Ioane 13:1-38
13 A o leʻi oo i le tausamiga o le paseka, ua silafia e ia, ua oo+ mai ona aso* e tuua ai lenei lalolagi ae maliu atu i le Tamā.+ Ua alofa Iesu i ona soo i le lalolagi,+ ma ua alofa iā i latou e oo i le gataaga.
2 Ua faia le talisuaga afiafi, ma na tuu e le Tiapolo i le loto o Iuta le Sekara,+ le atalii o Simona, e na te faalataina o ia.+
3 Ua ia silafia ua tuuina mai e le Tamā mea uma i ona aao,+ ma ua maliu mai o ia mai i le Atua, ma e toe maliu atu foʻi o ia i le Atua.+
4 Ua tulaʻi o ia a o faia le talisuaga afiafi, ma tuu ese lona ofu tele. Ua tago i le solo ma fusi ai o ia.+
5 Ina ua māeʻa, ona ia tuu lea o ni vai i le tanoa, ma amata ona mulumulu ai vae+ o ona soo, ua ia soloi i le solo lea sa fusi ai o ia.
6 Ua oo atu o ia iā Simona Peteru. Ona fai mai lea o ia iā te ia: “Le Alii e, e te mulumulu ea i oʻu vae?”+
7 Ua tali atu Iesu iā te ia: “E te lē o malamalama i le mea lea ou te faia i le taimi nei, ae e te malamalama i ai mulimuli ane.”+
8 Ua fai mai Peteru iā te ia: “E te lē mulumulu lava i oʻu vae.” Ua tali atu Iesu: “Afai ou te lē mulumulu iā te oe,+ e leai sou tofi faatasi ma aʻu.”
9 Ua fai mai Simona Peteru iā te ia: “Le Alii e, e lē na o oʻu vae, ae o oʻu lima foʻi ma loʻu ulu.”
10 Ua tali atu Iesu iā te ia: “O lē ua uma ona tāʻele,+ e manaʻomia ona mulumulu tau o ona vae, auā o loo mamā le tino atoa. Ua mamā outou, ae lē o outou uma.”
11 O le mea moni, ua ia silafia le tagata na te faalataina o ia.+ O le mea lea ua ia fetalai ai: “E lē o outou uma e mamā.”
12 Ina ua uma ona ia mulumuluina o latou vae, ona ofu lea o lona ofu tele ma toe taoto e taumafa, ua ia faapea atu iā i latou: “Po ua outou iloa le mea ua ou faia iā te outou?
13 Ua outou taʻua aʻu o le, ‘Aʻoaʻo,’+ ma o le ‘Alii,’+ ua saʻo foʻi outou auā o aʻu lava lenā.+
14 O le mea lea, e ui o aʻu o le Alii, ma o le Aʻoaʻo, a ua ou mulumulu i o outou vae,+ e tatau foʻi la ona outou femulumuluaʻi i o outou vae.+
15 Auā ua ou faia le faaaʻoaʻoga mo outou, o lea, e pei ona ou faia iā te outou, e tatau foʻi ona outou faia faapea.+
16 E moni, e moni, ou te fai atu iā te outou, E lē sili le pologa i lona matai, e lē sili foʻi lē ua auina atu, i lo o lē na te auina atu o ia.+
17 Afai ua outou iloa nei mea, e fiafia outou pe a outou faia.+
18 Ou te lē o fai atu iā te outou uma; auā ua ou iloa o ē ua ou filifilia.+ Ae ina ia taunuu ai Tusitusiga Paia,+ ‘O lē sa masani ona ma aai faatasi, ua aa mai o ia iā te aʻu i lona mulivae.’+
19 Ou te fai atu nei iā te outou a o leʻi taunuu ia mea,+ ina ia outou talitonu ai o aʻu o ia pe a oo mai nei mea.
20 E moni, e moni, ou te fai atu iā te outou, O lē e talia so o se tasi ou te auina atu, ua ia talia aʻu.+ O lē e talia aʻu, ua ia talia foʻi o lē na auina mai aʻu.”+
21 Ua uma ona fetalai o Iesu i nei mea, ona ōi ai lea o lona finagalo,* ua ia molimau ma fetalai atu: “E moni, e moni, ou te fai atu iā te outou, E iai se tasi o outou e na te faalataina aʻu.”+
22 Ona fetilofaʻi lea o le ʻausoo, auā ua latou lē iloa po o ai o loo ia fetalai i ai.+
23 O loo taoto se tasi o ona soo ma faalagolago i le fatafata o Iesu, ma ua alofagia o ia e Iesu.+
24 Ona geno atu lea o Simona Peteru i lenā tagata ma faapea atu iā te ia: “Seʻi fai mai po o ai lea o loo ia fetalai i ai.”
25 Ona toe faalagolago foʻi lea o ia i le fatafata o Iesu ma fai mai iā te ia: “Le Alii e, o ai ea o ia?”+
26 Ona tali atu lea o Iesu: “O lē ou te avatu i ai le fasi falaoa ua ou loloiina.”+ Ona ia loiloi lea o le fasi falaoa ma avatu iā Iuta le atalii o Simona le Sekara.
27 Ua uma ona avatu le fasi falaoa, ona ulu lea o Satani i lenei soo.+ Ona faapea atu lea o Iesu iā te ia: “O le mea ua e manatu e fai, ia vave nei loa ona fai.”
28 Ae peitaʻi, e leai se tasi o i latou ua taooto e aai, e iloa pe aiseā ua ia fetalai atu ai faapea iā te ia.
29 O le mea moni, talu ai o lea e iā Iuta le pusa e teu ai tupe,+ ua manatu ai nisi, o loo fetalai atu Iesu iā te ia: “Ia faatau mai ni mea tatou te manaʻomia mo le tausamiga,” pe e tatau ona ia avatu ni mea i ē e matitiva.+
30 Ua māeʻa ona ia talia le fasi falaoa, ona alu loa lea o ia i fafo, ma ua pō.+
31 Ina ua alu o ia i fafo, ona faapea atu lea o Iesu: “Ua faamamaluina nei le Atalii o le tagata,+ ma ua faamamaluina le Atua ona o ia.
32 E faamamaluina foʻi e le Atua o ia,+ ma na te faamamaluina nei loa o ia.
33 Le fanau e,+ ua lē o toe umi se taimi tatou te faatasi ai. Tou te saʻili mai iā te aʻu, ma e pei ona ou fai atu i tagata Iutaia, ou te fai atu ai nei foʻi iā te outou, ‘E lē mafai ona outou ō mai+ i le mea ou te alu i ai.’
34 Ua ou tuuina atu iā te outou le poloaʻiga fou, ina ia outou alolofa o le tasi i le isi; e pei ona ou alofa atu iā te outou,+ ia outou alolofa foʻi o le tasi i le isi.+
35 O le mea lea e iloa ai e tagata uma o oʻu soo outou, pe afai ua outou alolofa o le tasi i le isi.”+
36 Ona fai mai lea o Simona Peteru iā te ia: “Le Alii e, o fea a e maliu i ai?” Ua tali atu Iesu: “O le mea ou te alu i ai, e lē mafai ona e mulimuli mai ai nei iā te aʻu, ae e mulimuli ane e te alu atu i ai.”+
37 Ua fai mai Peteru iā te ia: “Le Alii e, aiseā e lē mafai ai nei ona ou mulimuli atu iā te oe? Ou te tuuina atu loʻu ola ona o oe.”+
38 Ua tali atu Iesu: “E te tuuina atu ea lou ola ona o aʻu? E moni, e moni, ou te fai atu iā te oe, A o leʻi vivini le moa, a ua faatolu ona e faafiti iā te aʻu.”+
