Ioane 1:1-51
1 Sa i le amataga+ le Upu,+ sa faatasi le Upu ma le Atua,+ ma o se atua foʻi le Upu.+
2 Sa faatasi o ia ma le Atua+ i le amataga.+
3 Na faia mea uma lava e ala iā te ia,+ ma e leai foʻi se mea e tasi e leʻi faia e ala iā te ia.
O le mea na faia
4 e ala iā te ia, o le ola lea,+ ma o le ola, o le malamalama+ lea o tagata.
5 Ua susulu mai le malamalama i le pōuliuli,+ ae e leʻi manumalo ai le pōuliuli.
6 Sa iai se tagata na auina mai e fai ma sui o le Atua:+ o lona igoa o Ioane.+
7 Na sau lenei tagata e molimau,+ ina ia molimau i le malamalama,+ ina ia talitonu ituaiga o tagata eseese e ala iā te ia.+
8 E lē o ia o lenā malamalama,+ ae o ia o le molimau+ e faatatau i lenā malamalama.
9 Ua toeitiiti ona maliu mai lea i le lalolagi o le malamalama moni,+ e na te faamalamalamaina+ ituaiga o tagata eseese.+
10 Sa iai o ia i le lalolagi,+ ma na faia le lalolagi e ala iā te ia,+ ae peitaʻi e leʻi iloa o ia e le lalolagi.
11 Na afio mai o ia i lona lava nuu, ae e leʻi taliaina o ia e ona lava tagata.+
12 Ae o i latou uma o ē na taliaina o ia,+ na ia avatu i ai le aiā e avea ai i latou ma fanau a le Atua,+ auā na latou faatuatua i lona suafa;+
13 e latou te leʻi fananau mai ona o le toto, po o le manaʻo o le tino, po o le manaʻo o tagata, ae e mai i le Atua.+
14 Ua avea le Upu ma tagata+ ma na nofo faatasi ma i tatou, ma na tatou vāai i lona mamalu, o le mamalu lea o le atalii e toʻatasi*+ o le tamā; ma ua tumu o ia i le agalelei faifua ma e tautala foʻi ma le faamaoni.+
15 (Ua molimau Ioane e uiga iā te ia, ua alaga o ia, o ia lenei ua faapea atu: “O lē e mulimuli mai, e sili o ia iā te aʻu, auā na iai o ia ae ou te leʻi iai aʻu.”)+
16 Auā ua tatou maua pea le tele+ o lona agalelei faifua.+
17 Talu ai na tuuina mai le Tulafono iā Mose,+ ua oo mai le agalelei faifua+ ma le upu moni+ e ala mai iā Iesu Keriso.
18 E leai lava se tasi ua vaai i le Atua;+ ua na o lē* e toʻatasi+ o loo i le fatafata+ o le Tamā, o ia ua na faamatalaina mai le Tamā.+
19 O le molimau lenei a Ioane ina ua aauina mai e tagata Iutaia le ʻaufaitaulaga ma sa Levī mai Ierusalema e fesili mai iā te ia: “O ai ea oe?”+
20 E leʻi faafiti o ia a ua taʻutino atu: “E lē o aʻu o le Keriso.”+
21 Ona latou fesili mai lea iā te ia: “A o ai la? O oe ea o Elia?”+ Ua tali atu o ia: “E leai.” “Po o oe o Le Perofeta?”+ A ua tali atu o ia: “E leai!”
22 Ua latou fai mai iā te ia: “O ai ea oe? ina ia matou avatu se tali iā i latou na aauina mai i matou. O le ā sau upu e uiga iā te oe?”+
23 Ua fai atu o ia: “O aʻu o le leo o lē e alaga i le toafa, ‘Ia faasaʻosaʻo le ala i luma o Ieova,’ e pei ona fai mai ai le perofeta o Isaia.”+
24 O i latou na aauina mai, e mai i le ʻau Faresaio.*
25 Ona latou fesili mai lea iā te ia: “Aiseā la ua e faia ai papatisoga+ pe afai e lē o oe o le Keriso, po o Elia, po o Le Perofeta?”
26 Ua tali atu Ioane: “Ou te faia papatisoga i le vai. Ae o loo tū mai i lo outou lotolotoi+ se tasi e tou te lē iloa,+
27 o lē e mulimuli mai, e lē aogā iā te aʻu ona ou tatala i nonoa o ona seevae.”+
28 Na tutupu nei mea i Petania i le isi itu o Ioritana, i le mea na faia ai le papatisoga a Ioane.+
29 I le aso na sosoo ai, na ia iloa atu ai Iesu o loo maliu mai iā te ia, ona fai ane lea o ia: “Faauta! O le Tamaʻi Mamoe+ a le Atua, o lē e na te aveeseina le agasala+ a le lalolagi!+
30 O ia lenei na ou fai atu ai e faapea, O loo mulimuli mai lē e sili iā te aʻu, auā na iai o ia ae ou te leʻi iai aʻu.+
31 Ou te lē iloa foʻi o ia, ae o le mea lea na ou sau ai e fai papatisoga i le vai, ina ia faailoa atu ai o ia iā Isaraelu.”+
32 Ua molimau foʻi Ioane e faapea: “Na ou iloa atu le agaga ua alu ifo mai i le lagi e pei o se lupe, ma tumau i ona luga.+
33 Ou te lē iloa o ia, a o Lē na auina mai aʻu+ e papatiso i le vai, na fetalai mai o ia, ‘O lē e te iloa le agaga ua alu ifo ma tumau ai i ona luga, o ia lenā e na te papatiso atu i le agaga paia.’+
34 Ua ou vaai i ai, ma ou te molimau atu o ia lenei o le Alo o le Atua.”+
35 I le aso na sosoo ai, a o tutū faatasi Ioane ma ona soo e toʻalua,
36 ua ia iloa atu Iesu o loo savali ane, ona ia faapea atu lea: “Faauta, o le Tamaʻi Mamoe+ a le Atua!”
37 Ua faalogo soo e toʻalua i ana upu, ma ua la mulimuli mai ai iā Iesu.
38 Ona faliu atu lea o Iesu ma silasila atu o loo la mulimuli mai iā te ia, ua ia fetalai atu: “O le ā le mea o loo oulua saʻilia?” Ua la tali mai iā te ia: “Rapi e, (o lona uiga pe a faaliliuina, o le Aʻoaʻo) o fea o loo e nofo ai?”
39 Ua fetalai atu o ia iā i laʻua: “Ō mai, ona oulua iloa ai lea.”+ Ona lā ō atu lea, ma iloa ai le mea o loo nofo ai o ia, ona la nonofo ai lea ma ia i lenā aso; pe e tusa lea o le itula e sefulu.*
40 O Aneterea+ le uso o Simona Peteru, o le tasi lea o i laʻua na faalogo i upu a Ioane, ona mulimuli ai lea iā Iesu.
41 Ona ia alu atu loa lea ma maua ai lona uso o Simona, ma fai atu i ai: “Ua ma maua le Mesia”+ (o lona uiga pe a faaliliuina, o le Keriso).+
42 Ona ia taʻitaʻi atu lea o ia iā Iesu. Ua silasila+ atu Iesu iā te ia ma fetalai atu: “O oe o Simona+ le atalii o Ioane;+ o le a faaigoa oe o Kefa” (pe a faaliliuina, o Peteru).+
43 Ua finagalo o ia e maliu atu i Kalilaia i le aso e sosoo ai. Ona maua ai lea e Iesu o Filipo+ ma fetalai atu iā te ia: “Inā mulimuli mai iā te aʻu.”+
44 O Filipo e sau mai Petesaita,+ o le aai lenā o Aneterea ma Peteru.
45 Ua maua e Filipo o Natanielu+ ma fai atu iā te ia: “Ua matou maua o ia o lē na tusia e Mose i le Tulafono+ ma le ʻau Perofeta,+ o Iesu le atalii o Iosefa+ le Nasareta.”
46 A ua fai mai Natanielu iā te ia: “Pe e iai se mea lelei e sau mai i Nasareta?”+ Ua fai atu Filipo: “Sau e vaai.”
47 Ua silasila atu Iesu iā Natanielu o loo sau iā te ia, ona ia fetalai ane lea: “Vaai, o le tagata Isaraelu moni, e lē faaʻoleʻole o ia.”+
48 Ua fai mai Natanielu iā te ia: “E faapefea ona e iloa o aʻu?” Ua tali atu Iesu iā te ia: “Na ou iloa oe i lalo o le mati a o leʻi valaau atu Filipo iā te oe.”
49 Ua tali mai Natanielu: “Le Aʻoaʻo e, o oe o le Alo o le Atua,+ o le Tupu+ o Isaraelu.”
50 Ona tali atu lea o Iesu: “Po ua e talitonu ina ua ou fai atu, na ou iloa oe i lalo o le mati? E sili atu mea o le a e vaaia nai lo o mea nei.”
51 Ona ia fetalai atili atu lea iā te ia: “E moni, e moni, ou te fai atu iā te outou, O le a outou iloa le lagi ua matala mai, ma agelu+ a le Atua ua ō aʻe ma ō ifo i le Atalii o le tagata.”+
Faamatalaga Pito i Lalo
^ Na pau lea o le atalii na faia toʻatasi e le Atua.
^ I le gagana Eleni, “o le atalii e toʻatasi, o ia foʻi o se atua, ma na faia o ia e le Atua.”
^ O se vaega tāua o le lotu Iutaia na iai i le uluaʻi senituri T.A.
^ Pe tusa ma le tā o le 4 i le afiafi.
