Ioane 7:1-53
7 Ua mavae nei mea, ona femaliuaʻi pea lea o Iesu i Kalilaia, auā e leʻi manaʻo o ia e femaliuaʻi i Iutaia, ona ua lamalama tagata Iutaia e fasioti+ iā te ia.
2 Peitaʻi, ua latalata i le tausamiga a tagata Iutaia, o le tausamiga lea o faleapitaga.+
3 Ona fai mai lea o ona uso+ iā te ia: “Ia e tuua lenei mea ae alu atu i Iutaia, ina ia vāai ai foʻi ou soo i galuega ua e faia.
4 Auā e leai se tasi na te faia faalilolilo se mea, pe a fia lauiloa o ia. Afai e te faia nei mea, ia faailoa atu oe i le lalolagi.”
5 O le mea moni, e leʻi faatuatua ona uso+ iā te ia.+
6 Ona fetalai atu lea o Iesu iā i latou: “E leʻi oo mai oʻu aso,+ a o outou, e pule outou i le aso tou te ō ai.
7 E leai se mea e ʻinoʻino ai fua le lalolagi iā te outou, a ua ʻinoʻino mai iā te aʻu, auā ua ou molimau i ana galuega leaga.+
8 Ia outou ō i le tausamiga; ou te lē alu i le tausamiga auā e leʻi oo+ i oʻu aso.”+
9 Ina ua uma ona ia taʻu atu o nei mea iā i latou, ona nofo ai pea lea o ia i Kalilaia.
10 Peitaʻi, ina ua ō ona uso i le tausamiga, ona ia maliu faalilolilo atu lea, e lē iloa e tagata.+
11 A ua saʻili+ tagata Iutaia iā te ia i le tausamiga ma faapea ane: “O fea o iai lenā tagata?”
12 Ua talanoa taumusumusu le motu o tagata e faatatau iā te ia.+ Ua faapea mai isi: “O ia o se tagata lelei.” A ua fai mai isi: “E leai, auā ua ia faasesēina le motu o tagata.”
13 A ua leai se tasi ua fai atu se tala e ʻau ai iā te ia, ona o le fefefe i tagata Iutaia.+
14 Pe tusa o le aso lona fā o le tausamiga, ona maliu atu lea o Iesu i le malumalu ma aʻoaʻo atu i tagata.+
15 O lea, ua taumānatu ai tagata Iutaia ma faapea ane: “E faapefea ona poto lenei tagata i tusi+ ae e leʻi lelei ni ana aʻoga?”+
16 Ona tali atu lea o Iesu ma fetalai atu: “O mea ua ou aʻoaʻoina atu, e lē o ni oʻu manatu, a o manatu o lē na auina mai aʻu.+
17 Afai e naunau se tasi e fai Lona finagalo, e iloa ai e ia pe e mai i le Atua+ le aʻoaʻoga, po o soʻu lava manatu.
18 O lē e tautala e tusa ma ona lava manatu, o loo saʻili e ia lona lava viiga.+ Peitaʻi, o lē e saʻili le viiga o lē na auina mai o ia, e faamaoni ma e amiotonu lava o ia.
19 Pe e leʻi tuuina atu ea e Mose le Tulafono+ iā te outou? Ae e leai se tasi o outou e usiusitaʻi i le Tulafono. Aiseā ua outou lamalama ai e fasioti iā te aʻu?”+
20 A ua tali mai le motu o tagata e faapea: “Ua uluitinoina oe e se temoni.+ O ai o loo lamalama e fasioti iā te oe?”
21 Ua tali atu Iesu iā i latou: “E tasi le galuega na ou faia,+ a ua outou ofo uma ai.
22 O le mea lea na tuuina atu ai e Mose le peritome*+ iā te outou. Peitaʻi, e lē mai iā Mose, ae e mai i outou augātamā,+ ma ua outou peritomeina tagata i le sapati.
23 Afai e peritome se tagata i le sapati ina ia lē solia ai le tulafono a Mose, aiseā ua outou matuā feita ai iā te aʻu auā ua ou faamālōlōina se tagata i le sapati?+
24 Soia tou te faamasino e tusa ma mea ua outou vāai i ai, ae ia tonu la outou faamasinoga.”+
25 O lea, ua faapea ane nisi o ē o nonofo i Ierusalema: “Pe e lē o le tagata ea lenei o loo latou lamalama e fasioti?+
26 Ae vaai! O loo aʻoaʻo atu o ia i nofoaga faitele,+ ae e leai sa latou tala e fai atu i ai. Po ua iloa ea e faipule o le Keriso lea?+
27 Ua tatou iloa le mea e sau ai lenei tagata;+ ae pe a maliu mai le Keriso, e lē iloa e se tasi le mea e sau ai o ia.”+
28 Ona alaga atu lea o Iesu a o aʻoaʻo atu i le malumalu, ua faapea atu: “Ua outou iloa aʻu ma le mea na ou sau ai.+ Ae ou te leʻi sau ona o loʻu lava loto,+ ae e iai moni lē na auina mai aʻu,+ ae tou te lē iloa o ia.+
29 Ua ou iloa o ia,+ auā o aʻu o lona sui, ma o Ia o lē na auina mai aʻu.”+
30 O lea, ua lamalama ai i latou e puʻe iā te ia,+ ae e leʻi oo se lima o se tasi iā te ia auā e leʻi oo i ona aso.*+
31 A ua faatuatua iā te ia le toʻatele o le motu o tagata;+ ma latou faapea ane: “Pe a taunuu mai le Keriso, po o le a ia faia ea ni faailoga+ e sili atu i lo o lenei tagata?”
32 Ua faalogo le ʻau Faresaio i tala a le motu o tagata e faatatau iā te ia, ona aauina atu lea e le ʻaufaitaulaga sili ma le ʻau Faresaio o ni leoleo e puʻe iā te ia.+
33 Ona faapea atu lea o Iesu: “Ou te toe nofo ma outou mo ni nai aso, ae ou te leʻi alu atu i lē na auina mai aʻu.+
34 Tou te saʻili mai iā te aʻu+ ae tou te lē maua, o le mea foʻi ou te iai, e lē mafai ona outou ō mai i ai.”+
35 Ona fetalanoaaʻi lea o tagata Iutaia e faapea: “O fea ea e fuafua lenei tagata e alu i ai, ae tatou te lē maua o ia? Po o fuafua o ia e alu atu i tagata Iutaia o loo taapeape+ i Eleni, ma aʻoaʻo atu i tagata Eleni?
36 O le ā le uiga o lana fetalaiga, ‘Tou te saʻili mai iā te aʻu, ae e tou te lē maua aʻu, o le mea foʻi ou te iai, e lē mafai ona outou ō mai i ai’?”
37 Ua oo i le aso mulimuli, o le aso tele lea o le tausamiga.+ O loo tū Iesu ma alaga atu e faapea: “Afai e fia inu se tasi,+ inā sau ia iā te aʻu e inu ai.
38 O lē e faatuatua mai iā te aʻu,+ e pei ona fai mai ai Tusitusiga Paia, ‘E tafe mai vai o le ola mai i totonu iā te ia.’”+
39 Peitaʻi, ua fetalai o ia e uiga i le agaga, lea o le a maua e i latou o ē e faatuatua iā te ia; ae o le taimi lea e leai se agaga,+ auā e leʻi faamamaluina Iesu.+
40 Ona faapea ane lea o nisi o le motu o tagata ua faalogo i ana upu: “E moni lava o Le Perofeta lenei.”+
41 Ua faapea mai isi: “O le Keriso lenei.”+ A ua fai mai isi: “Pe e tupu mai le Keriso+ mai i Kalilaia?+
42 Pe e lē o fai mai ea Tusitusiga Paia, e tupuga mai le Keriso mai i le fanau a Tavita,+ ma mai i Peteleema+ le aai sa nofo ai Tavita?”+
43 Ua vaeluaina le motu o tagata ona o ia.+
44 E ui ua mananaʻo nisi o i latou e puʻe iā te ia, ae leai se tasi ua oo lona lima iā te ia.
45 Ona toe foʻi lea o leoleo i le ʻaufaitaulaga sili ma le ʻau Faresaio. Ua faapea atu le ʻau Faresaio iā i latou: “Aiseā ua outou lē aumaia ai o ia?”
46 Ua tali mai leoleo: “E leai lava se tagata ua tautala e pei o lenei tagata.”+
47 A ua tali atu le ʻau Faresaio: “Po ua faasesēina foʻi ma outou?
48 Po ua faatuatua ea iā te ia se tasi o faipule po o le ʻau Faresaio?+
49 Peitaʻi, ua faamalaiaina lenei motu o tagata, o ē e lē iloa le Tulafono.”+
50 Ona fai atu lea o Nikotemo o lē na alu atu muamua iā te ia, ma o se tasi o i latou:
51 “Pe e faamasinoina i la tatou tulafono se tagata, ae e leʻi faalogologo+ muamua iā te ia ma iloa lana mea na fai?”
52 Ua latou tali mai iā te ia: “Po o oe foʻi o se Kalilaia? Ia saʻili ma iloa, e leai se perofeta+ e sau mai i Kalilaia.”*
* Ua aveesea i manusikulipi o le Codex Sinaiticus, Codex Vaticanus, ma le Sinaitic Syriac le fuaiupu 53 e oo i le fuaiupu e 11 o le mataupu e 8, ua faitauina (e iai foʻi ni tamaʻi eseesega i mau ma fuaiupu i nisi o tusitusiga Eleni) e faapea:
53 Ona taʻitasi lea ma alu o le tagata i lona aiga.
Faamatalaga Pito i Lalo
^ O le peritome, o lona uiga e tipiese paʻu o totogasā o tama.
^ Pe “e leʻi oo i lona itula.”
