Ieremia 9:1-26
9 E! pe ana avea loʻu ulu ma vai, ma oʻu mata ma puna o loimata.+ Ina ia ou tagi ai i le ao ma le pō, ona o ē ua fasiotia o le tama fafine a loʻu nuu.+
2 E! pe ana iai soʻu fale i le toafa e nonofo ai tagata femalagaaʻi.+ Ina ia ou tuua ai loʻu nuu ma alu ese mai iā i latou, auā o i latou uma o ē ua mulilulua,+ o se faapotopotoga o tagata faaʻoleʻole;+
3 ua latou loloʻu o latou laulaufaiva e pei o a latou ʻaufana e tala pepelo ai;+ ua lē totoa foʻi i latou e fai mea faamaoni i le nuu.
“Auā ua latou faia lea mea leaga ma lea mea leaga, ma ua latou lē amanaʻia aʻu,”+ ua fetalai mai ai Ieova.
4 “Ia taʻitasi outou ma faaeteete i lana aumea,+ aua lava neʻi o outou faatuatua atu i se uso e tasi.+ Auā e faumālō uso uma lava,+ ma e feoaʻi solo foʻi aumea uma o ni ē e taufaaleaga,+
5 e taʻitasi i latou ma taufaasesē i lana aumea;+ e latou te lē tautatala lava i le upu moni. Ua aʻoaʻoina o latou laulaufaiva e tautatala i mea pepelo.+ Ua vaivai i latou ona o le faia o mea sesē.+
6 “O le mea ua e nofo ai o loo i totonu o le nuu faaʻoleʻole.+ O le faaʻoleʻole foʻi, ua latou lē mananaʻo ai e iloa aʻu,”+ ua fetalai mai ai Ieova.
7 O lea, o le mea lenei ua fetalai mai ai Ieova o ʻau: “Ou te faamamāina i latou, ma ou te suʻesuʻeina i latou,+ auā o le ā se isi mea ou te faia ona o le tama fafine a loʻu nuu?+
8 O lo latou laulaufaiva o se aū e oti ai.+ E tautala faaʻoleʻole. E tautala i le filemu le tagata i lona gutu i lana aumea; a ua ia lamalama iā te ia i lona loto.”+
9 “Po ou te lē faasalaina ea i latou ona o nei mea?” ua fetalai mai ai Ieova. “Po ou te lē taui atu ea foʻi i se atunuu faapenei?+
10 I luga o mauga, ou te tagi ma auē ai,+ i luga foʻi o fanua e tataa ai lafumanu i le toafa, ou te usu ai se pese faanoanoa; auā ua susunuina i latou+ ma ua leai se tagata e ui ane, ua lē lagona foʻi e tagata le leo o lafumanu.+ E sosola ese manufelelei o le lagi ma manu tataa; ua ō ese i latou.+
11 Ou te faia Ierusalema ma faupuʻega maa,+ o le mea e nonofo ai taʻifau+ ʻaivao; ou te faia foʻi aai o Iuta ma mea gaogao, e leai se tasi e nofo ai.+
12 “O ai ea se tagata atamai ina ia malamalama i lenei mea, po o se isi foʻi na fetalai atu i ai le fofoga o Ieova, e mafai ona ia taʻu atu lenei mea?+ O le ā le māfuaaga o le a fano ai lenei laueleele, ma susunuina ai lava e pei o le toafa e lē toe ui ane ai se isi?”+
13 Ona fetalai mai lea o Ieova: “Ona ua latou tuua laʻu tulafono na ou avatu ina ia tuu i o latou luma, ma talu ai ua latou lē faalogo i loʻu leo ma lē savavali ai,+
14 a ua latou mulimuli pea i le maaa o o latou loto,+ atoa ma tupua o Paala,+ na aʻoaʻo ai i latou e o latou tamā;+
15 o lea, o le mea lenei ua fetalai mai ai Ieova o ʻau, o le Atua o Isaraelu, ‘O aʻu lava ou te fafaga i lenei nuu i mea oona,+ ma faainu i latou i vai oona;+
16 ou te faataapeape i latou i atunuu e leʻi iloa e i latou po o latou tamā foʻi,+ ma ou te auina atu le pelu e mulimuli iā i latou, seʻia ou faaumatia i latou.’+
17 “O le mea lenei ua fetalai mai ai Ieova o ʻau, ‘Inā mafaufau ia outou, ma valaau atu i fafine e usuina pese faanoanoa+ ina ia latou ō mai; ma ia feʻau atu foʻi i fafine tomai ina ia latou ō mai,+
18 ina ia latou faavave mai ma lagi se auēga mo i tatou. Ia tafe ifo foʻi loimata i o tatou mata, ma ia sisina ifo vai i o tatou mata.+
19 Auā ua lagona le leo o auēga mai i Siona:+ “E! ua faatafunaina i tatou.+ Ua tele lava lo tatou māsiasi! Auā ua tatou tuua le laueleele; ona ua latou talepe i lalo o tatou fale.”+
20 O lenei, inā faalogo mai ia outou fafine i le afioga a Ieova, ia lagona foʻi e o outou taliga le afioga a lona fofoga. Ia outou aʻoaʻo a outou fanau teine i le auēga,+ ma ia taʻitasi le fafine ma aʻoaʻo se pese faanoanoa i lana aumea.+
21 Auā ua alu aʻe le oti i o tatou faamalama; ua sau i totonu o o tatou olo e nonofo ai, ina ia fano ai le tamaitiiti mai i le auala, ma tauleleʻa mai i nofoaga faitele.’+
22 “Inā fai atu ia, ‘O le mea lenei ua fetalai mai ai Ieova: “E paʻuʻū foʻi tino oti o tagata e pei o otaota i luga o le laueleele, ma e pei foʻi o se laina o fusi saito faatoʻā uma ona seleina i tua o lē e selesele, ae e leai se tasi na te aoaoina.”’”+
23 O le mea lenei ua fetalai mai ai Ieova: “Aua neʻi mitamita le tagata atamai iā te ia lava ona o lona atamai,+ aua neʻi mitamita le tagata malosi iā te ia lava ona o lona malosi.+ Aua foʻi neʻi mitamita le tagata mauʻoa iā te ia lava ona o ana ʻoa.”+
24 “A o lē e mitamita, inā mitamita ia o ia iā te ia lava ona o lenei mea, ona ua iā te ia le tofā mamao+ ma ua ia iloa aʻu, o aʻu o Ieova,+ o Lē e faaalia le alofa faamaoni, o le faamasinotonu, ma le amiotonu i le lalolagi;+ auā ou te fiafia i nei mea,”+ ua fetalai mai ai Ieova.
25 “Faauta! E oo mai ona aso,” ua fetalai mai ai Ieova, “ou te taui atu ai iā i latou uma ua peritomeina ae e leʻi peritomeina lava+
26 o i Aikupito,+ o Iuta,+ o Etoma,+ o le fanauga a Amoni,+ o le fanauga a Moapi,+ ma i latou uma e sele o latou manifinifi, o ē o loo nonofo i le toafa;+ auā e leʻi peritomeina atunuu uma, ma e leʻi peritomeina foʻi loto o le aiga uma o Isaraelu.”+
