Ieremia 48:1-47
48 O le mea lenei ua fetalai mai ai Ieova o ʻau, o le Atua o Isaraelu iā Moapi:+ “Oi talofa iā Nepo,+ auā ua faoa ana mea uma! Ua faamāina Kiriataima+ ma ua faatoʻilaloina. Ua faamāina le ʻolo e saogalemu ai ma ua faamataʻuina.+
2 E lē toe iai se viiga o Moapi.+ I Hesepona,+ ua latou mafaufau ai i se mea e malaia ai o ia: ‘Inā ō mai ia, ma seʻi o tatou vavaeesea o ia ina ia lē toe avea ma nuu.’+
“O oe foʻi Matameni e, ia e nofo filemu. E mulimuli atu iā te oe le pelu.
3 O le leo o le alaga mai i Horonaima,+ o le aveesea o mea ma le faatamaʻiaga tele.
4 Ua faatamaʻia Moapi.+ Ua lagona le alalaga mai a ona tamaiti.
5 Auā o le auala e alu aʻe i Luita,+ ua alu aʻe ai le tagata ma le tagi, o loo tagi lava. O le alu ifo foʻi mai i Horonaima, ua lagona ai e tagata le alaga o le puapuaga, ona o le faatamaʻiaga.+
6 “Inā sosola ia; ia saunia se mea e faasaoina ai outou,+ ia avea foʻi outou e pei o le laau o le perosi i le toafa.+
7 E faatoʻilaloina foʻi oe, ona ua e faatuatua i au galuega ma au oloa.+ E ave faapagota+ lava Kimosa,+ o ona ositaulaga, ma ona perenise i le taimi e tasi.+
8 E sau foʻi o lē e faoa mea i aai uma,+ ma e leai se aai e mafai ona sao mai ai.+ E fano lava le fanua laugatasi, ma e faaumatia le mea laugatasi, o le mea na fetalai mai ai Ieova.
9 “Ia outou tuuina atu se faailoga o le auala iā Moapi, auā e alu atu o ia pe a lepetia mea uma lava;+ e avea foʻi ona aai ma mea e ofo ai, e leai se isi e nofo ai.+
10 “Ia malaia le tagata e faatamala i le faataunuuina o le feʻau a Ieova;+ ia malaia foʻi le tagata e taofia lana pelu mai i le faamasaaina o le toto!
11 “Ua nonofo filemu tagata Moapi talu mai lo latou talavou,+ ma ua latou toʻafilemu pea e pei o le uaina i luga o o latou ʻalu.+ E leʻi sasaa atu i latou mai i le tasi ipu i le isi ipu, e leʻi ave faapagota foʻi i latou. O le mea lea ua tumau ai pea lo latou tofo iā i latou, ma e leʻi suia foʻi lo latou manogi.
12 “‘O le mea lea, faauta! e oo mai aso,’ ua fetalai mai ai Ieova, ‘ou te aauina atu ai iā i latou o ipu e sasaa ai, ma latou te sasaaina ai lava;+ e latou te aveese foʻi mea uma mai i a latou ipu, ma nutililii a latou fagu tetele.
13 E māsiasi foʻi tagata Moapi iā Kimosa,+ e pei ona māsiasi o i latou o le aiga o Isaraelu iā Peteli lo latou faatuatuaga.+
14 E faapefea ona outou fai mai: “O i matou o tagata totoa+ ma o tagata malolosi mo le taua”?’
15 “‘Ua faoa mea a Moapi, ma ua alu aʻe foʻi se tasi e faasagatau i ona aai.+ Ua ō ifo ona tauleleʻa sili ona lelei ia fasiotia,’+ ua fetalai mai ai le Tupu, o lona suafa o Ieova o ʻau.+
16 “Ua latalata ona oo mai le malaia o tagata Moapi, ma ua matuā televave mai lava lo latou puapuaga.+
17 E tigā alofa faatasi ma i latou o ē uma o loo siʻomiaina i latou, e oo lava iā i latou e iloa lo latou igoa.+ Ia outou faapea atu, ‘E! ua gauia le tootoo o le malosi, o le laau o le matagofie.’+
18 “Inā alu ifo ia mai i lou mamalu ma nofo ma le galala, o oe le tama fafine+ o loo nofo i Tipona;+ auā ua alu aʻe e tau ma oe lē e faoa mea a Moapi. E na te faatamaʻia foʻi ou nofoaga malupuipuia.+
19 “Le tama fafine e, o loo nofo i Aroeru,+ inā tū pea ia ma vaavaai atu i le auala. Ia fesili atu iā te ia o lē ua sola, ma lē ua sao mai ai. Ia faapea atu, ‘O le ā ea le mea ua tupu?’+
20 Ua faamāina Moapi auā ua taia o ia i le mataʻu.+ Inā uiō ia ma alaga atu. Ia outou taʻu atu i Arinona,+ ua faoa mea a Moapi.
21 Ua oo mai le faamasinoga i le laueleele o le atunuu laugatasi,+ iā Horona, o Iaesa,+ o Mefata,+
22 o Tipona,+ o Nepo,+ o Petetipelata,
23 o Kiriataima,+ o Petekamulo, o Petemeona,+
24 o Kiriota,+ o Posara+ ma aai uma o le nuu o Moapi, o i latou e mamao ma latalata mai.
25 “‘Ua vavaeeseina le nifo o Moapi,+ ua gau foʻi lona lima,’+ ua fetalai mai ai Ieova.
26 ‘Ia outou faainu iā te ia ia onā,+ auā ua faasausili o ia iā Ieova;+ ua taafili Moapi i ana puaʻiga,+ ma ua avea lava o ia ma mea e tauemu ai.
27 “Pe e leʻi avea ea Isaraelu ma mea e tauemu ai iā te oe?+ Pe na maua ea o ia faatasi ma tagata gaoi?+ Auā ua lūlū pea lou ulu, a o e tautala faasaga iā te ia.
28 “‘O outou o loo nonofo i Moapi, inā tuua ia aai ma nonofo i le papa,+ ia avea foʻi e pei o le lupe ua faia lona faamoega i le itu o le augutu o le lua.’”+
29 “Ua matou faalogo i le faamaualuga o Moapi,+ e matuā faualuga o ia, ona o lona maualuga, o lona mimita, o lona faualuga, ma le faafefeteina o lona loto.”+
30 “‘O aʻu lava, ua ou iloa lona ita,’ ua fetalai mai ai Ieova, ‘e lē o le auala lea o le a iai; e oo foʻi i ana tala lē aogā,+ e lē faia lava i le auala lenā.+
31 O le mea lea ou te uiō ai ona o Moapi, ou te alaga atu foʻi ona o Moapi atoa.+ Auā e ōi o ia ona o tagata o Kiriarisa.+
32 “‘Le vine e, o Sepena,+ e sili atu loʻu tagi iā te oe+ nai lo o loʻu tagi iā Iasaru. Ua sopo atu i le sami ou tātupu lauolaola. Ua oo atu i le sami, ua oo atu i Iasaru.+ Ua osofaʻia e lē e faoa mea ou fua o le tau māfanafana,+ ma ou vine ua faaputuina.+
33 Ua aveesea le fiafia ma le olioli mai i le togālaau ma le nuu o Moapi.+ Ua ou taofia foʻi le uaina mai i le mea e soli ai vine.+ E leai se isi e solia vine ma le alaga. E iai le alaga e fai atu, ae e lē o se alaga fiafia.’”+
34 “‘O le alaga i Hesepona+ ua oo atu i Eleale,+ ua latou valaau+ atu e oo atu i Iaesa,+ e mai i Soara+ e oo atu i Horonaima,+ i Ekalata-selisa;*+ auā e avea foʻi vai o Nimara+ ma mea ua faatafunaina.
35 Ou te taofia foʻi mai i Moapi,’ ua fetalai mai ai Ieova, ‘o lē na te ave aʻe se taulaga i le mea maualuga, ma lē na te faamū se taulaga i lona atua.+
36 O le mea lea e tātā vale ai loʻu fatu e pei o fagufagu ona o Moapi;+ e tātā vale foʻi loʻu fatu e pei o fagufagu ona o tagata o Kiriarisa.+ O le mea lea e fano ai le tele o mea na ia faia.+
37 Auā ua sele mamā ulu uma,+ ma ua sele foʻi ʻava uma.+ Ua selei lima uma,+ ma ua fusia ʻie talatala i puimanava!’”+
38 “‘Ua iai le tagiauē i taualuga o fale uma o Moapi ma ona nofoaga faitele uma;+ auā ua ou nutililiia Moapi e pei o se ipu e lē fiafia i ai,’+ ua fetalai mai ai Ieova.
39 ‘Auē ua mataʻu o ia! Inā uiō ia outou! E! ua sola ese Moapi. Ua māsiasi o ia.+ Ua avea foʻi Moapi ma mea e tauemu ai, ma mea e matataʻu ai i latou uma o loo siʻomia o ia.’”
40 “Auā o le mea lenei ua fetalai mai ai Ieova, ‘Faauta! E pei ona faatifa ifo le aeto,+ e faaloloa atu foʻi e se tasi ona apaʻau i luga o Moapi.+
41 E faoa lava aai, ma faatoʻilaloina ona nofoaga malolosi. O loto foʻi o tagata malolosi o Moapi, e avea i lenā aso e pei o le loto o se fafine ua faatigā o le a fanau.’”+
42 “‘E faaumatia lava Moapi mai i le avea ma nuu,+ auā ua faasagatau iā Ieova i lona faasausili.+
43 O oe lenā e nofo i Moapi, e oo iā te oe le mataʻu, o le lua, ma le mailei,’+ ua fetalai mai ai Ieova.
44 ‘E so o se tasi e sola ese ona o le mataʻu, e paʻū i le lua; o se tasi foʻi e alu aʻe mai i le lua, e puʻea i le mailei.’+
“‘Auā ou te faaoo i ona luga, o luga lava o Moapi, o le tausaga e uaʻi atu ai,’+ ua fetalai mai ai Ieova.
45 ‘O ē ua sosola, ua tutū i latou i le paolo o Hesepona, ua leai so latou malosi. Auā e alu atu lava le afi mai i Hesepona,+ ma le afi mumū mai i totonu o Sekono;+ ma faaumatia ai malumalu o Moapi, ma le tumuaʻi o le ulu o atalii o le vāvāō.’+
46 “‘Oi talofa iā te oe, Moapi!+ Ua faaumatia le nuu o Kimosa.+ Auā ua ave faapagota ou atalii, ua ave faapagota foʻi ou afafine.
47 Ou te faapotopotoina o ē na ave faapagota o Moapi i le faaiʻuga o aso,’+ ua fetalai mai ai Ieova. ‘Ua faaiʻuina ai i inei le feʻau o le faamasinoga o Moapi.’”+
Faamatalaga Pito i Lalo
^ Atonu e faatatau atu i se nofoaga i Moapi. Ua faaliliuina i isi Tusi Paia, “o le povi fafine e tolu tausaga.”
