Ioane 7:53–8:59
* Ua aveesea i manusikulipi o le Codex Sinaiticus, Codex Vaticanus, ma le Sinaitic Syriac le fuaiupu 53 e oo i le fuaiupu e 11 o le mataupu e 8, ua faitauina (e iai foʻi ni tamaʻi eseesega i mau ma fuaiupu i nisi o tusitusiga Eleni) e faapea:
53 Ona taʻitasi lea ma alu o le tagata i lona aiga.
8 Ona maliu atu lea o Iesu i le Mauga o Olive.
2 O le taeaopō ua toe maliu ane ai o ia i le malumalu; ua ō mai foʻi tagata iā te ia; ona nofo lea o ia i lalo, ma aʻoaʻo atu iā i latou.
3 Ua taʻitaʻiina mai e le ʻautusiupu ma le ʻau Faresaio o le fafine na maua o faia le mulilua; ma faatū o ia i le ogatotonu;
4 ua faapea mai i latou iā te ia, “Le Aʻoaʻo e, na maua lenei fafine o loo ia faia le mulilua.
5 Ae na poloaʻi Mose iā i tatou i le Tulafono ia fetogi i maa fafine faapenei. A o oe, o le ā sau tala?”
6 Ua latou fai mai faapea e tofotofo ai iā te ia, ina ia latou maua ai se mea e molia ai o ia. A ua punou Iesu, ma tusitusi i lona tamatamaʻilima i le eleele.
7 A ua latou fesili mai pea iā te ia; ona tū saʻo lea o ia i luga, ma faapea atu iā i latou: “O se tasi o outou e leai sana agasala, ia muamua ona togi e ia sana maa.”
8 Ona toe punou lea o ia, ma tusitusi i le eleele.
9 Ua latou faalogo i ai, ona taʻitoʻatasi lea o i latou ma alu i fafo, e amata mai i toeaina. A ua tuua na o Iesu ma le fafine o loo tū i le ogatotonu.
10 Ua toe ea i luga Iesu, ma ia silafia ai ua leai ni tagata, ae ua na o le fafine, ona ia fetalai atu lea iā te ia, “Le mafine e, o fea i latou? Po ua lē faasalaina oe e se tasi?”
11 Ua fai mai o ia, “Lau susuga e, e leai lava se tasi.” Ona fetalai atu lea o Iesu iā te ia: “Ou te lē faasala foʻi iā te oe; alu ia oe, aua e te toe agasala.”
12 Ua toe fetalai atu Iesu iā i latou e faapea: “O aʻu o le malamalama+ o le lalolagi. O lē e mulimuli mai iā te aʻu, e lē savali lava o ia i le pōuliuli,+ ae maua e ia le malamalama o le ola.”
13 Ona faapea mai lea o le ʻau Faresaio iā te ia: “Ua e molimau iā te oe lava; ma e lē moni lau molimau.”
14 Ua tali atu Iesu iā i latou: “E ui lava ina ou molimau iā te aʻu, ae e moni laʻu molimau,+ auā ua ou iloa le mea na ou sau ai, ma le mea ou te alu atu i ai.+ A o outou, tou te lē iloa le mea na ou sau ai, ma le mea ou te alu atu i ai.
15 Ua outou faamasino e tusa ma vaaiga a tagata;+ a o aʻu, ou te lē faamasinoina lava se tasi.+
16 Ae peitaʻi, afai ou te faamasino, e moni lava laʻu faamasinoga auā e lē na o aʻu, ae o loo ma faatasi ma le Tamā na auina mai aʻu.+
17 Ua tusia foʻi i la outou Tulafono, ‘E moni le molimau a tagata e toʻalua.’+
18 A o aʻu, ua ou molimau iā te aʻu lava, ma o le Tamā na auina mai aʻu, o loo molimau foʻi iā te aʻu.”+
19 Ona latou faapea mai lea iā te ia: “O fea o iai lou Tamā?” Ua tali atu Iesu: “Tou te lē iloa aʻu ma loʻu Tamā.+ Ana outou iloa aʻu, semanū ua outou iloa foʻi loʻu Tamā.”+
20 Ua fetalai o ia i nei upu i le mea e teu ai oloa,+ a o aʻoaʻo atu o ia i le malumalu. Ae e leai se tasi ua oo lona lima iā te ia,+ auā e leʻi oo i ona aso.*+
21 Ua toe fetalai atu foʻi o ia iā i latou: “O le a ou alu, ma e tou te saʻili+ mai iā te aʻu, ae e oti outou i la outou agasala.+ E lē mafai ona outou ō mai i le mea ou te alu i ai.”
22 Ona faapea ane lea o tagata Iutaia: “Po o le a pule o ia i lona ola? Auā ua ia fai mai, ‘E lē mafai ona outou ō mai i le mea ou te alu i ai.’”+
23 Ua fetalai atu o ia iā i latou: “O outou e mai i lalo nei; a o aʻu e mai i lugā.+ O outou e mai i lenei lalolagi;+ a o aʻu ou te lē mai i lenei lalolagi.+
24 O le mea lea ou te fai atu ai, E oti outou i a outou agasala.+ Auā afai tou te lē talitonu o aʻu o ia, e oti lava outou i a outou agasala.”+
25 Ona latou fai mai lea iā te ia: “O ai ea oe?” Ua fetalai atu Iesu: “Ua maʻimau le taimi ou te talanoa atu ai iā te outou.
26 E tele mea ou te fia tautala atu ai e faatatau iā te outou, ma faia i ai ni faaiʻuga. Auā o lē na auina mai aʻu, e faamaoni o ia, ma o mea foʻi na ou faalogo ai mai iā te ia, ua ou tautala atu ai i le lalolagi.”+
27 Latou te leʻi malamalama o loo fetalai o ia e faatatau i le Tamā.
28 O lea, ua fetalai atu ai Iesu: “Pe a siitia e outou i luga*+ le Atalii o le tagata,+ ona outou iloa ai lea o aʻu lava o ia,+ ma ou te lē faia se mea i loʻu lava loto;+ ae e pei ona aʻoaʻo mai e le Tamā iā te aʻu, o mea ia ou te tautala atu ai.+
29 O loo ma faatasi ma lē na auina mai aʻu; ma na te leʻi tuua aʻu na o aʻu, auā ou te faia pea mea e fiafia i ai lona finagalo.”+
30 A o fetalai o ia i nei mea, e toʻatele ua faatuatua ai iā te ia.+
31 Ona fetalai atu lea o Iesu i tagata Iutaia ua talitonu iā te ia: “O outou o oʻu soo moni pe a outou tumau i aʻu upu,+
32 ma e iloa e outou le upu moni,+ e tuusaʻoloto foʻi outou e le upu moni.”+
33 Ua latou tali mai iā te ia: “O i matou o le fanau a Aperaamo,+ ma e leʻi faia lava i matou ma pologa a se tagata.+ Aiseā la ua e fai mai ai ‘E tuusaʻoloto outou’?”
34 Ua tali atu Iesu iā i latou: “E moni, e moni, ou te fai atu iā te outou, O lē na te faia le agasala, o le pologa lea a le agasala.+
35 E lē tumau foʻi e faavavau le pologa i se aiga; ae e tumau e faavavau le atalii.+
36 O le mea lea, afai e tuusaʻoloto outou e le Atalii, ona outou saʻoloto moni ai lea.+
37 Ou te iloa o outou o le fanau a Aperaamo; ae o loo outou lamalama e fasioti iā te aʻu,+ ona tou te lē taliaina aʻu upu.+
38 Ua ou tautala+ i mea na ou vaai i ai a o ma faatasi ma loʻu Tamā;+ a o outou, ua outou faia mea ua outou faalogo ai mai i lo outou tamā.”
39 Ona latou tali mai lea iā te ia: “O lo matou tamā o Aperaamo.”+ Ua fetalai atu Iesu: “Afai o outou o le fanau a Aperaamo,+ ia faia galuega a Aperaamo.
40 A o lenei, ua outou lamalama e fasioti iā te aʻu, o le tagata ua taʻu atu iā te outou le upu moni ua ou faalogo ai mai i le Atua.+ O le mea lenā e leʻi faia e Aperaamo.+
41 Tou te faia galuega a lo outou tamā.” Ua latou fai mai iā te ia: “Matou te leʻi fananau mai ona o le faitaaga;* e toʻatasi lo matou Tamā,+ o le Atua lea.”
42 Ua fetalai atu Iesu iā i latou: “Afai o le Atua lo outou Tamā, tou te alolofa la iā te aʻu,+ auā ua ou sau mai i le Atua, ma ua ou i inei.+ Ou te leʻi sau i loʻu lava loto, a o Ia na auina mai aʻu.+
43 Aiseā ua outou lē iloa ai mea ua ou fai atu ai? Auā tou te lē faalogo i aʻu upu.+
44 O outou e mai i lo outou tamā le Tiapolo,+ ma ua outou mananaʻo foʻi e faia mea e tuʻinanau i ai lo outou tamā.+ O ia o le fasioti tagata talu le amataga,+ e leʻi tumau lava o ia i le upu moni, auā e lē o i totonu iā te ia le upu moni. Pe a tautala o ia i tala pepelo, e tautala o ia e tusa ma lona lava manatu, auā o ia o sē e pepelo ma le tamā o le pepelo.+
45 Peitaʻi, ua ou tautala i le mea moni, ae tou te lē talitonu mai iā te aʻu.+
46 O ai se tasi o outou na te taʻusalaina aʻu i se agasala ua ou faia?+ Afai ua ou tautala i le mea moni, aiseā ua outou lē talitonu mai ai iā te aʻu?
47 O lē e mai i le Atua e faalogo o ia i afioga a le Atua.+ O le mea lea ua outou lē faalogo ai, auā e lē mai i le Atua outou.”+
48 Ua tali mai tagata Iutaia iā te ia: “E lē saʻo ea la matou upu, O oe o le Samaria+ ma ua iā te oe se temoni?”+
49 Ua tali atu Iesu: “E lē o iā te aʻu se temoni, peitaʻi ou te āva i loʻu Tamā,+ ae tou te lē āva iā te aʻu.
50 Ou te lē o saʻili e faamamaluina aʻu;+ ae e iai Lē o loo saʻilia, ma o ia foʻi o le faamasino.+
51 E moni, e moni, ou te fai atu iā te outou, E lē oo lava le oti i lē e tausi i mea ua ou aʻoaʻo atu ai.”+
52 Ua fai mai tagata Iutaia iā te ia: “Ua matou iloa nei, ua iā te oe le temoni.+ Ua oti+ Aperaamo faapea foʻi ma le ʻauperofeta;+ a ua e fai mai ‘E lē oo+ lava le oti i lē e tausi i mea ua ou aʻoaʻo atu.’
53 Pe e sili ea oe+ i lo matou tamā o Aperaamo, o lē ua maliu? Ua feoti foʻi le ʻauperofeta.+ A o ai la oe?”
54 Ua tali atu Iesu: “Afai ou te faamamaluina aʻu lava, ua lē aogā lenā mamalu. O loʻu Tamā o lē ua outou fai mai o lo outou Atua, o ia lea ua faamamaluina aʻu;+
55 ae ua outou lē iloa o ia.+ A o aʻu, ou te iloa o ia.+ Afai ou te fai atu ou te lē iloa o ia, ua ou pepelo la e pei o outou. Peitaʻi, ou te iloa o ia ma ua ou tausi i lana afioga.+
56 Na matuā olioli lo outou tamā o Aperaamo i le faamoemoe e vaai i mea o le a ou faia,+ ma na ia vaai i ai ma olioli ai.”+
57 Ona fai mai lea o tagata Iutaia iā te ia: “E leʻi atoa le lima sefulu o ou tausaga, ae po ua e vaai ea iā Aperaamo?”
58 A ua faapea atu Iesu iā i latou: “E moni, e moni, ou te fai atu iā te outou, A o leʻi iai Aperaamo, a ua leva ona ou iai.”+
59 Ona latou fetagofi ai lea i maa e fetogi iā te ia;+ ae ua lafi Iesu ma maliu ese mai i le malumalu.
Faamatalaga Pito i Lalo
^ Pe “e leʻi oo i lona itula.”
^ Pe “e tutuʻi i luga o le laau.”
^ Tagaʻi i le Faaopoopoga e 8.
