Iona 4:1-11
4 Ae ua matuā leaga lava lenei mea iā Iona, ma ua matuā ita tele ai o ia.+
2 Ona ia tatalo ai lea iā Ieova ua faapea atu: “Auē, Ieova e, pe e lē o le mea ea lenei na ou popole ai a o oʻu iai i loʻu lava atunuu? O le māfuaaga lea na ou muaʻi sola atu ai i Tasesa;+ auā ua ou iloa o oe o le Atua alofa fua ma alofa mutimutivale,+ e telegese lou toʻasā ae e tele lou alofa faamaoni+ ma e ono faanoanoa lou finagalo e tusa ai ma le mala.+
3 A o lenei, Ieova e, faamolemole ia e aveese loʻu ola+ mai iā te aʻu, auā e sili pe a ou oti nai lo o loʻu ola pea.”+
4 Ona fetalai mai ai lea o Ieova: “Pe e iai ea se māfuaaga talafeagai o lou ita?”+
5 Ona alu ese lea o Iona mai i le aai ma nofo i le itu i sasaʻe o le aai; ua faasolosolo foʻi ona ia faia se fale lauvao mo ia i inā, ina ia nofo ai i lona paolo+ seʻia iloa e ia po o le ā se mea e oo i le aai.+
6 Ua saunia e Ieova le Atua se laau o le kikaiona* ina ia sosolo i luga aʻe o Iona, ma faapaolo ai lona ulu, ma laveaʻiina ai o ia mai i ona tigā.+ Ona matuā fiafia ai lea o Iona ona o le laau o le kikaiona.
7 Ae ua saunia e le Atua moni se anufe+ ina ua tafa mai ata o le aso na sosoo ai, ua ʻaina e le anufe le laau o le kikaiona; ma ua faasolo ina mago ai.+
8 Ae ina ua susulu mai le la, ona saunia lea e Ieova o se matagi vevela mai i sasaʻe+ ma ua velasia ai le ulu o Iona, ua toetoe a matapogia o ia;+ ma ua ia talosaga atu pea ina ia oti o ia, ma fai atu pea: “E sili pe a ou oti nai lo o loʻu ola pea.”+
9 Ua fetalai mai le Atua iā Iona: “Pe e iai ea se māfuaaga talafeagai ua e ita tele ai ona o le laau o le kikaiona?”+
A ua tali atu o ia: “E iai le māfuaaga talafeagai ua ou ita tele ai, o lea sa ou manaʻo ai ou te oti.”
10 A ua fetalai mai Ieova: “Ua e manatu mamafa i le laau o le kikaiona, o se mea e te leʻi galue ai pe faatupuina, na tupu i le pō e tasi ma ua mago foʻi i le pō e tasi.
11 A o aʻu, pe e lē tatau ea ona ou manatu mamafa iā Nineva le aai telē,+ o loo iai tagata e sili atu i le toʻaselau lua sefulu afe, o ē e lē iloa le eseesega o o latou lima taumatau ma o latou lima tauagavale, atoa ma le tele o manu lalata?”+
Faamatalaga Pito i Lalo
^ Po o “le laau e maua mai ai le vaisuāuu.”
