Ioelu 1:1-20
1 O le afioga a Ieova na oo mai+ iā Ioelu le atalii o Petuelu e faapea:
2 “O outou toeaina e, inā faalogo mai ia i lenei mea, ma ia faalogo mai taliga o outou uma o loo nonofo i le atunuu.+ Pe sa tupu ea lenei mea i o outou aso po o aso foʻi o o outou augātamā?+
3 E tusa ai ma lea mea, ia faamatala atu i o outou atalii ma ia faamatala atu foʻi e o outou atalii i o latou atalii, ma o latou atalii i tupulaga o loo mulimuli mai.+
4 O mea ua totoe o le fuata na tuua e le katepila, ua ʻai e le sē akerise;+ o mea foʻi na tuua e le sē akerise, ua ʻai e le sē akerise e leʻi oso ni apaʻau; o mea na tuua e le sē akerise e leʻi oso ni apaʻau, ua ʻai e le mogamoga.+
5 “Le ʻauonanā e,+ inā feala mai ia ma fetagisi; o outou uma o ē e inu uaina, ia uiō+ ona o le uaina suamalie,+ auā ua aveesea mai i o outou gutu.+
6 Auā ua alu aʻe se nuu i loʻu laueleele, e malosi ma e lē mafaitaulia.+ O ona nifo o nifo o le leona,+ ma ua iai ivi auvae o le leona.
7 O ia ua avea ai laʻu vine ma mea e ofo ai,+ ua fai foʻi laʻu mati ma tagutugutu.+ Ua matuā fofoʻe ese le paʻu ma lafoesea.+ Ua papaʻe uma ona tamaʻi lālā laau.
8 Ia tagiauē e pei o se teine muli ua ofu i le ʻie talatala,+ ona o le tane o le a ia faaipoipo i ai i aso o lona teine muli.
9 “Ua faamutaina le taulaga i meaʻai+ ma le taulaga i meainu+ i le fale o Ieova; ua faavauvau+ ositaulaga, o ē e auauna+ iā Ieova.
10 Ua faatamaʻia le fanua,+ ua faavauvau le fanua;+ auā ua faaleagaina fatu, ua velasia le uaina fou+ ma ua mou mālie atu le suāuu.+
11 Ua māsiasi le ʻaufaifaatoʻaga;+ ua uiō ē o loo galulue i vine ona o le saito ma le karite; auā ua faaleagaina le fuata o le fanua.+
12 Ua mamago vine, ma ua mou mālie atu foʻi laau o le mati. Ua mago le laau o le rimoni, o le laau o le pama, ma le laau o le apu, ua mamago foʻi ma laau uma o le fanua;+ ma ua mou ese atu le fiafia mai i le fanau a tagata.+
13 “Ositaulaga e, ia outou fufusi iā te outou, ma tuʻi o outou fatafata.+ Auauna e o le fata faitaulaga, inā uiō ia.+ O outou o auauna a loʻu Atua, inā ō mai ia ma oofu i le ʻie talatala i le pō atoa; auā ua lē toe avatua i le fale o lo outou Atua taulaga i meaʻai+ ma taulaga i meainu.+
14 Ia faapaia se taimi e anapogi ai.+ Ia faasilasila atu se fonotaga paia.+ Ia faapotopoto toeaina atoa ma tagata uma e nonofo i le atunuu, i le fale o Ieova lo outou Atua,+ ma alaga atu iā Ieova mo se fesoasoani.+
15 “Auē le aso e;+ auā ua latalata mai lava le aso o Ieova,+ ma o le a oo mai e pei o se faafanoga mai i Lē e ona le malosi uma lava!
16 Po ua lē aveesea ea meaʻai mai i o tatou luma; po ua lē aveesea foʻi le olioli ma le fiafia mai i le fale o lo tatou Atua?+
17 Ua matuā maanuminumi mati mamago i lalo o a latou suō. Ua faatafunaina fale teuoloa. Ua lepetia fale e teu ai meaʻai, auā ua mamago fatu.
18 Ua fetagisi manu lalata! Ua matuā fesēaʻi solo lafu povi! Auā ua leai se laufanua e aai ai.+ Ua faasalaina lafu mamoe ona o mea sesē.
19 “Ieova e, ou te valaau atu iā te oe;+ auā ua faatamaʻia e le afi fanua o le toafa e aai ai manu, ma ua mū uma laau o le fanua i le afi.+
20 E naunau atu pea manu o le fanua iā te oe,+ auā ua mātūtū vai o alāvai,+ ma ua faatamaʻia e le afi fanua o le toafa e aai ai manu.”
