Iopu 31:1-40
31 “Ua ou osia le feagaiga ma oʻu mata.+
E faapefea la ona ou manaʻonaʻo i se taupou?+
2 O le ā se mea mo aʻu mai i le Atua o loo i lugā,+
Po o se tofi foʻi mai i Lē e ona le malosi uma lava o loo i mea maualuluga?
3 Pe e lē o iai ea se malaia i lē e fai mea sesē,+
Ma puapuaga i ē e faia mea e tigā ai?
4 Po ua lē silafia ea e ia oʻu ala+
Ma faitaulia oʻu laasaga uma?
5 Pe afai ua ou savali faatasi ma tagata e lē faamaoni,+
Ma televave oʻu vae e faia mea faaʻoleʻole,+
6 E na te fuaina aʻu i le fua saʻo+
Ma o le a silafia foʻi e le Atua loʻu faamaoni.+
7 Pe afai ua sesē oʻu laasaga mai i le ala,+
Po ua tosina atu loʻu loto i le vaai a oʻu mata,+
Po ua pipii mai se mea leaga i oʻu alofilima,+
8 Ia ou lūlūina fatu, a ia ʻaina e se tasi,+
Ma ia liaʻiina foʻi o ē e tupuga mai iā te aʻu.
9 Pe afai ua tosina loʻu loto i se fafine,+
Ma ou taoto i le faitotoʻa e lamalama+ i laʻu uō,
10 Ia olo e laʻu avā saito mo se tasi tamāloa,
Ia tootutuli foʻi isi tamāloloa i ona luga.+
11 Auā o le amio matagā lenā mea,
O le mea sesē lenā sa tatau ona iloiloina e faamasino.+
12 Auā o le afi lava lenā e susunuina ai i le faaumatiaga,+
E faatamaʻia ai aʻu mea uma lava.
13 Afai sa masani ona ou teena le faamasinoga o laʻu tane pologa,
Po o laʻu teine pologa i ni mea na latou molia ai aʻu i le tulafono,
14 O le ā la se mea ou te faia pe a tulaʻi mai le Atua?
Pe a valaau mai foʻi iā te aʻu mo se faamatalaga, o le ā laʻu tali e fai atu iā te ia?+
15 Pe e leʻi faia ea o ia e Lē na faia aʻu i le manava,+
Ma pe e lē toʻatasi ea Lē na saunia i tatou i le manava?
16 Afai sa masani ona ou taofia se mea e fiafia i ai o ē e faatauvaa,+
Ma ua fole foʻi mata o le fafine ua oti lana tane talu aʻu,+
17 Pe na masani foʻi ona ou ʻai na o aʻu i laʻu meaʻai,
Ae e leʻi ʻai ai le tama ua leai sona tamā+
18 (Auā talu mai loʻu talavou, na ma ola faatasi aʻe e pei o se tamā,
Ma na ou taʻitaʻi pea o ia mai i le manava o loʻu tinā);
19 Pe afai sa masani ona ou vaai i le fano o se tasi ina ua leai sona ofu,+
Po o le tagata mativa ua leai sona lavalava;
20 Afai e leʻi faamanuia mai iā te aʻu lona sulugātiti,+
Pe e leʻi māfanafana o ia i fulufulu mamoe+ o aʻu tamaʻi mamoe poʻa;
21 Pe afai na lialiaʻi atu loʻu lima e faamataʻu i le tama ua leai se tamā,+
Ma ina ua ou iloa mea e manaʻomia e loʻu fesoasoani o loo i le faitotoʻa,+
22 Ia paʻū ese loʻu ivi tauʻau mai i lona tauʻau,
Ia gauiesea foʻi loʻu lima mai i lona ponaivi i luga.
23 Auā ua ou mataʻu ona o le faaumatiaga mai i le Atua,
Ua lē mafai foʻi ona ou tatalia ona o lona mamalu.+
24 Afai ou te faia auro ma mea ou te faalagolago i ai,
Po ou te fai atu foʻi i auro, ‘O oe o loʻu faatuatuaga!’+
25 Afai sa masani ona ou olioli ona o mea e tele ua iā te aʻu,+
Ma ua maua e oʻu lima le tele o mea;+
26 Afai sa masani ona ou vaaia le malamalama pe a pupula mai,
Po o le masina matagofie foʻi o loo alu ane,+
27 Ma ua ʻolegia faalilolilo loʻu loto+
Ma ua ou sogi i loʻu lima,
28 O le mea sesē foʻi lenā sa tatau ona iloiloina e faamasino,
Auā ua ou faafitia le Atua moni i lugā.
29 Afai sa masani ona ou olioli i le faaumatiaga o se tasi na matuā ita iā te aʻu,+
Pe na ou fiafia ona ua oo se mea leaga iā te ia
30 Ou te leʻi faatagaina loʻu gutu e agasala ai
I le talosaga atu mo se tautoga e faasaga iā te ia.+
31 Afai e leʻi faapea ane tagata o loʻu faleʻie,
‘O ai e mafai ona faailoa mai se tasi e leʻi faamalieina i ana meaʻai?’+
32 E leai se tagata ese e nofo i fafo i le pō;+
Ou te tatalaina pea oʻu faitotoʻa iā i latou i luga o le ala.
33 Afai ou te ufiufi i aʻu solitulafono e pei o le tagata+
I le natia o aʻu mea sesē i le taga o loʻu ofutino
34 Talu ai ua ou mafatia i le fefe i ni tagata e toʻatele,
Po o le faamataʻu foʻi o aʻu i le ʻinoʻino mai o aiga
Ou te filemu pea, ou te lē alu atu i le faitotoʻa.
35 E! pe ana faalogo mai se tasi iā te aʻu,+
Po ua tali mai+ Lē e ona le malosi uma lava iā te aʻu e tusa ma loʻu faailoga!
Pe e tusa ma mea ua tusia i faamaumauga a lē o loo ma faamasino!
36 Ou te tauaveina lava i luga o loʻu tauʻau;
Ou te fusia ai foʻi aʻu e pei o se pale matagofie.
37 Ou te faailoa atu iā te ia oʻu laasaga;+
Ou te faalatalata atu iā te ia e pei o se taʻitaʻi.
38 Afai e alaga mai loʻu laueleele mo se fesoasoani ona o aʻu;
E fetagisi faatasi foʻi ona atu puʻe;
39 Pe afai na ou ʻaina ona fua ae e lē faatauina,+
Ma ua ou faapogaia le mapuitigā o ē e pule ai,+
40 Ia tupu mai le vao tuitui nai lo o le saito,+
Ma le vao manogi leaga nai lo o le karite.”
Ona faaiʻu ai lea o upu a Iopu.
