Iopu 12:1-25
12 Ona tali atu lea o Iopu, ua faapea atu:
2 “E moni lava o outou o le nuu,
Ma e mavae atu le atamai faatasi ma outou!+
3 E iā te aʻu foʻi le loto+ e pei o outou.
Ou te lē faatauvaa iā te outou,+
Ma po o ai ea e lē o iai ni mea faapenei?
4 Ua avea aʻu ma lē e tauemu i ai lona uso a tagata,+
O lē ua valaau atu i le Atua ia tali mai iā te ia.+
Ua tauemua o lē ua amiotonu, e lē taʻuleagaina foʻi.
5 O le manatu o lē e nofo fifilemu, e ʻinoʻino o ia i le faaumatiaga;+
Ua saunia ia mo i latou e tautevateva o latou vae.+
6 E lē popole o ē e faomea o loo i faleʻie,+
E saogalemu foʻi o ē e faaita i le Atua
E pei o lē ua ia aumaia se atua* i lona lima.+
7 Ae peitaʻi, seʻi fesili atu ia i manu lalata, ona latou faatonu mai lea o oe;+
E faapea foʻi manufelelei o le lagi, ona latou taʻu mai lea iā te oe.+
8 Pe ia e tautala atu i le laueleele, ona ia faatonu mai lea o oe;+
E faailoa mai foʻi e iʻa o le sami+ iā te oe.
9 O ai na te lē iloa lelei nei mea uma
Na faia nei mea e le aao o Ieova,+
10 Ua i lona aao le ola+ o tagata ola uma
Ma le mānava a tagata uma lava?+
11 Pe e lē tofotofo ea e le taliga upu+
E pei ona tofo e le gutu+ o meaʻai?
12 Po ua lē iai ea le atamai i ē ua toeaina+
Ma le malamalama i ē ua faafualoa o latou aso?
13 O loo iā te ia le atamai ma le malosi;+
O loo iā te ia foʻi le fautuaga ma le malamalama.+
14 Faauta! Ua lepetia e ia i lalo, ina ia lē toe fausia;+
Ua ia tapunia i tagata, ina ia lē toe tatalaina.+
15 Faauta! Ua ia taofia vai, ona mate ai lea;+
Ua ia aauina atu foʻi i latou, ma ua latou suia le lalolagi.+
16 O loo iā te ia le malosi ma le atamai aogā;+
O loo iā te ia foʻi lē e faia le mea sesē, ma lē e taʻitaʻisesēina isi;+
17 Ua ia lē faaseevaeina vae o le ʻaufaufautua,+
Ua ia faavaleaina foʻi faamasino.
18 Ua ia tatalaina noanoataga o tupu,+
Ua ia fusia foʻi i se fusipaʻu o latou puimanava.
19 Ua ia tuu atu ositaulaga e savavali e leai ni seevae,+
Ua ia lafotuina foʻi o ē ua nonofo mau i o latou nofoa;+
20 Ua ia aveesea upu mai i ē e faamaoni,
Ma ua ia aveesea foʻi le mafaufau lelei o toeaina;
21 Ua ia faainosia tamālii,+
Ua ia faavaivaia foʻi le fusi o ē e malolosi;
22 Ua ia faaalia mea loloto mai i le pōuliuli,+
Ua ia faasusulu atu foʻi le malamalama i mea e matuā pogisa;
23 Ua ia faatoʻateleina nuu, ina ia ona faaumatia ai i latou;+
Ua ia faalauteleina atu foʻi nuu, ina ia ona taʻitaʻiesea ai i latou;
24 Ua ia aveesea le loto o taʻitaʻi o tagata o le nuu,
Ina ia avea i latou ma ē e feoaʻi solo i mea tuufua+ e lē o iai se auala.
25 Ua latou tautagotago i le pōuliuli+ e lē o iai se malamalama,
Ina ia feoaʻi solo i latou e pei o se tagata ua onā.+
Faamatalaga Pito i Lalo
^ E faasino atu le upu “atua” i se tupua.
