Ioane 18:1-40
18 Ua fetalai atu o ia i nei mea, ona maliu atu lea o Iesu ma ona soo i le isi itu o le alia o Ketarono,+ i le mea o iai le togālaau, ona ō atu lea i iai o ia ma ona soo.+
2 Ua iloa foʻi lea nofoaga e Iuta, o lē na te faalataina o ia, auā e tele taimi na feiloaʻi ai Iesu ma ona soo i inā.+
3 Ona ave ai lea e Iuta o le ʻaufitafita ma leoleo a le ʻaufaitaulaga sili ma le ʻau Faresaio, ua ō atu i inā ma sulu, o molī, ma auupega.+
4 Ua silafia e Iesu mea uma e oo iā te ia,+ ona ia maliu atu lea ma faapea atu iā i latou: “O ai o loo outou saʻilia?”
5 Ua latou tali mai iā te ia: “O Iesu le Nasareta.”+ Ona ia fetalai atu lea iā i latou: “O aʻu lenei o ia.” A o loo tū ai foʻi ma Iuta, o lē na te faalataina+ o ia.
6 Ae ina ua ia faapea atu iā i latou: “O aʻu lenei,” ona latou solomuli+ lea ma ua paʻuʻū i le eleele.
7 O lea, ua ia toe fesili atu ai foʻi iā i latou: “O ai o loo outou saʻilia?” Ona latou faapea mai lea: “O Iesu le Nasareta.”
8 Ua tali atu Iesu: “Na ou fai atu, o aʻu lenei. Afai o aʻu lea o loo outou saʻilia, ia tuu atu i latou nei e ō”;
9 ina ia taunuu ai le upu na ia fetalai ai: “O i latou na e foaʻiina mai iā te aʻu, e leʻi iai lava se tasi ua leiloa.”+
10 O Simona Peteru foʻi, ua iai le pelu, ua seʻi e ia ma tā ai le pologa a le ositaulaga sili, ma ua tipiesea ai lona taliga taumatau.+ O le igoa o le pologa, o Maliko.
11 A ua fetalai atu Iesu iā Peteru: “Ia sulu le pelu i lona faamoega.+ Pe e lē tatau ea ona ou inu i le ipu ua tuuina mai e le Tamā iā te aʻu?”+
12 Ona puʻe lea o Iesu e le ʻaufitafita ma le alii e pule i ʻau, ma leoleo o tagata Iutaia ma saisai o ia,
13 ona latou avatu muamua lea o ia iā Ana, o ia o le tamā o le avā a Kaiafa, o lē ua avea ma ositaulaga sili i lenā tausaga.+
14 O Kaiafa, o ia lea na fautuaina tagata Iutaia e faapea, e aogā ona oti o le tagata e toʻatasi mo le nuu.+
15 Ona mulimuli atu lea o Simona Peteru ma le isi soo iā Iesu.+ O le soo lenā e masani ai le ositaulaga sili, ua ulu atu o ia faatasi ma Iesu i le lotoā o le ositaulaga sili,
16 ae o loo tū Peteru i fafo o le faitotoʻa.+ Ona alu atu lea o le isi soo, lea e masani ai le ositaulaga sili, ua talanoa atu i le leoleo faitotoʻa ona aumai ai lea o Peteru i totonu.
17 Ua fai atu le auauna teine, o ia foʻi o le leoleo faitotoʻa, iā Peteru: “Po o oe o se soo o lenā tagata?” Ua ia fai mai: “E leai.”+
18 O loo tutū ai i inā pologa ma leoleo, o loo tafu se afi malala, auā ua mālūlū+ ma o loo faamāfanafana ai i latou. O loo tū ai foʻi ma Peteru faatasi ma i latou o loo faamāfanafana i le afi.
19 Ona fesili mai lea o le faitaulaga sili iā Iesu e uiga i ona soo ma ana aʻoaʻoga.
20 Ua tali atu Iesu iā te ia: “Ua ou tautala atu i luma o tagata i le lalolagi. E masani foʻi ona ou aʻoaʻo atu i sunako ma i le malumalu,+ o i inā e ō mai uma i ai tagata Iutaia; ma ou te leʻi tautala faalilolilo foʻi i se mea.
21 Aiseā ua outou fesili mai ai iā te aʻu? Fesili atu iā i latou o ē na faalogo i mea na ou tautala atu ai iā i latou. Tagaʻi foʻi! Ua iloa e i latou nei le mea na ou fai atu ai.”
22 Ua uma ona fetalai atu o ia i nei mea, ona pō+ lea o fofoga o Iesu e se leoleo o lē na tū ai i inā, ma fai mai: “E te tautala ea faapena i le faitaulaga sili?”
23 Ua tali atu Iesu iā te ia: “Afai ua sesē saʻu upu, ia taʻu mai le mea ua sesē ai, ae afai ua saʻo, aiseā la ua e pō mai ai iā te aʻu?”
24 Ona auina ese atu lea o ia e Ana a o saisai o ia, iā Kaiafa le ositaulaga sili.+
25 O le taimi lea o loo tū Simona Peteru ma faamāfanafana i le afi. Ua latou faapea atu iā te ia: “Pe lē o oe ea o se tasi o ona soo?” Ua faafiti o ia ma faapea mai: “E leai.”+
26 Ona fai atu lea o se tasi o pologa a le ositaulaga sili, e aiga o ia ma le tagata na tipi ese e Peteru le taliga:+ “Po ou te leʻi vaai ea iā te oe o faatasi ma ia i le togālaau?”
27 Ae ua toe faafiti foʻi Peteru, ona vivini loa lea o le moa.+
28 Ona latou ave lea o Iesu mai iā Kaiafa i le maota o le kovana.+ O le taeaopō lea. Ae e leʻi ulu atu i latou i le maota o le kovana, neʻi lē mamā+ i latou ma lē mafai ai ona aai i le paseka.
29 Ona sau lea i fafo o Pilato iā i latou ma faapea atu: “O le ā se mea ua outou molia ai lenei tagata?”+
30 Ua latou tali mai iā te ia: “Ana lē faia e lenei tagata se mea sesē, semanū matou te lē molia mai o ia iā te oe.”
31 Ona fai atu lea o Pilato iā i latou: “Ia outou ave o ia ma faamasino e tusa ma la outou tulafono.”+ Ua tali ane tagata Iutaia: “E sā i le tulafono ona matou fasiotia se tasi.”+
32 Ua faia lenei mea, ina ia taunuu ai le fetalaiga a Iesu lea na fai mai, e faailoa ai le auala e maliu ai o ia.+
33 Ona toe ulu atu lea o Pilato i le maota o le kovana ua valaau iā Iesu ma faapea mai: “Po o oe ea o le tupu o tagata Iutaia?”+
34 Ua tali atu Iesu: “Po o ou lava manatu ua e fai mai ai, pe na taʻua aʻu e nisi iā te oe?”+
35 Ua tali mai Pilato: “O aʻu ea o se Iutaia? O lou lava nuu ma le ʻaufaitaulaga sili ua latou aumaia oe iā te aʻu.+ O le ā se mea ua e faia?”
36 Ona tali atu lea o Iesu:+ “O loʻu malo e lē mai le lalolagi lenei.+ Ana mai le lalolagi nei loʻu malo, semanū ua tau+ aʻu auauna, ina neʻi tuuina atu aʻu i tagata Iutaia. A o lenei, e lē mai i inei loʻu malo.”
37 Ona fai mai lea o Pilato iā te ia: “Po o oe ea o se tupu?” A ua tali atu Iesu: “O lenā tonu lava ua e fai mai ai o aʻu o le tupu.+ O le mea lea na ou fanau mai ai, o le mea foʻi lea na ou sau ai i le lalolagi, ina ia ou molimau i le upu moni.+ O i latou uma e fiafia i le upu moni+ e faalogo i loʻu leo.”+
38 Ua fai mai Pilato iā te ia: “O le ā le upu moni?”
Ua fai mai lea upu, ona alu lea o ia i fafo i tagata Iutaia, ma fai atu iā i latou: “Ou te lē iloa se mea sesē ua ia faia.+
39 O loo iai la outou tū e faasaʻoloto ai se tagata iā te outou i le aso o le paseka.+ Pe tou te mananaʻo la ou te faasaʻolotoina le tupu o tagata Iutaia?”
40 Ona latou toe alalaga atu lea ma faapea atu: “E leai, e lē o le tagata lenā, a o Parapa!” Peitaʻi ane, o Parapa, o se tagata faomea.+
