Ieremia 5:1-31
5 Inā ō ia ma feoaʻi solo i auala o Ierusalema, ma vaavaai ma iloa ai, ma saʻili mo outou lava i ona nofoaga faitele, pe e mafai ona outou maua ai se tagata,+ pe e iai se tagata e faia le faamasinogatonu,+ o se tasi o saʻili i le faamaoni,+ ona ou faamagaloina lea o ia.
2 E tusa lava pe e latou te faapea mai: “O loo soifua Ieova!” a ua latou tautō pepelo lava.+
3 Ieova e, pe e lē silasila ea ou fofoga i ē e faamaoni?+ Ua e taia i latou,+ ae e leʻi mamaʻi ai.+ Ua e faaumatia i latou.+ A ua latou lē talia le aʻoaʻiga.+ Ua faamaaa o latou mata e sili atu ona malō nai lo o le papa.+ Ua lē mananaʻo i latou e toe foʻi mai.+
4 E oo foʻi iā te aʻu, na ou faapea ane: “E moni lava o i latou o tagata e leʻi aʻoaʻoina. Ua latou gaoioi ma le vālea, auā ua latou lē amanaʻia le ala o Ieova, o le faamasinoga a lo latou Atua.+
5 Ou te alu atu lava i alii sili ma tautala atu iā i latou;+ auā ua tatau ona latou iloa le ala o Ieova, o le faamasinoga a lo latou Atua.+ E moni lava, ua gauia faatasi e i latou le amo; e moni lava ua latou motusia foʻi noanoataga.”+
6 O le mea lea na osofaʻia ai i latou e se leona mai i le togāvao, na faaumatia pea foʻi i latou e se luko o fanua laugatasi o le toafa,+ ua lamalama pea e se nameri i o latou aai.+ O i latou uma e ō ese mai iā i latou, e saeia lava. Auā ua tele a latou solitulafono, ma ua matuā tele foʻi a latou gaoioiga lē faamaoni.+
7 E faapefea ona ou faamagaloina oe i lenei mea? Ua tuua aʻu e lau fanau ma ua latou tautō+ pea i lē e lē o se Atua.+ Na ou faamalieina pea i latou,+ ae na latou mulilulua pea,+ na latou ō atu foʻi e pei o ni ʻau i le fale o se fafine talitane.
8 Ua avea i latou o ni solofanua poʻa ua matuā naunau i feusuaʻiga, e malolosi foʻi o latou totogasā. Ua taʻitasi i latou ma tagi i le avā a lana aumea.+
9 “Po ou te lē faasalaina ea i latou ona o nei mea?” ua fetalai mai ai Ieova.+ “Po ou te lē taui atu ea foʻi i se atunuu faapenei?”+
10 “Inā ō aʻe ia i ona laina vine ma faaleagaina,+ ae aua tou te matuā faaumatiaina.+ Ia aveese ona tātupu lauolaola, auā e lē o Ieova e ona ia.+
11 Auā ua matuā faaʻoleʻole mai iā te aʻu le aiga o Isaraelu ma le aiga o Iuta,” ua fetalai mai ai Ieova.+
12 “Ua latou faafitia Ieova ma ua latou fai atu pea, ‘E lē o iai o ia.+ E lē oo mai iā i matou se puapuaga, e matou te lē vāai foʻi i se pelu po o se oge.’+
13 Ua avea perofeta e pei o se matagi, ma e lē o iā i latou le afioga.+ E faapena lava ona faia iā i latou.”
14 O le mea lea ua fetalai mai ai Ieova le Atua o ʻau: “Ona ua outou fai mai i lenei mea, o le mea lea ou te faia ai aʻu upu ma afi i lou gutu,+ e avea lenei nuu ma fafie, ma e matuā susunuina ai lava i latou.”+
15 O le mea lenei ua fetalai mai ai Ieova: “Le aiga o Isaraelu e, ou te aumaia iā te outou se atunuu mai i le mea mamao.+ O se atunuu e matuā tumau.+ O se atunuu mai anamua, o se atunuu e tou te lē iloa lana gagana, e tou te lē malamalama foʻi i mea e latou te tautatala mai ai.
16 O la latou taga e tuu ai aū ua pei o se tuugamau ua faamaga; o i latou uma foʻi o tagata malolosi.+
17 E latou te ʻaina lava lau seleselega ma au meaʻai.+ E ʻaina e tagata ou atalii ma ou afafine. E latou te ʻaina au lafu mamoe ma au lafu povi. E latou te ʻaina au vine ma au mati.+ E latou te faaumatia foʻi i le pelu ou aai malupuipuia o loo e faatuatua i ai.”
18 Ua fetalai mai Ieova: “E oo foʻi i na aso, ou te lē faataunuuina lava le faaumatiaina o outou.+
19 A outou fai mai, ‘O le ā ea le mea ua faia ai e Ieova lo tatou Atua nei mea uma iā i tatou?’+ Ona e fai atu lea iā i latou, ‘E pei ona outou tuua o aʻu ma ō atu e auauna i se atua ese i lo outou nuu, e faapena foʻi ona outou auauna i tagata ese i le nuu e lē o so outou nuu.’”+
20 Ia outou taʻu atu lenei mea i le aiga o Iakopo, ma folafola atu i Iuta, e faapea:
21 “Inā faalogologo mai ia i lenei mea, o outou le nuu lē atamamai ma le lē mafaufau:+ E fai o latou mata, ae e lē vāai i latou;+ e fai foʻi o latou taliga, ae e lē faalogo i latou.+
22 ‘Pe e tou te lē matataʻu ea iā te aʻu,’+ ua fetalai mai ai Ieova, ‘pe e tou te lē matuā tigā ea foʻi ona o aʻu,+ o lē ua tuu le oneone e fai ma tuaoi mo le sami, o se tulafono e tumau pea e lē mafai lava ona sopoʻiaina? E ui ina fefatiaʻi ona galu, ae e lē mafai lava; e tusa lava foʻi pe malolosi, e lē mafai lava ona latou sopoʻia atu.+
23 A o lenei nuu, ua maaa ma ua fouvale o latou loto; ua latou liliuese ma savavali pea i o latou ala.+
24 Ua latou lē fai ifo i o latou loto: “Seʻi o tatou matataʻu ia iā Ieova lo tatou Atua,+ o Lē ua foaʻiina mai timuga, o timuga i le tau e afu ai mea, ma timuga i le tau e totogo ai mea,+ o Lē foʻi e leoleoina vaiaso ua atofaina o le seleselega mo i tatou.”+
25 O o outou sesē ua liliueseina ai nei mea, ma o a outou agasala ua taofia ai nei mea lelei mai iā te outou.+
26 “‘Auā ua iai tagata leaga i loʻu nuu.+ Ua latou tilotilo atu pea, e pei o ē e puʻe manulele o loo faapupuga.+ Ua latou tuu se mailei mataʻutia. E latou te puʻea ai tagata.
27 E pei o se pā ua tumu i manufelelei, ua faapea foʻi ona tumu o latou fale i mea taufaasesē.+ O le mea lea ua faasilisiliina ai i latou ma maua ai a latou ʻoa.+
28 Ua puputa i latou;+ ua lamolemole foʻi i latou. Ua taumasuasua i latou i mea leaga. Ua latou lē faia se faamasinogatonu,+ o le faamasinogatonu o le tamaitiiti+ ua leai sona tamā, ina ia manuia ai i latou;+ ua latou lē faia foʻi le faamasinoga o ē e matitiva.’”
29 Ua fetalai mai Ieova: “Po ou te lē faasalaina ea i latou ona o nei mea, po ou te lē tauimasui atu ea foʻi i se atunuu faapenei?+
30 Ua faia i le nuu se mea mataʻutia e ofo ai:+
31 O perofeta, ua vavalo i latou i mea pepelo;+ a o ositaulaga, ua latou pule e tusa ma lo latou malosi.+ A ua fiafia i ai loʻu nuu;+ ma o le ā se mea e tou te faia i lona iʻuga?”+
