Iopu 5:1-27
5 “Inā valaau atu ia! Pe e iai se tasi e tali mai iā te oe?
Po o ai foʻi se tasi o le ʻaupaia e te liliu atu i ai?
2 E fasiotia le tagata valea i mea e tigā ai,
E fasiotia foʻi lē ua maileiagofie i le matauʻa.
3 Ua ou vaaia le tagata valea ua mauaa,+
Ae e teʻi lava ua ou ʻinoʻino i le mea e mau ai.
4 Ua mamao lava ona atalii mai i le faaolataga,+
U tuʻimomomoina foʻi i latou i le faitotoʻa o le pā e aunoa ma sē e laveaʻi.
5 Ua ʻaina mea na ia seleseleina e lē ua fia ʻai;
Ua aveese e ia aano o manu mai i le mātau a lē e fasi manu,
Ua faoa foʻi e le mailei a latou oloa.
6 Auā e lē tupu mai i le efuefu se mea e tigā ai,
E lē tupu aʻe foʻi mai i le eleele le malaia.
7 Auā ua fanau mai le tagata mo faafitauli,
E faapei ona felelei aʻe i luga o aloiafi.
8 A o aʻu, ou te ʻaiʻoi atu i le Atua,
Ou te tuuina atu foʻi i le Atua laʻu mataupu,+
9 O Lē ua faia mea tetele e lē masuʻesuʻeina,
O mea ofoofogia foʻi e lē mafaitaulia;+
10 O Lē na te faatotō mai le timu i le laueleele,+
Ma na te faasūsū le fanua i vai;+
11 O Lē e tuuina i se mea maualuga o ē e faatauvaa,+
Ina ia faaeaina ai i le faaolataga o ē e faanoanoa;
12 O Lē e faalēaogāina faufauga a ē e iai le utaga mamao,+
Ina ia lē taulau galuega a o latou lima;
13 O Lē ua maua tagata atamamai i a latou lava togafiti,+
Ina ia fenuminumiaʻi ai fautuaga a ē e faaʻoleʻole;+
14 E oo iā i latou le pōuliuli e tusa lava pe ao,
E latou te tautagotago foʻi i le tutonu o le lā e peiseaʻī o loo pō;+
15 O Lē e faaolaina le tagata i le pelu mai i o latou gutu,
O le tagata mativa foʻi mai i le lima o lē e malosi,+
16 Ina ia iai le faamoemoe o lē e faatauvaa,+
Ae punitia le gutu o lē e amiolētonu.+
17 Faauta! E fiafia le tagata e aʻoaʻiina e le Atua;+
Aua foʻi e te teena le aʻoaʻiga a Lē e ona le malosi uma lava!
18 Auā o ia lava e na te faatigāina, ae e fusia foʻi e ia le manuʻa;
E na te faamanuʻaina, ae e faamālōlōina foʻi e ona aao.
19 E na te laveaʻia oe mai i mala e ono,+
Ae e lē oo iā te oe se mea e tigā ai i le mala lona fitu.+
20 E na te laveaʻiina+ oe mai i le oti i le taimi o le oge,
Mai i le malosi foʻi o le pelu i le taimi o le taua.
21 E te lilo mai i le tā a le laulaufaiva e pei o le sasa,+
E te lē fefe foʻi pe a faoa mea ua iā te oe.
22 E te ʻata pe a faoa mea ma oo mai le oge,
E te lē fefe foʻi i le manufeʻai o le eleele.
23 E fai la outou feagaiga ma maa o le fanua,
E te nofo filemu foʻi ma le manufeʻai o le vao.+
24 E te iloa ai o le filemu o lou faleʻie lea,
E te asiasi foʻi i ou tuāfanua, ae e leai se mea e te mativa ai.
25 E te iloa ai lava le toʻatele o lau fanau,+
E pei foʻi o ē e tupuga mai iā te oe o vao o le eleele.+
26 E te alu i le tuugamau a o e malosi lava,+
E faapei o fusi saito ua faaputuina i o latou tau.
27 Faauta! O le mea lenei ua matou iloiloina. E faapenei.
Ia faalogo, ma ia e iloatino lenei mea.”
