Ioane 11:1-57
11 E iai se tagata maʻi e igoa iā Lasalo, i Petania, o le nuu o Maria ma lona uso o Mareta.+
2 O Maria lea sa ia uuina le Alii i le suāuu manogi+ ma solo ona vae i lona lauulu,+ o lona tuagane o Lasalo lea ua maʻi.
3 Ona auina atu lea e ona tuafāfine le tala iā te ia e faapea: “Le Alii e, silasila foʻi, ua maʻi lē ua e alofa faapelepele+ i ai.”
4 Ina ua faafofoga Iesu i le tala, ona ia faapea atu lea: “E lē iʻu lenei maʻi i le oti, ae e iʻu ina faamamaluina ai le Atua,+ ina ia faamamaluina ai le Alo o le Atua i lenei mea.”
5 E alofa Iesu iā Mareta, ma lona uso, ma Lasalo.
6 Ae ina ua ia faafofoga o loo maʻi o ia, ona ia nofo ai pea lea i le mea o loo iai mo aso e lua.
7 Ua mavae lenei mea, ona faapea atu lea o ia i ona soo: “Ō mai tatou toe ō i Iutaia.”
8 Ua faapea mai le ʻausoo iā te ia: “Le Aʻoaʻo e,*+ na faatoʻā uma atu lava ona saʻili tagata Iutaia e fetogi iā te oe,+ ae pe e te toe maliu atu foʻi i ai?”
9 A ua tali atu Iesu: “E sefulu lua itula o le ao, a ea? Afai e savali se tasi i le ao,+ e lē fetoʻai o ia ma se mea, auā o loo vaai o ia i le malamalama o lenei lalolagi.
10 Ae afai e savali se tasi i le pō,+ e fetoʻai o ia ma se mea, auā e lē o iā te ia le malamalama.”
11 Ina ua uma ona fetalai o ia i nei mea, ona ia faapea atu lea iā i latou: “O loo mālōlō la tatou uō o Lasalo, ae ou te alu atu e fafagu iā te ia auā o loo moe.”+
12 Ona tali mai lea o ona soo iā te ia: “Le Alii e, afai o loo mālōlō o ia, e toe malosi.”
13 Ae ua fetalai Iesu e uiga i lona oti. Peitaʻi, ua manatu i latou ua fetalai o ia, o loo moe o ia e mālōlō.
14 I lenā taimi, ua fetalai saʻo atu Iesu iā i latou: “Ua oti Lasalo,+
15 ma ua ou olioli ona o outou, ona ou te leʻi iai i inā, ina ia atili ai ona malosi lo outou faatuatua. Ae seʻi tatou ō atu iā te ia.”
16 Ua fai atu foʻi Toma, o lē ua taʻua o Le Masaga* i ona uso a soo: “Seʻi tatou ō foʻi, ina ia tatou oti faatasi ma ia.”+
17 Mulimuli ane, ua taunuu Iesu, ona ia silafia ai lea ua fā aso talu ona iai o ia i le tuugamau.+
18 E latalata Petania i Ierusalema, pe ā ma le lua maila le va.*
19 E toʻatele tagata Iutaia ua ō mai e faamāfanafana+ iā Mareta ma Maria ona o lo la tuagane.
20 Ua faalogo Mareta ua maliu mai Iesu, ona alu ai lea e faafeiloaʻi o ia, a ua nofo pea Maria+ i le fale.
21 Ona fai mai lea o Mareta iā Iesu: “Le Alii e, ana e iai i inei, semanū e lē oti loʻu tuagane.+
22 Ua ou iloa lava, o mea uma e te talosaga+ atu ai i le Atua, e foaʻi mai lava e le Atua iā te oe.”
23 Ua fetalai atu Iesu iā te ia: “O le a toetū lou tuagane.”+
24 Ua faapea mai Mareta iā te ia: “Ou te iloa e toetū o ia i le toetū+ i le aso mulimuli.”
25 Ona fetalai atu lea o Iesu iā te ia: “O aʻu o le toetū ma le ola.+ O lē e faatuatua mai iā te aʻu, e ui ina oti o ia, ae e toe ola mai lava;+
26 a o ē o loo ola ma faatuatua mai iā te aʻu, e lē oti lava.+ Pe e te talitonu i lenei mea?”
27 Ona fai mai lea o ia iā te ia: “Ioe, le Alii e, ua ou talitonu o oe o le Keriso, o le Alo o le Atua, o Lē ua maliu mai i le lalolagi.”+
28 Ua uma ona ia fai atu lenei mea, ona alu lea ma valaau atu i lona uso o Maria, ua musumusu atu: “Ua oo mai le Aʻoaʻo+ ma o loo fia vaai iā te oe.”
29 Ua faalogo i ai o ia, ona tū loa lea i luga ma alu atu iā te ia.
30 O le mea moni, e leʻi maliu ane lava Iesu i le nuu, ae o loo iai pea o ia i le mea na la feiloaʻi ai ma Mareta.
31 O le mea lea, a o vāai atu tagata Iutaia o loo faatasi ma ia i le fale,+ o ē na ō atu e faamāfanafana iā te ia, ua tū i luga Maria ma alu i fafo, ona latou mulimuli atu lea iā te ia ma le manatu, o loo alu o ia i le tuugamau+ e tagi ai.
32 Ua taunuu Maria i le mea o loo iai Iesu ma iloa mai o ia, ona faapaʻū lea i ona vae, ma faapea mai: “Le Alii e, ana e iai i inei, semanū e lē oti loʻu tuagane.”+
33 Ua silasila atu Iesu, ua tagi o ia faapea ma tagata Iutaia ua ō mai ma ia, ona ōi ai lea ma ua ootia lona finagalo;*+
34 ma ua fesili atu: “O fea ua outou tuu ai o ia?” Ua latou fai mai: “Le Alii e, inā maliu mai ia e silasila i ai.”
35 Ona tagi ai lea o Iesu.+
36 O lea, ua faapea mai tagata Iutaia: “Vaai foʻi i lona alofa faapelepele iā te ia!”+
37 A ua faapea mai nisi: “Pe e lē mafai ea e lenei tagata o lē na ia faapupulaina mata+ o le tauaso, ona taofia le oo o le oti i lenei tagata?”
38 Ua toe ōi foʻi Iesu, ona alu atu lea i le tuugamau.+ O le mea moni, o le tuugamau, o se ana, ma o loo taatia ai se maa.+
39 Ua fetalai atu Iesu: “Ia aveese le maa.”+ A ua fai mai Mareta, le tuafafine o lē ua oti: “Le Alii e, ua tatau ona manogi lona tino, auā o lona fā lenei o aso.”
40 Ua fetalai atu Iesu iā te ia: “Po ou te leʻi fai atu ea iā te oe, afai e te talitonu, e te vaai i le mamalu o le Atua?”+
41 Ona latou aveese ai lea o le maa. Ua tepa aʻe Iesu i le lagi,+ ma faapea atu: “Loʻu Tamā e, ou te faafetai atu iā te oe ona ua e faafofoga mai iā te aʻu.+
42 E moni ua ou iloa, e te faafofoga mai pea iā te aʻu. Ae ona o le motu o tagata+ o loo tutū mai, ua ou tautala atu ai ina ia latou talitonu ua e auina mai aʻu.”+
43 Ua uma ona fetalai o ia i nei mea, ona alaga atu lea ma le leotele: “Lasalo e, inā sau ia i fafo!”+
44 Ona sau ai lea i fafo o le tagata na oti, o loo fusi ona vae ma ona lima i ʻie+ ma o loo fusi foʻi ona foliga i se ʻie. Ua fetalai atu Iesu iā i latou: “Ia tatala o ia ma tuu atu e alu.”
45 O le mea lea, ua faatuatua ai iā te ia le toʻatele o tagata Iutaia na ō mai iā Maria, ma vāai i mea ua ia faia;+
46 ae ua ō atu nisi o i latou ma taʻu atu i le ʻau Faresaio mea na faia e Iesu.+
47 Mulimuli ane, ona faapotopoto faatasi lea e le ʻaufaitaulaga sili ma le ʻau Faresaio o le Faamasinoga Sili,+ ma faapea atu: “O le ā sa tatou mea a fai, auā ua faia e lenei tagata le tele o faailoga?+
48 Afai tatou te tuu ai pea o ia, o le a faatuatua tagata uma iā te ia,+ ona ō mai lea o tagata Roma+ ma aveese o tatou fale*+ ma lo tatou nuu.”
49 A ua faapea mai se tasi tagata o i latou, e igoa iā Kaiafa, o le ositaulaga sili i lenā tausaga:+ “Tou te lē iloa lava se mea,
50 ma tou te lē o manatu foʻi e faapea, e mo lo outou lava lelei le oti+ o le tagata e toʻatasi mo le nuu, ae ia lē faaumatia+ le nuu atoa.”
51 Ae peitaʻi, e lē o ia na pogai ai nei upu; ae ona o ia o le ositaulaga sili i lenā tausaga, ua ia valoia ai o le a maliu Iesu mo le nuu atoa,
52 ma e lē mo na o le nuu, ae ina ia faapotopoto faatasi+ ai le fanau a le Atua o loo taape solo.+
53 Ona amata ai lea i lenā aso, ona latou taupulepule e fasioti iā te ia.+
54 Ua lē toe femaliuaʻi Iesu i luma+ o tagata Iutaia,+ a ua tuua e ia i inā, ae maliu atu i le aai e taʻua o Efaraima+ e latalata i le vao, ma nonofo ai i inā ma ona soo.
55 Ua latalata le paseka+ a tagata Iutaia, ma e toʻatele ua tuua o latou nuu, ae ō atu i Ierusalema ina ia faamamāina+ ai i latou, a o leʻi oo i le paseka.
56 Ona latou ō atu ai lea ma saʻili iā Iesu, ua fai atu le tasi i le isi a o latou tutū i le malumalu: “O le ā so outou manatu? Ailoga ea a sau o ia i le tausamiga?”
57 Ae ua uma ona tuuina atu e le ʻaufaitaulaga sili ma le ʻau Faresaio faatonuga e faapea, afai e iloa e se tasi le mea o iai o ia, e tatau ona faailoa mai, ina ia latou puʻe ai iā te ia.
Faamatalaga Pito i Lalo
^ I le gagana Eleni, o “Rapi” po o se faiaʻoga.
^ Po o “Titumo” e mai i le upu Eleni, Diʹdy·mos.
^ Pe tusa ma le 2.8 kilomita.
^ I le gagana Eleni, ua “ōi lona agaga.”
^ O lona uiga, “o le malumalu.”
