Ioelu 2:1-32
2 “Inā ili ia le pū i Siona,+ ma ia outou alalaga i le alaga o le taua+ i loʻu mauga paia.+ Ia atuatuvale tagata uma o ē e nonofo i le laueleele;+ auā o loo sau le aso o Ieova+ ma ua lata tele mai!
2 O le aso o le pōuliuli ma le pogisa,+ o le aso o le faamalumalu ma le pogisa tele. E pei foʻi o le malamalama o le vaveao ua sulugia ai luga o mauga.+
“Ua iai se nuu e toʻatele ma malolosi;+ e leʻi iai lava se nuu faapena mai i aso anamuā,+ ma pe a mavae ia o le a lē toe iai lava se nuu faapena i tausaga o lea tupulaga ma lea tupulaga.
3 O loo i o latou luma le afi e faatamaʻia ai,+ ma o loo i o latou tua foʻi le afi e faaumatia ai.+ Ua pei o le faatoʻaga i Etena le laueleele i o latou luma;+ ae o tua ua iai le toafa, ma e leai se mea e sao mai ai.
4 “Ua foliga mai i latou e pei o ni solofanua, ma ua taufetuli pea i latou e pei o ni solofanua.+
5 Ua latou taufaioso e pei o le paʻō o kariota i tumutumuga o mauga,+ e pei o le taalili o le afi ua faatamaʻia ai tagutugutu o laau.+ E pei o le nuu malosi ua pae e tau.+
6 O le a matuā atuatuvale tagata ona o i latou.+ O le a mūmū foʻi foliga uma ona o le popole.+
7 “E latou te taufetuli e pei o tagata totoa.+ E latou te feʻaʻei i le aupā e pei o tagata o le taua. E taʻitasi ma alu i lona lava ala, ma e latou te lē ʻaloese mai foʻi i le ala e ao ona ui ai.+
8 E lē tautulei le tasi i le isi. E latou te ō pea e pei o le tagata i lona ala; e lē ō ese isi mai i le ala pe a paʻuʻū isi ona o aū.
9 “E latou te ō atu faavavevave i le aai. E latou te tamomoʻe i le aupā. E latou te feʻaʻei atu i fale. E latou te ō atu i faamalama e pei o se gaoi.
10 E atuatuvale le laueleele i o latou luma, e lūlūina le lagi. E pogisa le lā ma le masina,+ ma e lē toe fepulafi mai le malamalama o fetu.+
11 O le a tulei mai foʻi e Ieova lona siʻufofoga+ i luma o lana ʻautau,+ auā e matuā toʻatele lava lana ʻautau.+ E malosi lē e faataunuuina lana afioga; auā o le aso o Ieova e malosi tele+ ma e matuā mataʻutia, ma o ai se tasi e mafai ona sao mai ai?”+
12 O le fetalaiga lenei a Ieova: “O lenei, ia outou toe foʻi mai iā te aʻu ma o outou lotoatoa,+ ma le anapogi,+ o le fetagisi, ma le tagiauē.+
13 Ia saeia o outou loto,+ ae e lē o o outou ofu;+ ma ia foʻi mai iā Ieova lo outou Atua, auā e alofa fua ma alofa mutimutivale,+ e telegese lona toʻasā+ ma e tele lona alofa faamaoni,+ ma e faanoanoa o ia ona o le malaia.+
14 O ai se tasi e na te iloa pe e toe liliu mai o ia, ma faanoanoa+ ma tuu ai pea se faamanuiaga pe a mavae lea mea,+ o le taulaga i meaʻai ma le taulaga i meainu mo Ieova lo outou Atua?
15 “O outou tane e, inā ili ia le pū i Siona.+ Ia faapaia se taimi e anapogi ai.+ Ia faasilasila atu se fonotaga paia.+
16 Ia faapotopoto le nuu atoa. Ia faapaia le faapotopotoga.+ Ia faapotopoto toeaina. Ia faapotopoto tamaiti ma i latou e leʻi teʻa ma le susu.+ Ia alu atu le alii faaipoipo mai i lona potu, ma le tamaʻitaʻi faaipoipo mai i lona potumoe.
17 “Ia fetagisi ositaulaga, o auauna a Ieova i le va o le faapaologa ma le fata faitaulaga+ ma faapea atu, ‘Ieova e, seʻi e alofa mai i lou nuu ma aua nei e faia lou tofi o se luma,+ neʻi pule ai nuu iā i latou. Aiseā e faapea mai ai tagata: “O fea o iai lo latou Atua?”’+
18 O le a fuā Ieova ona o lona atunuu+ ma alofa mutimutivale i ona tagata.+
19 O le a tali mai Ieova ma fetalai i lona nuu, ‘Ou te foaʻi atu iā te outou fatu, o le uaina fou ma le suāuu, ma e maoona ai outou;+ ou te lē toe faia outou ma luma i isi nuu.+
20 Ou te faateʻa mamao mai iā te outou o lē e mai i mātū,+ ou te faataapeapeina o ia i se laueleele ua leai ni vai ma ua faagaogaoina, ua faasaga ona mata i le sami i sasaʻe+ ma lona tua i le sami i sisifo.+ O le a alu aʻe le elo mai iā te ia,+ ma e alu aʻe pea foʻi le sauga mai iā te ia; auā o le a faia e le Atua se mea e matuā mataʻina i mea ua Ia faia.’
21 “Le fanua e, aua e te fefe. Ia fiafia ma olioli; auā o le a faia e Ieova se mea e matuā mataʻina i mea ua Ia faia.+
22 Manu e, o le fanua taalaelae,+ aua tou te fefefe, auā e toe ola lauusiusi mutia o le fanua e aai ai lafumanu.+ E fua mai foʻi le laau.+ O le mati atoa ma le vine o le a matuā fua mai lava.+
23 O outou le fanau a Siona e, ia outou fiafia ma olioli iā Ieova lo outou Atua;+ auā o le a ia avatu iā te outou le timu talafeagai i le tau e afu ai mea,+ o le a faatotō ifo foʻi iā te outou timuga, o le timu i le tau e afu ai mea ma le timu i le tau e totogo ai mea, e pei ona sa iai muamua.+
24 E ao ona tumu mea e soli ai saito i fatu ua faamamāina, ma e ao foʻi ona taumasuasua mea e tali ai suāvine i le uaina fou ma le suāuu.+
25 O le a ou avatu iā te outou le taui mo tausaga na ʻai ai a outou fuata e sē akerise, o sē akerise e leʻi oso apaʻau, o mogamoga ma katepila, o laʻu ʻautau tele na ou aauina atu iā te outou.+
26 O le a outou aai, e aai ma maoona,+ ma o le a outou vivii i le suafa o Ieova lo outou Atua,+ o lē na faia iā te outou mea ofoofogia;+ o le a lē toe māsiasi ai lava loʻu nuu.+
27 O le a outou iloa ai ou te faatasi ma Isaraelu,+ ma o aʻu o Ieova o lo outou Atua ae e leai se isi.+ O le a lē toe māsiasi ai lava loʻu nuu.
28 “Mulimuli ane ou te liligi ifo loʻu agaga+ i luga o ituaiga uma o tagata,+ ona fai lea o valoaga e o outou atalii ma o outou afafine.+ E fai miti a o outou toeaina. E iloa foʻi faaaliga e o outou tauleleʻa.
29 E oo foʻi ina ou liligi ifo loʻu agaga i na aso i auauna tane ma auauna fafine.+
30 “Ou te faia mea ofoofogia i le lagi+ ma le lalolagi, o le toto ma le afi, ma le asu e alu aʻe i luga.+
31 O le a liua le lā i le pōuliuli,+ e liua foʻi le masina i le toto,+ a o leʻi oo mai le aso tele ma le mataʻutia o Ieova.+
32 E faaolaina foʻi i latou uma o ē e valaau i le suafa o Ieova;+ auā o le a iai o ē e sao i le Mauga o Siona ma Ierusalema e pei ona fetalai mai ai Ieova, ma e faatasi foʻi i latou ma ē e totoe,+ o i latou ia o loo valaauina e Ieova.”+
