Ioane 2:1-25
2 Ua oo i le aso lona tolu, ona faia lea o le ʻaiga o se faaipoipoga i Kana+ i Kalilaia, ma sa iai i inā le tinā+ o Iesu.
2 Sa valaaulia foʻi Iesu ma ona soo i le ʻaiga o le faaipoipoga.
3 Ua lē lava le uaina, ona faapea mai lea o le tinā+ o Iesu iā te ia: “Ua leai sa latou uaina.”
4 Ona fetalai atu lea o Iesu iā te ia: “Le fafine e, o le ā laʻu mea e fai i ai?*+ E leʻi oo i loʻu itula.”+
5 Ua fai atu lona tinā i le ʻautautua: “O le ā lava le mea e fai mai ai o ia, ia outou faia.”+
6 Na tutū ai i le taimi lenā ni faguvai* tetele se ono,* e tusa ai ma tulafono o le faamamāina+ o tagata Iutaia.
7 Ua fetalai atu Iesu iā i latou: “Ia faatutumu faguvai i vai.” Ua latou faatutumuina ua oo i gutu o fagu.
8 Ua ia fetalai atu iā i latou: “Ia asu aʻe ma avatu i le pule o le ʻaiga.” Ona latou avatu lea.
9 Ina ua tofo le pule o le ʻaiga i le vai lea ua liua i le uaina,+ e leʻi iloa e ia po o fea na aumai ai, peitaʻi ua iloa e le ʻautautua o ē na asuina aʻe le vai. Ua valaau atu le pule o le ʻaiga i le alii faaipoipo
10 ma faapea atu iā te ia: “E muamua ona aumai e tagata le uaina lelei,+ ae pe a onanā, ona aumaia ai lea o le uaina leaga. A ua e taofia le uaina lelei e oo mai i le taimi nei.”
11 Na faia e Iesu lenei mea i Kana i Kalilaia, o le amataga lea o ana faailoga, ua faailoa atu ai lona mamalu;+ ma ua faatuatua ai ona soo iā te ia.
12 Ina ua uma, ona latou ō ai lea ma lona tinā, ma ona uso,+ ma ona soo i Kapanaumi,+ ae e leʻi tele ni aso na nonofo ai i inā.
13 Ua latalata le paseka+ a tagata Iutaia, ma ua maliu aʻe Iesu i Ierusalema.+
14 Ua ia silafia i le malumalu o ē e faatau povi, o mamoe, o lupe,+ ma tagata faatau tupe o loo nonofo mai ai.
15 Ona ia faia lea o se sasa i maea, ma tutuliese ai tagata ma a latou mamoe ma povi mai i le malumalu. Ua ia sasaa foʻi tupe a tagata suitupe ma fuli a latou laulau.+
16 Ona ia faapea atu lea iā i latou o ē e faatau lupe: “Aveese ia nei mea mai i inei! Aua neʻi toe faia le fale+ o loʻu Tamā ma fale faatauʻoa!”+
17 Ua manatua ai e ona soo upu ua tusia: “Ua ʻaina lava aʻu i le maelega i lou fale.”+
18 Ona tali mai ai lea o tagata Iutaia iā te ia, e faapea: “O le ā se faailoga+ e te faaali mai iā i matou, ona o mea ua e faia?”
19 Ona tali atu lea o Iesu iā i latou: “Ia talepe i lalo lenei malumalu,+ ona ou toe faatūina lea i aso e tolu.”
20 Ua faapea ane tagata Iutaia: “Na fausia lenei malumalu i tausaga e fā sefulu ono, ma pe e te toe faatūina ea i aso e tolu?”
21 Peitaʻi, na fetalai o ia e faatatau i le malumalu+ o lona tino.
22 Ae ina ua faatūina aʻe o ia mai i le oti, ona manatua+ ai lea e ona soo o upu ia sa masani ona ia fetalai i ai; ma ua latou talitonu ai i Tusitusiga Paia ma upu na fetalai ai Iesu.
23 Peitaʻi, a o iai o ia i Ierusalema i le tausamiga o le paseka,+ ua faatuatua le toʻatele o tagata i lona suafa,+ ina ua latou vāai i faailoga na ia faia.+
24 Ae e leʻi faatuatuaina+ e Iesu i latou, auā ua ia silafia i latou uma
25 ma talu ai ua ia silafia loto o tagata, e na te leʻi manaʻomia ai se tasi e molimau e uiga i le tagata.+
Faamatalaga Pito i Lalo
^ I le gagana Eleni, “Le fafine e, aiseā ua e faalavelave mai ai iā te aʻu?” O lenei fesili, na faaalia ai le tetee o Iesu i le manatu o lona tinā.
^ Po o fagu ʻele e utu ai vai.
^ O le faguvai e tasi, e pe tusa e 12 i le 17 kalone vai e tumu ai (e 44 lita i le 66 lita).
