Iopu 18:1-21
18 Ona tali mai lea o Pilitati le Sua, ua faapea mai:
2 “O afea tou te faaiʻu ai a outou upu?
Ia outou malamalama, o le a matou tautatala atu mulimuli ane.
3 Aiseā ua manatu ai iā i matou e pei o ni manu+
Ma manatu ai e lē mamā i matou i o outou luma?
4 Ua saeia e ia lona tino i lona ita.
Pe e tuulafoaʻia ea le lalolagi ona o oe,
Pe e aveesea foʻi le papa mai i le mea sa iai?
5 E tineia le malamalama o ē e amioleaga+
E lē susulu atu foʻi le mumū o lona afi.
6 E pogisa le malamalama i lona faleʻie,+
E tineia foʻi lana molī o loo iai.
7 E faalavelavea ona laasaga malolosi.
O lana fautuaga foʻi e lafoaʻiina ai o ia.+
8 Auā o ona vae e alu ai o ia i le upega,
Ma e savali foʻi o ia i luga o le mea valavala.+
9 E puʻea o ia e le mailei i le mulivae;+
E taofia pea lava o ia e le matāsele.+
10 O loo natia le manoa mo ia i le eleele,
Ma le mailei mo ia i lona ala.
11 Ua fefe o ia i mea mataʻutia+ o loo siʻomia ai o ia,
Ma ua tulitataoina lava o ia.
12 Ua mou atu lona malosi ona o le fiaʻai,
Ua sauni mai foʻi le mala+ e faasetusetu iā te ia.
13 E ʻaina e ia vaega o lona paʻu;
E ʻaina foʻi ona lima ma vae e le ulumatua a le oti.
14 E liaʻieseina mai i lona faleʻie o mea sa ia faatuatuaina+
E na te aumaia o ia i le tupu o mea mataʻutia.
15 E nofo i lona faleʻie se mea e lē o sana mea;
E faasalalau foʻi le teiō+ i le mea e mau ai o ia.
16 E mamago ona aa+ i lalo,
E magumagu foʻi ona lālā i luga.
17 E lē toe taʻua lava o ia i le lalolagi,+
E lē iai foʻi lona igoa i le auala.
18 E latou te tulei o ia i fafo mai i le malamalama i le pōuliuli,
E latou te tuliesea foʻi o ia mai i le laueleele.
19 E leai sana fanau ma se fanau a lana fanau i lona nuu,+
E leai foʻi sē e totoe mai i le mea e aumau ai o ia.
20 I ona aso, e vāai ai ma le ofo tagata i le itu i Sisifo,
E gatete foʻi tagata i le itu i Sasaʻe.
21 E na o fale o lē e fai mea sesē e tutupu ai nei mea,
O le nofoaga foʻi lea o lē e na te leʻi iloa le Atua.”
