria,+ e toʻavalu sefulu, ua sele a latou ʻava+ ma ua saeia o latou ofu, ua selei foʻi o latou tino,+ na latou aumaia i o latou lima taulaga i meaʻai ma lipano+ i le fale o Ieova.
6 Ona alu atu lea o Isamaeli le atalii o Netanaia mai i Mesepa e faafeiloaʻi i latou, ua tagi o ia a o savali atu.+ Ina ua ia fetaiaʻi ma i latou, ona ia faapea atu lea iā i latou: “Inā ō mai ia iā Ketalia le atalii o Aikamo.”
7 Ae ina ua latou oo mai i totonu o le aai, ona fasiotia ai lea o i latou e Isamaeli le atalii o Netanaia ma lafo o latou tino i totonu o le vaieli, o ia ma tagata sa iā te ia.+
8 Ae e toʻasefulu tagata sa iā i latou, o ē na vave ona faapea atu iā Isamaeli: “Aua neʻi fasiotia i matou, auā ua iai oloa ua natia iā i matou o loo i le fanua, o saito, o karite, o suāuu, ma le meli.”+ Ona ia tuu lea, ua ia lē faaoo le oti iā i latou faatasi ma o latou uso.
9 O le vaieli na lafo i ai e Isamaeli+ tino oti o tagata na ia fasiotia, e matuā telē lava, o le vaieli lea na faia e le Tupu o Asa ona o Paasa le tupu o Isaraelu.+ O le vaieli lea na faatumu e Isamaeli le atalii o Netanaia i tino oti o i latou na fasiotia.
10 Ona ave faapagota lea e Isamaeli o ē uma na totoe o le nuu sa i Mesepa,+ o afafine o le tupu,+ ma le nuu uma o ē na totoe i Mesepa,+ o ē na tuuina atu e Nepusatana le taʻitaʻi o leoleo i le vaavaaiga a Ketalia le atalii o Aikamo.+ Ona aveina faapagota lea o i latou e Isamaeli le atalii o Netanaia, ma ō atu e sopo atu i le fanauga a Amoni.+
11 Mulimuli ane, na faalogo Ioanano+ le atalii o Karea ma taʻitaʻi uma o ʻautau+ na faatasi ma ia, i mea leaga uma na faia e Isamaeli le atalii o Netanaia.
12 Ona latou ave lea o tagata uma ma ō atu e tau faasaga iā Isamaeli le atalii o Netanaia, ua latou maua o ia e lata ane i le vai tele i Kipeona.+
13 Ina ua iloa atu e le nuu uma sa faatasi ma Isamaeli, ia Ioanano le atalii o Karea ma taʻitaʻi uma o ʻautau o ē na faatasi ma ia, ona latou fiafia ai lea.
14 Ua liliu mai tagata uma o ē na ave faapagota e Isamaeli mai i Mesepa+ ma toe foʻi mai, ua ō mai iā Ioanano le atalii o Karea.
15 A ua sola+ Isamaeli le atalii o Netanaia, ma tagata e toʻavalu sa faatasi ma ia mai iā Ioanano, ua alu atu o ia i le fanauga a Amoni.
16 Ona ave lea e Ioanano+ le atalii o Karea ma taʻitaʻi uma o ʻautau sa faatasi ma ia, o ē uma na totoe o le nuu, o ē na latou toe aumaia mai iā Isamaeli le atalii o Netanaia, mai i Mesepa, ina ua uma ona ia fasiotia o Ketalaia+ le atalii o Aikamo, o tagata malolosi, o tagata o le taua, o avā, o tamaiti, ma tagata aloaʻia, o ē na ia aumaia mai i Kipeona.
17 Ona latou ō lea ma nonofo i le mea e api ai i Kimeama e latalata i Peteleema,+ ina ia latou ō atu ai i Aikupito,+
18 ona o le ʻau Kaletaia;+ auā ua latou fefefe iā i latou,+ ona ua fasiotia e Isamaeli le atalii o Netanaia o Ketalaia le atalii o Aikamo,+ o lē na tofia e le tupu o Papelonia e pule i le nuu.+
