Iopu 33:1-33
33 “O lenei Iopu e, seʻi e faafofoga mai i aʻu upu,
Ma ia uaʻi mai ou taliga i aʻu tautalaga uma.
2 Faauta, faamolemole! E tatau ona ou tautala atu;
E tatau ona tautala atu loʻu gutu.+
3 Ou te tautala atu i le faamaoni o loʻu loto,+
E tautala foʻi ma le faamaoni oʻu laugutu i le poto.+
4 Na faia aʻu e le agaga o le Atua,+
O le mānava foʻi a Lē e ona le malosi uma lava na ou ola ai.+
5 Afai e te mafaia, ia e tali mai iā te aʻu,
Ia e fai mai ni upu i oʻu luma; ia e sauni.
6 Faauta! ua pei aʻu o oe i le silafaga a le Atua moni;+
Na faia foʻi aʻu i le efuefu.+
7 Faauta! e leai se mea mataʻutia o iā te aʻu e te fefe ai,
E lē mamafa foʻi aʻu upu+ i luga iā te oe.
8 A ua e saunoa mai a o oʻu faalogo,
Ua ou faalogo atu pea i le leo o au saunoaga,
9 ‘Ou te amio mamā e aunoa ma ni solitulafono;+
E mamā aʻu, e leai saʻu mea sesē.+
10 Faauta! Ua maua e ia mea e tetee mai ai iā te aʻu,
Ua manatu o ia o aʻu o lona fili.+
11 Ua ia taofia oʻu vae i faamau,+
Ua ia tulimataʻia foʻi oʻu ala uma.’+
12 Faauta! E lē saʻo oe i lenei mea,+ ou te tali atu iā te oe;
Auā e sili atu le Atua i le tagata.+
13 Aiseā ua e finau atu ai i le Atua?+
Po ona ua lē tali mai ea o ia i au upu uma lava?+
14 Auā e faatasi ona fetalai le Atua,
Ua faalua+ foʻi, ae e lē uaʻi atu i ai se tasi
15 I se miti+ po o se faaaliga+ i le pō,
Pe a momoegase tagata,
A o momoe i luga o le moega.+
16 O le taimi lea ua ia tatala ai taliga o tagata,+
Ma ua ia faamauina lana apoapoaʻiga iā i latou,
17 Ina ia liliuese ai le tagata mai i lana gaoioiga,+
Ma ia faalilo ai e ia le faamaualuga+ mai i le tagata.
18 Ua ia taofiofi iā te ia ina neʻi oo i le lua+
Ma lona ola ina neʻi faaumatia e se auupega.+
19 Ua ia aʻoaʻia o ia i tigā i luga o lona moega,
Ma ua faaauau pea ona tigā ona ponaivi.
20 Ua avea meaʻai ma mea inosia i lona olaga,+
Ua lē naunau foʻi o ia i ana meaʻai.
21 Ua mou atu lona tino ua lē toe iloa atu,
Ma ua aliali mai ona ponaivi sa lē iloa.
22 Ua latalata o ia i le lua,+
Ma lona ola foʻi iā i latou e fasiotia.
23 Afai e iai se avefeʻau mo ia,
O se fofoga fetalai mai i le toʻaafe,
E taʻu atu i le tagata le mea ua tonu mo ia,
24 Ona alofa lea o ia iā te ia ma faapea atu,
‘Ia laveaʻi iā te ia ina neʻi alu ifo i le lua!+
Ua ou maua le togiola!+
25 Ia faafouina lona tino e sili nai lo o le talavou;+
Ia toe foʻi o ia i aso o le malaulau o lona talavou.’+
26 E ʻaiʻoi atu o ia i le Atua ina ia fiafia mai o ia iā te ia,+
E na te iloa atu ona fofoga ma le alaga o le olioli,
E na te toe faafoʻisia mai foʻi Lana amiotonu i le tagata.
27 E pese atu o ia i tagata ma faapea atu,
‘Ua ou agasala;+ ua ou faapiʻoina le mea ua tonu,
E lē o le mea lenā sa tatau ona ou faia.
28 Ua ia laveaʻiina loʻu ola ia lē alu atu i le lua,+
Ou te iloa atu foʻi le malamalama.’
29 Faauta! O nei mea uma ua faia e le Atua,
E faalua, e faatolu i le tagata,
30 Ina ia toe faafoʻi mai o ia mai i le lua,+
Ina ia faamalamalamaina o ia i le malamalama o ē e ola.+
31 Iopu e, inā uaʻi mai ia! Inā faalogo mai ia iā te aʻu!
Ia e filemu, ona ou tautala atu ai pea lea.
32 Pe afai e iai ni upu e fai mai, ia tali mai iā te aʻu;
Inā tautala ia, auā ua ou fiafia i lau amiotonu.
33 Ae afai e leai, ia e faalogo mai iā te aʻu;+
Inā filemu ia, ona ou aʻoaʻoina lea o oe i le atamai.”
