Iopu 8:1-22
8 Ona tali mai lea o Pilitati le Sua,+ ua faapea mai:
2 “O le ā le umi e te tautala mai ai i nei mea,+
Ina ua pei upu a lou gutu o se matagi malosi?+
3 Pe e faapiʻoina ea e le Atua le faamasinoga,+
Pe e faapiʻoina foʻi e Lē e ona le malosi uma lava le amiotonu?+
4 Afai e agasala lau fanau iā te ia,
Ua ia tuu atu i latou ia mafatia i le faasalaga ona o lo latou fouvale,
5 Afai e te saʻili atu i le Atua,+
Ma afai e te ʻaiʻoi atu i Lē e ona le malosi uma lava mo lona finagalo malie,
6 Afai e te mamā ma amio saʻo,+
O le a maleifua mai o ia mo oe
O le a ia toe faafoʻisia foʻi le mea e mau ai lau amiotonu.
7 O se mea itiiti foʻi lou amataga,
A o lou iʻuga mulimuli ane e matuā tupu tele lava.+
8 Ioe, ia e talosaga atu faamolemole i le tupulaga na muamua atu,+
Ma ia e uaʻi atu i mea na saʻilia e o latou tamā.+
9 E mai ananafi lava i tatou,+ ma e tatou te lē iloa se mea,
Talu ai ua pei o se ata lafoia o tatou aso i le lalolagi.+
10 Po o le a latou lē aʻoaʻoina ea oe, ma taʻu mai iā te oe,
Ma po o le a latou lē fai mai ea ni upu mai i o latou loto?
11 Pe e tupu maualuga ea le kome+ ae leai se taufusi?
Pe e tupu tele ea le ū ae leai se vai?
12 A o lauolaola pea, e leʻi tauina,
E muamua mago+ i isi vao uma.
13 E faapea ala o i latou uma ua faagaloina le Atua,+
E faaumatia foʻi le faamoemoe o sē ua fulitua i le Atua,+
14 E vavaeeseina lona mautinoa,
O lona faatuatua foʻi o le fale lea o le apogaleveleve.+
15 E faalagolago o ia i lona fale, ae e lē tū pea;
E taofimau e ia i ai, ae e lē tumau.
16 E matuā tupu olaola o ia i le lā,
E tātupu foʻi ona lālā i lona togālaau.+
17 E feuiuiaʻi ona aa i totonu o le faaputuga maa,
E iloa atu foʻi e ia le fale e fai i maa.
18 Afai e faaumatia e se tasi o ia mai i lona nofoaga,+
E faafitia lava e ia, i le faapea atu, ‘Ou te leʻi vaai lava iā te oe.’+
19 Faauta! O le iʻuga lenā o lona ala;+
Ae e tutupu mai isi mai i le eleele.
20 Faauta! E lē teena e le Atua so o se tasi e lē taʻuleagaina,
Pe na te taofia foʻi lima o ē e fai mea leaga,
21 Seʻia faatumuina e ia lou gutu i le ʻataʻata,
Ma ou laugutu i le alaga fiafia.
22 E faaofuina o ē e ita iā te oe i le māsiasi,+
O le a leai foʻi le faleʻie o ē e amioleaga.”
