Iopu 28:1-28
28 “Ioe, e iai le mea e maua ai le siliva
Ma le nofoaga mo le auro e latou te faamamāina ai;+
2 E maua le uʻamea mai i le efuefu+
E maua foʻi le ʻapamemea mai i le maa.
3 Ua ia faagataina le pōuliuli;
Ua saʻiliʻili foʻi o ia i itu uma+
I maa i le pōuliuli ma le pogisa tele.
4 Ua elia e ia se pū e mamao mai i le mea e aumau ai tagata ese,+
I nofoaga ua faagaloina e vae;
Ua tāupe i maea nisi o tagata, ma ua tautau foʻi i latou.
5 Ae e tupu mai meaʻai i le eleele;+
A o ona lalo ifo, ua suatia e pei o le afi.
6 O ona maa o nofoaga ia o le safaira,+
E iai ona efuefu auro.
7 O lona ala, e lē iloa e se manulele taufeʻai,+
E lē iloa foʻi e mata o le aia uliuli+ lea mea.
8 E lē solia e manufeʻai mataʻutia;
E lē savali ai foʻi i luga le tamaʻi leona.
9 E tago atu lona lima i le papa alā;
E na te fulisia foʻi mauga mai i o latou faavae;
10 Ua ia faia alāvai e faatafe ai le vai i totonu o papa,+
Ua vaaia foʻi e ona mata mea tāua uma.
11 Ua ia pupuni mea e tafe atu ai le vai,+
Ua ia aumaia i le malamalama mea ua natia.
12 A o fea e maua ai le atamai?+
Ma o fea foʻi le nofoaga o le malamalama?
13 E lē iloa lona tau e le tagata,+
Ma e lē o maua foʻi i le nuu o ē e ola.
14 Ua faapea mai vai loloto,
‘E lē o iā te aʻu!’
Ua faapea mai foʻi le sami, ‘E lē o iā te aʻu!’+
15 E lē mafai ona faafesuiaʻi ma le auro māoʻi,+
E lē mafai ona faatauina i siliva.
16 E lē mafai ona faatauina i auro o Ofeira,+
Faatasi ai ma le maa soama tautele ma le safaira.
17 E lē mafai ona faatusaina i le auro ma le tioata,
E lē mafai foʻi ona fesuiaʻi ma se ipu o le auro ua faamamāina.
18 E lē taʻua ʻamu+ ma le maa tioata,
Ae e sili atu ona tāua le atamai,* nai lo o le taga ua tumu i penina.+
19 E lē mafai ona faatusaina i le topasi+ o Kuso;
E lē mafai foʻi ona faatauina i le auro ua faamamāina.
20 Ae o fea e sau ai le atamai?+
Ma o fea foʻi le nofoaga o le malamalama?
21 Ua lilo lea mai i mata o tagata ola uma,+
Ua natia foʻi mai i manufelelei o le lagi.
22 Ua faapea mai le faaumatiaga ma le oti,
‘Ua ma faalogo i le tala e faatatau i lea mea.’
23 O le Atua o Lē e malamalama i lona ala,+
O ia foʻi e na te silafia le mea o iai,
24 Auā e silasila o ia i tuluʻiga o le lalolagi;+
E silafia e ia mea i lalo o le lagi uma,
25 Ina ia tuuina atu le malosi i le matagi,+
A o ia vaevaeina vai i se fua;+
26 Ina ua ia faia se tulafono mo le timu,+
Ma le ala mo le ao faititili,
27 Ona ia silafia ai lea o le atamai ma faamatala atu ai;
Ua ia saunia ma suʻesuʻe foʻi i ai.
28 Ua fetalai mai o ia i le tagata,
‘Faauta! O le mataʻu iā Ieova, o le atamai lea,+
Ma o le liliuese mai i le leaga, o le malamalama lea.’”+
Faamatalaga Pito i Lalo
^ I le gagana Eperu, “e sili atu ona tāua le taga ua tumu i le atamai, nai lo o le taga ua tumu i penina.”
