Iopu 10:1-22
10 “Ua ʻinoʻino lava loʻu loto i loʻu ola.+
Ou te faailoa atu oʻu popolega iā te aʻu lava.
Ou te tautala atu foʻi i le tigā o loʻu loto!
2 Ou te fai atu i le Atua, ‘Aua e te taʻuleagaina aʻu.
Ia e faailoa mai iā te aʻu, pe aiseā ua e finau mai ai iā te aʻu.
3 Pe e lelei iā te oe ona e faia le mea sesē,+
Ua e teena ai le fua o galuega fitā a ou aao,+
Ma e taliaina ai fautuaga a ē e amioleaga?
4 Pe e pei ou fofoga+ o mata o le tagata,
Po ua e silasila ea foʻi e pei o le vaai a le tagata?+
5 Po ua pei ou aso o aso o le tagata,+
Po ua pei foʻi ou tausaga o aso o le tagata?
6 Ua e taumafai ai e saʻili loʻu sesē,
Ma ua e saga saʻili ai pea i laʻu agasala?+
7 E ui lava ua e silafia ou te lē amioleaga,+
E leai foʻi se tasi e laveaʻiina aʻu mai i lou aao?+
8 Ua saunia aʻu e ou lava aao ma ua faia ai aʻu+
Ua faia atoa ai aʻu, ae o le a e faaumatia iā te aʻu.
9 Ia manatua faamolemole, na e faia aʻu mai i le eleele+
Ma e te toe faafoʻi atu aʻu i le efuefu.+
10 Pe e te leʻi sasaaina atu ea aʻu e pei o le suāsusu
Ma faatoʻa aʻu e pei o le sisi?+
11 Ua e faaofu aʻu i le paʻu ma le aano
Ua e tuufaatasia aʻu i ponaivi ma uaua.+
12 Ua e foaʻiina mai le ola ma ua e alofa faamaoni mai foʻi iā te aʻu;+
Ma o lau tausiga+ ua leoleoina ai loʻu agaga.
13 Ua e natia nei mea i lou finagalo.
Ua ou iloa lelei foʻi o loo iā te oe nei mea.
14 Afai ou te agasala ma e te silasila mai pea iā te aʻu+
Ma e te lē taʻumamāina foʻi aʻu i loʻu sesē;+
15 Afai ua ou sesē, oi talofa iā te aʻu!+
Ae afai ou te saʻo, e lē ea i luga loʻu ulu,+
Ua tumu aʻu i le māsiasi ma ua lofia i tigā.+
16 Afai foʻi e faasiasia,+ e te saʻili iā te aʻu e pei o se tamaʻi leona,+
Ma e te toe faia foʻi se mea e matuā ofoofogia ona o aʻu.
17 E te aumaia au molimau fou i oʻu luma,
E faateleina foʻi lou toʻasā iā te aʻu;
Ua oo mai iā te aʻu lea mea faigatā ma lea mea faigatā.
18 Aiseā ea na e aumaia ai aʻu mai i le manava?+
Seʻi tō ia laʻu mānava, ina ia lē iloa mai ai aʻu e se tasi,
19 Po o penei ua pei aʻu o sē ua lē ola mai;
Ua aumaia aʻu mai i le manava i le tuugamau.’
20 Po ua lē itiiti ea oʻu aso?+ Ia tuu ai pea o ia,
Ia tuu o ia e liliuese ona fofoga mai iā te aʻu, seʻi oʻu mapu ane+ teisi
21 Ae ou te leʻi alu ese, ma ou te lē toe foʻi mai+
I le nuu o le pōuliuli ma le pogisa tele,+
22 I le nuu o le pogisa e pei o le pōuliuli, o le pogisa tele
Ma le lē maopoopo, lea e pei ai le malamalama o le pōuliuli.”
