Ieremia 42:1-22
42 Ona faalatalata mai lea o taʻitaʻi uma o ʻautau, o Ioanano+ le atalii o Karea, o Iaasenaia+ le atalii o Hosaia,+ ma le nuu uma, o tagatānuu atoa ma alii,
2 ua faapea mai i le perofeta o Ieremia: “Seʻi faafofoga mai i la matou talosaga faamolemole, ma ia e tatalo atu iā Ieova lou Atua+ mo i matou, e fai ma sui o i matou uma o totoe, auā e toʻaitiiti i matou ua totoe mai i le toʻatele,+ e pei ona e vaai mai ai iā i matou.
3 Ia faailoa mai e Ieova lou Atua iā i matou le auala e ao ona matou savavali ai, ma le mea e ao ona matou faia.”+
4 Ona fai atu lea o le perofeta o Ieremia iā i latou: “Ua ou faalogo atu. Ou te tatalo atu iā Ieova lo outou Atua e tusa ma a outou upu;+ ma o afioga uma e tuuina mai e Ieova e tali mai ai iā te outou, ou te taʻuina atu lava iā te outou.+ Ou te lē natia lava se upu mai iā te outou.”+
5 Ona latou fai mai lea iā Ieremia: “Ia fai Ieova ma molimau moni ma le faamaoni iā i tatou,+ pe afai matou te lē faia e tusa ma upu uma na auina mai ai oe e Ieova lou Atua iā i matou.+
6 Pe e lelei pe e leaga foʻi, e matou te faalogo lava i le siʻufofoga o Ieova lo tatou Atua o lē ua matou auina atu ai oe, ina ia manuia ai i matou auā ua matou faalogo i le siʻufofoga o Ieova lo tatou Atua.”+
7 Ina ua faaiʻu le aso lona sefulu, ona oo mai ai lea o le afioga a Ieova iā Ieremia.+
8 Ona ia valaau lea iā Ioanano le atalii o Karea, o taʻitaʻi uma o ʻautau o ē sa faatasi ma ia, ma le nuu uma, o tagatānuu atoa ma alii;+
9 ua ia faapea atu iā i latou: “O le mea lenei ua fetalai mai ai Ieova le Atua o Isaraelu, o lē na outou auina i ai aʻu e faaoo atu i ona luma la outou talosaga mo lona finagalo malie,+
10 ‘Afai e tou te nonofo pea i lenei nuu,+ ou te atiaʻe outou ma ou te lē lepetia outou, ou te totōina foʻi outou ma ou te lē liaʻiina outou;+ auā ua ou faanoanoa ona o le malaia ua ou faaoo atu iā te outou.+
11 Aua le fefefe i le tupu o Papelonia o lē ua outou matataʻu i ai.’+
“‘Aua tou te fefefe iā te ia,’+ ua fetalai mai ai Ieova, ‘auā ou te faatasi ma outou, ina ia faaolaina outou ma laveaʻi iā te outou mai i lona lima.+
12 Ou te alofa mutimutivale atu iā te outou, e alofa mutimutivale lava foʻi o ia iā te outou, ma toe faafoʻisia outou i lo outou laueleele.+
13 “‘Ae afai e tou te faapea mai: “E leai; matou te lē nonofo i lenei nuu!” ua outou lē faalogo ai i le siʻufofoga o Ieova lo outou Atua,+
14 e faapea: “E leai, e matou te ō i le nuu o Aikupito,+ i le mea e matou te lē vāai ai i se taua, e matou te lē faalogo ai i le leo o le pū, e matou te lē oge ai foʻi i meaʻai; o i inā e matou te nonofo ai”;+
15 a o lenei, inā faalogo mai ia i le afioga a Ieova, o outou na o ē o loo totoe o Iuta. O le mea lenei ua fetalai mai ai Ieova o ʻau, o le Atua o Isaraelu: “Afai e tou te maumauaʻi e ō i Aikupito, ma outou ō atu e aumau ai i inā o ni tagata ese,+
16 ona maua ai lea o outou e le pelu na outou fefefe ai i le nuu o Aikupito,+ e mulimulituʻi foʻi iā te outou le oge na outou matataʻu ai i Aikupito;+ o i inā e tou te feoti ai lava.+
17 O tagata uma foʻi e maumauaʻi e ō atu i Aikupito e aumau ai i inā o ni tagata ese, o i latou na e oti i le pelu, o le oge, ma le faamaʻi;+ e leai foʻi se isi o i latou e faasaoina pe sola ese, ona o le mala ou te faaoo atu iā te i latou.”’+
18 “Auā o le mea lenei ua fetalai mai ai Ieova o ʻau, o le Atua o Isaraelu, ‘E pei ona ou liligi ifo o loʻu ita ma loʻu ita tele i luga o ē o loo nonofo i Ierusalema,+ e faapea foʻi ona liligi ifo loʻu ita tele iā te outou, pe a outou ō atu i Aikupito, e faamalaiaina outou, e avea o se mea e ofo ai, o le malaia, ma e faalumaina ai,+ e tou te lē toe vāai foʻi i lenei mea.’+
19 “Ua fetalai mai Ieova faasaga iā te outou, o outou o ē ua totoe o Iuta. Aua tou te ō atu i Aikupito.+ Ia outou iloa lelei, ua ou lapataʻia outou i le aso nei,+
20 auā ua outou faia mea sesē faasaga iā te outou lava;+ auā o outou lava foʻi na auina atu aʻu iā Ieova lo outou Atua, e faapea, ‘Inā tatalo ia iā Ieova lo tatou Atua mo i matou; ma ia faapea ona e taʻuina mai iā i matou e tusa ma mea uma ua fetalai mai ai Ieova lo tatou Atua, e matou te faia lava.’+
21 A ua ou taʻu atu iā te outou i le aso nei, ae e tou te lē faalogo mai lava i le siʻufofoga o Ieova lo outou Atua, po o se mea ua ia auina mai ai aʻu iā te outou.+
22 O lenei, ia outou iloa lelei, o le a oti outou i le pelu,+ o le oge, ma le faamaʻi, i le mea ua outou fiafia e ō atu e aumau ai o ni tagata ese.”+
