Iopu 32:1-22
32 Ona lē toe tali mai lea o ia tagata e toʻatolu iā Iopu, auā ua amiotonu o ia i lona lava manatu.+
2 A ua matuā ita lava Eliu le atalii o Parakelu le tagata Pusa+ mai i le aiga o Rama. Ua matuā ita lava o ia iā Iopu ona o lona taʻuamiotonuina o ia lava nai lo o le Atua.+
3 Ua ita tele foʻi o ia i ana aumea e toʻatolu ona ua latou lē maua se tali e tali atu ai, a ua latou taʻuleagaina le Atua.+
4 Ua faatalitali Eliu e tautala atu iā Iopu, auā e matutua atu i latou i lo o ia.+
5 Ua oo ina iloa e Eliu ua lē mautali+ ia tagata e toʻatolu, ona matuā ita tele ai lea o ia.
6 Ona tali mai lea o Eliu le atalii o Parakelu le tagata Pusa, ua faapea mai:
“Ou te laʻitiiti
A o outou, o toeaina outou.+
O le māfuaaga lea na ou mataʻu ma fefe ai
E faailoa atu iā te outou mea ua ou iloa.
7 Na ou fai atu, ‘E tautala mai lava aso,
Ma o le tele foʻi o tausaga e faailoa mai ai le atamai.’+
8 E moni, o le agaga i totonu o le tagata
Ma o le mānava a Lē e ona le malosi uma lava, e latou te malamalama ai.+
9 E lē na o i latou ua tele tausaga ua atamamai,+
Po o i latou ua toeaina e malamalama i le faamasinoga.+
10 Ona ou fai atu lea, ‘Inā faalogo mai ia iā te aʻu.
Ou te faailoa atu mea ua ou iloaina.’
11 Faauta! na ou faatalitali mo sa outou tali,
Na ou faalogologo atu pea i o outou manatu,+
Seʻia outou maua ni upu e tali mai ai.
12 Na ou uaʻi atu pea iā te outou,
A ua leai se tasi e aʻoaʻia Iopu
E leai foʻi se tasi o outou na tali atu i ana upu,
13 Ina neʻi outou faapea ane, ‘Ua matou maua le atamai;+
O le Atua na aʻoaʻia o ia, ae e lē o se tagata.’
14 E na te leʻi fai mai ni upu e tetee mai ai iā te aʻu,
Ou te lē tali atu iā te ia i a outou upu.
15 Ua matataʻu i latou, ma ua lē toe tali mai;
Ua sosola ese upu mai i o latou gutu.
16 Na ou faatalitali, auā ua lē toe tautatala mai i latou;
Ua tutū pea i latou, ua lē toe tali mai.
17 O aʻu lava ou te tali atu ai;
Ou te faailoa atu e aʻu lava mea ua ou iloa;
18 Ua tumu aʻu i upu;
Ua uunaʻi+ mai iā te aʻu le agaga o loo i totonu iā te aʻu.
19 Faauta! Ua pei loʻu manava o se uaina ua leai se ala ʻea;
E pei o fagupaʻu fou ua tau pāpā.+
20 Seʻi oʻu tautala atu ina ia ou mapu ai.
E tautala atu oʻu laugutu ina ia fai atu se tali.+
21 Seʻi aua lava neʻi oʻu faailogaina se tagata;+
Ma aua neʻi oʻu faaee atu se igoa tāua i se tagata;+
22 Auā ou te lē iloa pe faapefea ona faaee atu se igoa tāua;
E vave ona aveesea o aʻu e Lē na faia aʻu.+
