Iosua 1:1-18
1 Ina ua mavae le maliu o Mose le auauna a Ieova, ona fetalai mai lea o Ieova iā Iosua+ le atalii o Nuno, o lē na auauna+ iā Mose:
2 “Ua maliu laʻu auauna o Mose;+ o lea ia e tulaʻi ma sopoʻia atu lenei vaitafe o Ioritana, o oe ma lenei nuu uma, i le laueleele ou te foaʻiina atu iā i latou, o le fanauga a Isaraelu.+
3 O mea uma lava e solia e o outou alofivae, ou te foaʻi atu ia iā te outou, e pei lava ona ou folafola atu iā Mose.+
4 E amata atu i le toafa ma Lepanona lenei e oo atu i le vaitafe tele, o le vaitafe o Eufirate, o le laueleele uma o tagata Heti,+ e oo atu foʻi i le Sami Tele e agaʻi i le mea e goto ai le lā, e fai ia ma o outou laueleele.+
5 E leai se tasi e tū mai e tetee iā te oe i aso uma o lou ola.+ E pei ona ou faatasi ma Mose e faapea foʻi ona ou faatasi ma oe.+ Ou te lē tuua oe, ou te lē tuulafoaʻi lava iā te oe.+
6 Ia e lototele ma faamalosi,+ auā e te taʻitaʻiina atu lenei nuu e fai mo latou tofi+ le laueleele na ou tautō ai i o latou augātamā e foaʻi atu iā i latou.+
7 “Tau lava ina ia e lototele ma matuā faamalosi e faia e tusa ma mea uma o i le tulafono na poloaʻi atu ai laʻu auauna o Mose iā te oe.+ Aua neʻi e liliuese ai i le itu taumatau po o le itu tauagavale,+ ma ia e gaoioi ma le poto i mea uma e te faia.+
8 Aua neʻi teʻa ese lenei tusi o le tulafono mai i lou gutu,+ ae ia e faitau lē leoa i ai i le ao ma le pō, ina ia e faia e tusa ma mea uma ua tusia ai;+ ona manuia ai lea o ou ala, ma e gaoioi ai ma le poto.+
9 Po ou te leʻi poloaʻi atu ea iā te oe?+ Ia lototele ma faamalosi. Aua le fefe pe mataʻu,+ auā e faatasi Ieova lou Atua ma oe i mea uma e te alu i ai.”+
10 Ona poloaʻi atu lea o Iosua i alii o le nuu, ua faapea atu:
11 “Ia ō atu i totonu o le togālauapi ma fai atu i le nuu e faapea, ‘Inā sauni ia ni mea mo outou, auā e toe tolu aso ona outou sopoʻia atu lea o le vaitafe o Ioritana ma nonofo i le laueleele ua foaʻi atu e Ieova lo outou Atua e fai mo outou.’”+
12 Ona fai atu lea o Iosua i tagata o Reupena ma tagata Kato ma le ʻafa o le ituaiga o Manase, e faapea:
13 “Ia manatua le upu na poloaʻi atu ai Mose le auauna a Ieova iā te outou,+ e faapea, ‘Ua avatu e Ieova lo outou Atua le mālōlōga ma foaʻi mai foʻi lenei laueleele mo outou.
14 E nonofo a outou avā, o a outou fanau iti, ma a outou lafumanu i le laueleele na avatu e Mose iā te outou i lenei itu o le vaitafe o Ioritana;+ ae e ō atu outou tane i le taua+ i luma o outou uso, o outou tane totoa malolosi+ uma e ao ona fesoasoani atu iā i latou.
15 Pe a avatu e Ieova le mālōlōga i o outou uso e pei ona avatu iā te outou, ma latou nonofo ai foʻi i laueleele ua foaʻiina atu e Ieova lo outou Atua e fai mo latou,+ ona outou toe foʻi mai lea i le laueleele o loo outou nonofo ai lea na avatu e Mose le auauna a Ieova e fai mo outou,+ i le isi itu o le vaitafe o Ioritana i le mea e oso aʻe ai le lā.’”+
16 Ona latou tali mai lea iā Iosua, ua faapea mai: “O mea uma ua e poloaʻi mai ai iā i matou, e matou te faia lava, o mea uma foʻi e te aauina atu i ai i matou, e matou te ō lava.+
17 E pei ona matou faalogo iā Mose i mea uma, e faapea foʻi ona matou faalogo iā te oe. Tau ina ia faatasi Ieova lou Atua ma oe,+ e pei ona faatasi o ia ma Mose.+
18 O se tagata e fouvale i lau faatonuga+ ma lē faalogo i au upu ua e poloaʻi mai ai, e fasiotia o ia.+ Tau ina ia e lototele ma faamalosi.”+
