Iona 1:1-17
1 Ua oo mai le afioga a Ieova iā Iona+ le atalii o Amitai, e faapea:
2 “Inā tulaʻi ia ma alu i Nineva+ le aai tele, ma folafola atu i ai ua oo mai i oʻu luma a latou amioleaga.”+
3 Ua tulaʻi Iona e sola i Tasesa+ mai i luma o Ieova;+ ua alu ifo o ia i Iopa+ ma maua ai se vaa e alu i Tasesa. Ona ia totogi lea o lona pasese ma alu ifo ai i le vaa, ina ia ō faatasi ma le ʻaumalaga i Tasesa mai i luma o Ieova.
4 Ua faaoo e Ieova le matagi tele i le sami+ ma ua matuā sousou+ ai le sami; ma ua toetoe lava ina a malepe ai le vaa.
5 Ua fefefe le ʻauvaa, ma ua taʻitoʻatasi ma alaga atu mo se fesoasoani i lona lava atua.+ Ua latou lafoaʻi pea i le sami o mea ua i le vaa ina ia faamāmā ai le vaa.+ Ae peitaʻi, ua alu ifo Iona i le vaega pito i totonu o le vaa ua taoto ai ma moegase o ia.+
6 Mulimuli ane, ona alu atu lea o le kapeteni o le vaa iā te ia ma faapea atu: “Aiseā ua e moegase ai? Inā nofo ia i luga ma valaau atu i lou atua!+ Atonu e manatu alofa mai le Atua moni iā i tatou ma tatou lē feoti ai.”+
7 Ua faapea ane le tasi i le isi: “Ō mai ia seʻi o tatou faia le vili,+ ina ia tatou iloa ai po o ai ua māfua ai lenei mala.”+ Ua latou faia pea lenei mea, mulimuli ane ona faasaga lea o le vili iā Iona.+
8 Ua latou faapea atu iā te ia: “Faamolemole, seʻi e taʻu mai iā i matou po o ai ua māfua ai lenei mala?+ O le ā lau galuega, o fea foʻi e te sau ai? O fea lou atunuu, ma o ai tagata e te tupuga mai ai?”
9 Ua ia faapea mai iā i latou: “O aʻu o le tagata Eperu+ ma ou te mataʻu+ iā Ieova le Atua o le lagi,+ o Lē na faia le sami ma le laueleele mātūtū.”+
10 Ua matuā fefefe tamāloloa ma ua latou faapea atu iā te ia: “O le ā lenei mea ua e faia?”+ Auā ua iloa e tamāloloa ua sola ese o ia mai i luma o Ieova, ona na ia taʻu atu iā i latou.
11 Ona latou fai atu lea iā te ia: “O le ā se mea e matou te faia iā te oe+ ina ia toe malū ai le sami mo i tatou?” Auā ua atili ai ona sousou le sami.
12 Ua ia faapea mai iā i latou: “Ia sii aʻu ma lafo ifo i le sami, ona malū ai lea o le sami mo outou; auā ua ou iloa o aʻu ua māfua ai ona agi mai lenei matagi malosi iā te outou.”+
13 A ua taumafai tamāloloa e alo ina ia oo le vaa i le laueleele mātūtū; ae ua lē mafai, auā ua faateteleina pea le sousou o le sami ma taofia ai i latou.+
14 Ona latou alalaga lea iā Ieova ma faapea atu:+ “O lenei Ieova e, faamolemole aua neʻi o matou feoti ona o le ola o lenei tagata! Aua foʻi e te tuu i luga o i matou le toto o lē ua lē sala,+ auā o oe Ieova e, ua e faia le mea e te finagalo i ai!”+
15 Ua latou sii Iona ma lafo ifo o ia i le sami; ona uma ai lea o le sousou o le sami.+
16 Ona matuā matataʻu ai lea o tamāloloa iā Ieova,+ ma ua latou avatu se taulaga iā Ieova+ ma faia ni tautoga.+
17 Ua saunia e Ieova se iʻa telē e foloina Iona,+ ona iai lea o Iona i le manava o le iʻa i ao e tolu ma pō e tolu.+
