Ioane 16:1-33
16 “Ua ou tautala atu i nei mea iā te outou, ina neʻi paʻuʻū outou i le agasala.+
2 E tuliesea outou e tagata mai i le sunako.+ O le mea moni, e oo mai le aso e manatu ai so o se tasi na fasiotia outou, ua ia faia se auaunaga paia i le Atua.+
3 A ua latou faia nei mea, auā latou te leʻi iloa le Tamā po o aʻu foʻi.+
4 Ae peitaʻi, ua ou fai atu nei mea iā te outou, ina ia outou manatua ai, na ou taʻu atu nei mea iā te outou, pe a oo ina taunuu.+
“Ae ou te leʻi taʻuina atu muamua nei mea iā te outou, auā sa ou faatasi pea ma outou.
5 A o lenei, ou te alu atu iā te ia na auina mai aʻu,+ ae e leʻi fesili mai se tasi o outou iā te aʻu, ‘O fea a e alu i ai?’
6 Ae ona ua ou taʻu atu nei mea iā te outou, ua mafatia+ ai o outou loto.
7 Ae ui i lea, ou te taʻu atu iā te outou le mea moni, E aogā iā te outou loʻu alu ese. Auā afai ou te lē alu ese, e lē oo mai le fesoasoani+ iā te outou. Ae afai ou te alu ese, ona ou auina mai lea o ia iā te outou.
8 Pe a oo mai lea fesoasoani, o le a ia avatu se faamaoniga manino i le lalolagi e faatatau i le agasala, le amiotonu, ma le faamasinoga,+
9 e muamua lava e faatatau i le agasala,+ auā ua latou lē faatuatua mai iā te aʻu;+
10 ma e faatatau i le amiotonu,+ auā ou te alu atu i le Tamā, ma tou te lē toe vāai mai iā te aʻu;
11 e faatatau foʻi i le faamasinoga,+ auā ua faamasinoina le pule o lenei lalolagi.+
12 “E tele mea ou te fia taʻu atu iā te outou, ae e lē mafai ona outou malamalama i na mea uma i le taimi nei.+
13 Ae peitaʻi, pe a oo mai lenā fesoasoani, o le agaga lea o le upu moni,+ ona ia taʻitaʻi lea iā te outou i upu moni uma. Auā e lē tautala fua o ia, ae o mea ua ia faalogo i ai e tautala ai o ia, e taʻu atu foʻi e ia iā te outou mea e oo mai.+
14 E faamamaluina aʻu e ia,+ auā e maua e ia mea ua ia faalogo ai mai iā te aʻu, ma taʻu atu iā te outou.+
15 O mea uma o i loʻu Tamā, o aʻu mea ia.+ O le mea lea ua ou fai atu ai, e maua e ia mea mai iā te aʻu ma faailoa atu iā te outou.
16 E toeitiiti ona outou lē toe vāai mai lea iā te aʻu,+ ae e toeitiiti foʻi ona outou vāai mai lea iā te aʻu.”
17 Ona talatalanoa lea o nisi o ona soo ua faapea ane: “O le ā le uiga o nei upu ua ia fetalai mai ai iā i tatou, ‘E toeitiiti ona outou lē toe vāai mai lea iā te aʻu, ae e toeitiiti foʻi ona outou vāai mai lea iā te aʻu,’ ma ‘ou te alu i le Tamā’?”
18 Ona latou faapea ane lea: “O le ā le uiga o lana fetalaiga, ‘e toeitiiti’? E tatou te lē malamalama i le mea o loo ia fetalai i ai.”
19 Ua silafia+ e Iesu ua latou mananaʻo e fesili atu iā te ia, ona ia faapea atu lea iā i latou: “Aiseā ua outou tuufesili ai iā te outou lava i lenei mea, pe ona ua ou fai atu, E toeitiiti ona outou lē toe vāai mai lea iā te aʻu, ae e toeitiiti foʻi ona outou vāai mai lea iā te aʻu?
20 E moni, e moni, ou te fai atu iā te outou, E tou te fetagisi ma tagituʻi, ae e olioli le lalolagi. E tou te matuā tigā+ lava, ae e liua lo outou tigā i le olioli.+
21 Pe a fanau se fafine, e tigā o ia, auā ua oo mai lona taimi e fanau ai;+ ae a fanau mai e ia lana tama, e lē toe manatua lona tigā, auā ua ia olioli ina ua fanau mai se tagata i le lalolagi.
22 O lea la, e moni ua outou tigā nei foʻi; ae e tatou te toe feiloaʻi ma e olioli foʻi o outou loto,+ ma e lē mafai e se tasi ona aveesea lo outou olioli.
23 I lea aso,+ tou te lē toe fesili mai ai lava iā te aʻu i se mea. E moni, e moni, ou te fai atu iā te outou, Afai e tou te talosaga atu i le Tamā i se mea,+ e na te foaʻi mai iā te outou i loʻu igoa.+
24 E oo mai lava i le taimi nei, e leʻi talosaga atu outou i se mea e tasi i loʻu igoa. A ia talosaga atu, ona outou maua ai lea, ina ia faaatoatoaina ai lo outou olioli.+
25 “Ua ou tautala atu iā te outou i nei mea i talafaatusa.+ Ae e oo mai le aso, ou te lē toe tautala atu ai iā te outou i talafaatusa, ae ou te tautala saʻo atu iā te outou e uiga i le Tamā.
26 I lenā aso, tou te talosaga atu ai i loʻu igoa, ma ou te lē fai atu iā te outou, ou te talosaga atu i le Tamā e faatatau iā te outou.
27 Auā e alofa faapelepele le Tamā iā te outou, ona ua outou alolofa faapelepele mai iā te aʻu,+ ma talitonu ua ou sau e fai ma sui o le Tamā.+
28 Ua ou sau mai i le Tamā ma ua ou oo mai i le lalolagi. Ou te tuua foʻi le lalolagi ma ou alu atu i le Tamā.”+
29 Ua fai mai ona soo: “Tagaʻi foʻi! O lea ua e fetalai saʻo mai ma e te lē o fetalai mai i ni talafaatusa.
30 O lea ua matou iloa nei, e te silafia mea uma+ ma e lē tatau ona suʻesuʻevale se tasi iā te oe.+ O le mea lea ua matou talitonu ai, ua e maliu mai i le Atua.”+
31 Ua tali atu Iesu iā i latou: “Po ua outou talitonu mai nei ea?
32 Faauta! E oo mai le itula ma ua oo mai lava, e taʻitasi outou ma sola i lona lava aiga,+ ae tuua na o aʻu. Peitaʻi, e lē na o aʻu auā o loo ma faatasi ma le Tamā.+
33 Ua ou fai atu nei mea iā te outou, ina ia outou maua le filemu iā te aʻu.+ Ua puapuagatia outou i le lalolagi, ae ia lototetele! Ua ou manumalo i le lalolagi.”+
