Iopu 7:1-21
7 “Pe e lē o iai ea se galuega mamafa+ mo le tagata i le lalolagi,
Ma po ua lē pei ea ona aso o aso o le tagata faigaluega?+
2 Ua matuā naunau o ia i le paolo+ e pei o se pologa,
Ua faatalitali foʻi o ia i lona totogi e pei o se tagata faigaluega.+
3 O loʻu tofi o masina lē aogā ia,+
Ma o loʻu taui o pō e puapuagatia ai.+
4 Ina ua ou taoto, na ou faapea ifo, ‘O afea ou te tulaʻi ai?’+
Ma ina ua leva le pō, na matuā lē maua foʻi saʻu mapu seʻia oo ina tafa mai ata o le taeao.
5 Ua lilofia loʻu tino i ilo+ ma mea patupatu o le pefu;+
Ua paʻupaʻua loʻu paʻu, ma ua tafe mai ai le sua.+
6 Ua sili atu le televavave o oʻu aso+ nai lo o le nila a lē e lalaga,
Ma ua oo ina uma e aunoa ma se faamoemoe.+
7 Ia manatua, o loʻu ola o le matagi lava lea;+
E lē toe vaai foʻi oʻu mata i se mea lelei.
8 E lē iloa mai aʻu e mata o lē e vaai mai iā te aʻu;
Ae e sisila mai ou fofoga iā te aʻu, a ua ou leai.+
9 Ua taape le ao ma ua mou atu;
E faapea foʻi lē e alu ifo i le Tuugamau* e lē toe alu aʻe ai.+
10 E lē toe foʻi mai o ia i lona fale,
E lē toe iloa lava foʻi o ia i le mea sa iai.+
11 A o aʻu, ou te lē taofia loʻu gutu.
Ou te tautala atu i le tigā o loʻu agaga;
Ou te popole foʻi i le tigā o loʻu loto!+
12 Po o aʻu ea o se sami po o se meaola lapoʻa o le sami,
Ua e tofia ai se leoleo+ iā te aʻu?
13 Pe a ou faapea ane, ‘E faamāfanafana aʻu e loʻu moega,
E fesoasoani loʻu moega e faamāmā loʻu popole,’
14 Ua e faaatuatuvale foʻi aʻu i miti,
Ma ua e faafefe aʻu i faaaliga,
15 O lea, ua ou filifili ai ina ia ou mole,
Ia ou oti+ nai lo o oʻu ivi.
16 Ua ou teena lea mea;+ ou te lē fia ola i aso uma.
Tuu ai pea aʻu, auā ua faatauvaa oʻu aso.+
17 Se ā ea le tagata+ ua e tausia ai o ia,
Ma ua e manatu mamafa mai ai iā te ia,
18 Ua e uaʻi mai ai iā te ia i taeao uma,
Ma e tofotofoina ai o ia i taimi uma?+
19 Aiseā ua lē ʻalo ai ou fofoga mai iā te aʻu,+
Pe tuu ai pea aʻu seʻia ou foloina oʻu fāua?
20 Afai ua ou agasala, o le ā se mea ou te faia iā te oe, o Lē e silasila mai i tagata?+
Aiseā ua e fai ai aʻu ma au taulaʻiga, ma avea ai aʻu ma avega iā te oe?
21 Aiseā ua e lē faamagalo ai aʻu solitulafono+
Ma faagalo ai oʻu sesē?
Auā ou te taoto i le efuefu;+
E te saʻili mai foʻi iā te aʻu, ae ua ou leai.”
Faamatalaga Pito i Lalo
^ Po o “Seoli,” e mai le upu Eperu sheʼohlʹ. Tagaʻi i le Faaopoopoga e 6.
