Iopu 9:1-35
9 Ona tali atu lea o Iopu, ua faapea atu:
2 “O le mea moni ua ou iloa lava e faapea.
Ae pe e mafai faapefea ona tonu se tagata i luma o le Atua?+
3 Pe afai e fiafia o ia e finau ma ia,+
E lē mafai ona ia tali atu iā te ia i se fesili e tasi mai i fesili e afe.
4 E atamai lona finagalo ma e malosi lona mana.+
Po o ai se tasi e faaalia le lotomaaa iā te ia ae e lē afāina ai?+
5 Ua aveesea e ia mauga+ ina ia lē iloa e tagata,
Ua faatoʻilaloina e ia i latou i lona toʻasā.+
6 Ua lūlūina e ia le lalolagi mai i le mea sa iai,
Ina ia gatete ai ona poutū.+
7 Ua fetalai atu o ia i le lā ina ia aua neʻi susulu mai,
Ua punitia foʻi e ia le malamalama o fetu,+
8 Ua ia fofola le lagi e na o ia lava+
Ma savali i luga o galu tetele o le sami;+
9 Ua ia faia foʻi faaputuga fetu o Asa, o faaputuga fetu o Kisila,
O faaputuga fetu o Kima,+ ma potu i totonu o le itu i Saute;
10 Ua ia faia mea tetele e lē masuʻesuʻeina,+
Ma mea ofoofogia e lē mafaitaulia.+
11 Faauta! Ua afio ane o ia i oʻu luma ae ou te leʻi vaaia o ia,
Ua afio atu lava o ia, ae ou te leʻi iloa o ia.+
12 Faauta! Ua faoa e ia. Po o ai ea e mafai ona tetee atu iā te ia?
Po o ai foʻi e fai atu iā te ia, ‘O le ā lau mea ua fai?’+
13 E lē toe liua e le Atua lona toʻasā;+
E ifo atu foʻi iā te ia o fesoasoani a lē e faasauā.+
14 E sili atu ai la pe afai ou te tali atu iā te ia!
Ou te filifilia ma le faaeteete aʻu upu e fai atu iā te ia,+
15 Ae ou te lē tali atu iā te ia, e ui lava e saʻo aʻu.+
Ou te ʻaiʻoi atu i lē o loo i le itu tetee o loʻu faamasinoga ina ia alofa mai.+
16 Pe a ou valaau atu iā te ia, po o le ia tali mai iā te aʻu?+
Ou te lē talitonu o le a ia faafofoga mai i loʻu leo;
17 O lē ua tuʻimomomoina aʻu i le afā
Ma faateleina oʻu manuʻa e aunoa ma se māfuaaga.+
18 Na te lē faatagaina aʻu ou te toe mānava,+
A ua ia faatumuina pea aʻu i mea oona.
19 E ui ina malosi se tasi, ae e sili atu ona malosi le Atua;+
Afai foʻi e iai se faamasino malosi, e mafai ona ia amia aʻu!
20 Afai ou te saʻo, o le a taʻuleagaina aʻu e loʻu lava gutu;
Afai foʻi e lē taʻuleagaina aʻu, o le a ia taʻutino loʻu lē faamaoni.
21 Afai e lē taʻuleagaina aʻu, po ua ou lē iloa aʻu lava;
Ma ou ʻinoʻino i loʻu ola.
22 E tasi lava le mea. O le mea lea ua ou faapea atu ai,
‘Ua faaumatia e ia i laʻua, o lē ua lē taʻuleagaina, atoa foʻi ma lē ua amioleaga.’+
23 Afai e oo faafuaseʻi mai le oti i se tafega malosi,
Ona aamu ai lea o ia i le atuatuvale o tagata e lē sala.
24 Ua tuuina mai le lalolagi i le lima o lē ua amioleaga;+
Ua Ia ufitia foʻi foliga o ona faamasino.
Afai e lē o Ia, o ai ea la?
25 Ua sili atu ona televavave oʻu aso nai lo o se tagata tamoʻe;+
Ua sosola ese i latou, e latou te lē iloa lava se mea lelei.
26 Ua latou ō atu pea e pei o ni vaa e faia i ū,
E pei o se aeto e fetifaaʻi solo mo se mea e ʻaina.+
27 Afai ou te fai atu, ‘Seʻi oʻu faagaloina loʻu popole,+
Seʻi oʻu tuu ese loʻu mata faanoanoa,+ ae faaalia le mata fiafia,’
28 Ua ou fefe i oʻu tigā uma;+
Ou te lē iloaina o le a e lē taʻumamāina aʻu.
29 Ua ou amioleaga.
Aiseā ea ou te tautigā ai fua?+
30 Afai ou te faamamāina aʻu lava i le vai o le kiona,
Ma ou fufuluina oʻu lima i le fasimoli,+
31 Ona e lolō lea o aʻu i le lua,
Ma e ʻinoʻino mai lava oʻu ofu iā te aʻu.
32 Auā e lē o ia o se tagata+ e pei o aʻu ou te tali atu ai iā te ia,
Ina ia o ma ō faatasi ai i le faamasinoga.
33 E leai foʻi se tagata e faamasino i lo ma va,+
E na te tuu mai lona lima iā i maʻua uma.
34 Ia aveese lona tootoo mai i oʻu luga,+
Ia aua foʻi neʻi oʻu fefe i lona mataʻutia.
35 Ia ou tautala atu e aunoa ma le fefe iā te ia,
Auā ou te lē fefe e tautala atu iā te ia.
