Ioane 6:1-71
6 Ua mavae nei mea, ona maliu atu lea o Iesu i le isi itu o le sami* o Kalilaia, po o Tiperia.+
2 Ua mulimuli atu pea le motu o tagata e toʻatele iā te ia, auā ua latou vāai i faailoga na ia faia i ē na mamaʻi.+
3 Ua maliu aʻe Iesu i le mauga,+ ma ua nonofo ai i inā ma ona soo.
4 Ua latalata le paseka,+ o le tausamiga lea a tagata Iutaia.
5 Ona tepa aʻe lea o Iesu ma iloa ai le motu o tagata e toʻatele ua ō mai iā te ia, ona ia fetalai atu lea iā Filipo: “O fea tatou te faatau mai ai ni falaoa e aai ai i latou nei?”+
6 Ae ua ia faapea atu i nei upu ina ia tofotofo ai o ia, auā ua ia silafia le mea e na te faia.
7 Ua tali mai Filipo iā te ia: “E lē lava le lua selau tenari e faatau ai ni falaoa mo i latou, ina ia tofu le tagata ma sina mea.”+
8 Ona faapea mai lea o se tasi o le ʻausoo, o Aneterea le uso o Simona Peteru iā te ia:
9 “O loo i inei le tamaitiiti e iai ana falaoa karite*+ e lima ma tamaʻi iʻa e lua. Ae pe e lava ai le toʻatele i nei mea?”+
10 Ua faapea atu Iesu: “Ia fai ane i tamāloloa e taooto mo le taumafataga.”+ E tele foʻi le mutia i inā, o lea ua taooto ai tamāloloa pe tusa ma le lima afe.+
11 Ona tago lea o Iesu i falaoa ma fai le faafetai, ona tufatufa atu lea i ē ua taooto e aai. Ua faapena foʻi i tamaʻi iʻa, ua avatu e faitalia i latou.+
12 Ina ua maoona+ i latou, ona ia fetalai atu lea i ona soo: “Ia aoao mai mea ua totoe, ina ia aua neʻi maʻimau se mea.”
13 Ona latou aoaoina lea, ma ua tutumu ai ato e sefulu lua mai i falaoa karite e lima, o mea na totoe a tagata na aai.+
14 Ua vāai atu tamāloloa i faailoga na ia faia, ona faapea ane lea: “E moni lava o le perofeta+ lenei na valoia e sau i le lalolagi.”
15 Ua silafia e Iesu o le a ō mai i latou e puʻe iā te ia e fai ma tupu, ona maliu ese+ ai lea na o ia i le mauga.
16 Ua oo i le afiafi, ona ō ifo lea o ona soo i le sami,+
17 ma feosofi i le vaa, ua folau atu i le isi itu o le sami i Kapanaumi. Ua pogisa, ae e leʻi oo atu lava Iesu iā i latou.
18 Ua amata ona sou le sami ina ua agi mai se matagi malosi.+
19 Ae peitaʻi, a o latou alo atu e tusa ma le tolu i le fā maila,* ona latou iloa ai lea o Iesu o loo savali i luga o le sami ma ua latalata atu i le vaa; ona fefefe ai lea o i latou.+
20 A ua fetalai atu o ia iā i latou: “Aua tou te fefefe, o aʻu lenei!”+
21 Ua fiafia i latou ina ua alu atu o ia i le vaa, ma ua alu atu saʻo loa le vaa i uta i le mea o loo latou taumafai e ō i ai.+
22 I le aso na sosoo ai, ua iloa atu ai e le motu o tagata ua tutū i le isi itu o le sami, ua leai se vaa i inā ae e na o se tamaʻi vaa. Ua latou iloa foʻi e leʻi alu atu Iesu i le vaa ua na o ona soo.
23 Ua taunuu ane vaa mai i Tiperia, e lata i le mea na latou aai ai i falaoa, ina ua uma ona fai e le Alii le faafetai.
24 Ua iloa e le motu o tagata e lē o iai Iesu po o ona soo, ona latou faaee lea o o latou tamaʻi vaa ma ō atu i Kapanaumi e suʻe+ Iesu.
25 Ina ua latou maua o ia i le isi itu o le sami, ona latou fai mai lea iā te ia: “Le Aʻoaʻo e,*+ o anafea na e maliu mai ai i inei?”
26 Ona tali atu lea o Iesu: “E moni, e moni, ou te fai atu iā te outou, Ua outou saʻilia aʻu ona sa outou aai i falaoa ma maoona ai, ae e lē ona o faailoga na outou vāai i ai.+
27 Aua tou te galulue mo meaʻai e pala,+ a o le meaʻai e tumau ai i le ola e faavavau,+ lea e tuuina atu e le Atalii o le tagata iā te outou; auā o ia lenei ua faamaonia e le Atua le Tamā.”+
28 Ona latou fai mai lea iā te ia: “O le ā se mea matou te faia ina ia faia ai galuega a le Atua?”
29 Ua tali atu Iesu iā i latou: “O le galuega lenei a le Atua, ia outou faatuatua+ i lē ua auina mai e Ia.”+
30 Ua latou faapea mai: “O le ā se faailoga+ e te faia ina ia matou vāai i ai ma talitonu ai iā te oe? O le ā le galuega o e faia?
31 Na aai o matou augātamā i le manai+ i le toafa, e pei ona tusia, ‘Ua ia avatu iā i latou le falaoa mai i le lagi e aai ai.’”+
32 Ona fetalai atu lea o Iesu iā i latou: “E moni, e moni, ou te fai atu iā te outou, E leʻi avatua e Mose iā te outou le areto mai i le lagi, a ua avatu e loʻu Tamā le areto moni mai i le lagi.+
33 Auā o le areto mai i le Atua, o ia lea ua alu ifo mai i le lagi ma foaʻi atu le ola i le lalolagi.”
34 Ona latou fai mai lea iā te ia: “Le Alii e, ia e foaʻi mai pea lenā areto iā i matou.”+
35 Ua fetalai atu Iesu iā i latou: “O aʻu o le areto o le ola. O lē e sau iā te aʻu, e lē toe fia ʻai lava o ia, ma o lē e faatuatua mai iā te aʻu, e lē toe fia inu lava o ia.+
36 Ua ou fai atu iā te outou, Ua outou vāai mai iā te aʻu ae tou te lē talitonu lava.+
37 O i latou uma ua foaʻi mai e le Tamā iā te aʻu, e ō mai iā te aʻu, ma o lē e sau iā te aʻu, ou te lē tuliesea lava o ia;+
38 auā na ou sau mai i le lagi+ e fai le finagalo o lē na auina mai aʻu, ae e lē o loʻu loto.+
39 O le finagalo lenei o lē na auina mai aʻu, ia lē maʻimau se tasi ua ia foaʻi mai iā te aʻu, ae ou toe faatūina+ o ia i le aso mulimuli.
40 Auā o le finagalo lenei o loʻu Tamā, o i latou uma e iloa le Atalii ma faatuatua iā te ia, e ao ona maua le ola e faavavau,+ ma ou te toe faatūina o ia i le aso mulimuli.”+
41 Ua tomumumu tagata Iutaia ona o lana fetalaiga: “O aʻu o le areto na alu ifo mai i le lagi”;+
42 ma ua latou faapea ane:+ “Pe e lē o Iesu ea lea o le atalii o Iosefa,+ o lē ua tatou iloa lona tamā ma lona tinā? E faapefea ona ia fai mai, ‘Ua ou sau mai i le lagi’?”
43 Ua tali atu Iesu iā i latou: “Soia tou te tomumumu.
44 E lē mafai ona sau o se tagata iā te aʻu pe a lē tosina mai o ia e le Tamā o lē na auina mai aʻu;+ ma ou te toe faatūina o ia i le aso mulimuli.+
45 Ua tusia e le ʻau Perofeta, ‘E aʻoaʻoina i latou uma e Ieova.’+ O i latou uma ua faalogo ma aʻoaʻoina e le Tamā, e ō mai iā te aʻu.+
46 E leai se tagata ua vaai i le Tamā,+ na o lē ua auina mai e le Atua; o ia lea ua vaai i le Tamā.+
47 E moni, e moni, ou te fai atu iā te outou, O lē e talitonu iā te aʻu, e ola o ia e faavavau.+
48 “O aʻu o le areto+ o le ola.
49 Na aai o outou tamā i le manai+ i le toafa, a ua feoti i latou.
50 O le areto lenei ua alu ifo mai i le lagi, ma e lē oti le tagata e ʻai ai.
51 O aʻu o le areto ola na sau mai i le lagi; pe a ʻai ai se tasi i lenei areto, o le a ola o ia e faavavau. O le areto ou te avatu, o loʻu tino+ lea e fai ma sui o ola o le lalolagi.”+
52 Ua fefinauaʻi tagata Iutaia ma faapea ane: “E faapefea ona aumai e lenei tagata lona tino tatou te aai ai?”
53 Ona fetalai atu lea o Iesu iā i latou: “E moni, e moni, ou te fai atu iā te outou, Pe afai tou te lē aai i le tino+ o le Atalii o le tagata, ma inu i lona toto,+ e lē i totonu iā te outou le ola.+
54 O lē e ʻai i loʻu tino ma inu i loʻu toto, e maua e ia le ola e faavavau, ma ou te toe faatūina+ o ia i le aso mulimuli;
55 auā o loʻu tino o le meaʻai moni lea, ma o loʻu toto o le meainu moni lea.
56 O lē e ʻai i loʻu tino ma inu i loʻu toto e tumau ona autasi ma aʻu, o aʻu foʻi ma ia.+
57 E pei ona soifua+ o le Tamā o lē na auina mai aʻu, ua ou ola foʻi ona o le Tamā, o lē foʻi e ʻai i loʻu tino, e ola o ia ona o aʻu.+
58 O le areto lenei ua alu ifo mai i le lagi. E lē pei o le taimi na aai ai o outou tamā ma feoti. Ae o lē e ʻai i lenei areto, e ola o ia e faavavau.”+
59 Ua fetalai o ia i nei mea, a o ia aʻoaʻo atu i tagata o loo potopoto i Kapanaumi.
60 Ina ua faalogo le toʻatele o le ʻausoo i lenei mea, ona faapea ane lea: “E mataʻutia nei upu; o ai se isi e fia faalogo i ai?”+
61 Ua silafia e Iesu ua tomumumu ona soo e uiga i lenei mea, ona ia fetalai atu lea: “Po ua outou tausuai+ ea i lenei mea?
62 Ae e faapefea pe a outou vāai atu, ua alu aʻe le Atalii o le tagata i le mea na iai muamua?+
63 O le agaga lea e maua ai le ola;+ ae e lē aogā le tino. O upu ua ou fai atu ai iā te outou, o le agaga+ lea ma le ola.+
64 Ae e lē talitonu nisi o outou.” Auā na silafia e Iesu mai i le amataga ē e lē talitonu, ma lē e faalataina o ia.+
65 O lea ua ia toe fetalai atu ai: “O le mea lenei na ou fai atu ai iā te outou, E leai se tasi e mafai ona sau iā te aʻu, pe a lē finagalo i ai le Tamā.”+
66 Ona o lea, ua toe foʻi ai le toʻatele o ona soo i mea na latou tuua,+ ma lē toe savavali ai ma ia.+
67 Ona faapea atu lea o Iesu i le toʻasefulu lua: “Po ua outou fia ō foʻi ma outou?”
68 Ua tali mai Simona Peteru+ iā te ia: “Le Alii e, o ai a matou ō i ai?+ Ua iā te oe upu o le ola e faavavau.+
69 Ua matou talitonu ma matou iloa o oe o Lē e Paia a le Atua.”+
70 Ua tali atu Iesu iā i latou: “Po ou te leʻi filifilia ea outou e toʻasefulu lua?+ Ae o le tasi o outou ua faitala taufaaleaga.”+
71 O le mea moni, o loo fetalai o ia e uiga iā Iuta, le atalii o Simona le Sekara, auā o ia lenei e na te faalataina+ o ia, e ui o ia o se tasi o le toʻasefulu lua.
Faamatalaga Pito i Lalo
^ O lenei sami, o se vaituloto telē. O nisi taimi e taʻua o le vai o Kalilaia.
^ O le “karite” o se isi ituaiga saito. O le upu Peretania o le barley.
^ Tagaʻi i le Faaopoopoga e 14.
^ I le gagana Eleni, o “Rapi” po o se faiaʻoga.
