Iosua 10:1-43
10 Ina ua faalogo Atoni-sateko le tupu o Ierusalema ua faatoʻilaloina e Iosua Ai+ ma faaumatia+ ai, e pei ona ia faia iā Ieriko+ ma lona tupu,+ e pei foʻi ona ia faia iā Ai ma lona tupu,+ ma ua faia e tagata Kipeona se leleiga ma tagata Isaraelu,+ ma ua faatasi pea ma i latou,
2 ona ia matuā fefe+ ai lea, auā o Kipeona o se aai tele, e pei o se aai a se tupu, ma e sili atu lona telē i lo o Ai,+ e malolosi foʻi ona tagata uma.
3 Mulimuli ane, ua alu atu le feʻau a Atoni-sateko le tupu o Ierusalema+ iā Oama le tupu o Heperona,+ ma Pirama le tupu o Iaremuta,+ o Iafia le tupu o Lakisa,+ ma Tiperi le tupu o Ekelona,+ ua faapea atu,
4 “Inā ō mai ia ma fesoasoani mai iā te aʻu, seʻi o tatou fasia Kipeona auā ua ia faia se leleiga ma Iosua ma le fanauga a Isaraelu.”+
5 Ona latou faapotopoto faatasi ai lea ma ō aʻe, o tupu e toʻalima o Amorī,+ o le tupu o Ierusalema, o le tupu o Heperona, o le tupu o Iaremuta, o le tupu o Lakisa, o le tupu o Ekelona, o i latou ma a latou ʻautau uma, ua latou ō atu ma tolauapi i Kipeona ina ia siitaua atu i ai.
6 Ona auina atu lea o le feʻau a tagata o Kipeona iā Iosua i le togālauapi i Kilikala,+ e faapea: “Aua e te tuulafoaʻiina i matou o au pologa.+ Inā sau faavave ia ma faaolaina i matou ma fesoasoani mai, auā ua faapotopoto tupu uma o tagata Amorī i vaega maugā ina ia siitaua mai iā i matou.”
7 Ona alu aʻe lea o Iosua mai i Kilikala, o ia ma tagata o le taua o faatasi ma ia,+ atoa ma tagata totoa malolosi uma.+
8 Ona fetalai mai lea o Ieova iā Iosua: “Aua e te fefe iā i latou,+ auā ua ou tuuina atu i latou i ou lima.+ E leai foʻi se tasi e tū mai e tetee iā te oe.”+
9 Ona faafuaseʻi ai lea ona oo mai o Iosua iā i latou. Na atoa le pō o alu aʻe o ia mai i Kilikala.
10 Ua faafenumiaʻi i latou e Ieova i luma o Isaraelu,+ ona fasiotia lea o i latou e Isaraelu i le fasi tele i Kipeona,+ ma tuliloa pea i le ala e ō aʻe i Peteorana, ma fasiotia i latou e oo atu i Aseka+ ma Maketa.+
11 A o sosola i latou i luma o Isaraelu ma ō ifo i le ala o Peteorana, ona lafo ifo lea e Ieova i o latou luga o maa tetele+ mai i le lagi, e oo atu lava i Aseka ina ia feoti ai i latou. E sili atu ona toʻatele tagata na feoti i uatoʻa, nai lo o ē na fasiotia e le fanauga a Isaraelu i le pelu.
12 Ona fai atu lea o Iosua iā Ieova i le aso na tuuina mai ai e Ieova le fanauga a Amorī i le fanauga a Isaraelu, ma ua ia faapea atu i luma o Isaraelu:
“Le lā e,+ inā tumau ia oe i luga o Kipeona,+
Ma le masina e, inā tumau ia i luga o le vanu o Ailona.”+
13 Ona tumau ai lea o le lā ma le masina seʻia oo ina tauia e le nuu ona fili.+ Pe e lē o tusia ea ia mea i le tusi a Iasera?+ Ona tumau ai lea o le lā i le ogatotonu o le lagi e tusa ma le aso atoa,+ e leʻi vave goto.
14 E leai se aso na muamua pe na mulimuli na pei o lenā aso, na faafofoga ai Ieova i le leo o se tagata,+ auā na tau Ieova mo Isaraelu.+
15 Ua mavae lea mea, ona toe foʻi lea o Iosua ma Isaraelu uma na faatasi ma ia i le togālauapi i Kilikala.+
16 Ae ua sosola+ nei tupu e toʻalima ma lalafi i le ana o Maketa.+
17 Ona oo mai lea o le tala iā Iosua e faapea: “O loo lalafi tupu e toʻalima i le ana o Maketa.”+
18 Ona faapea atu lea o Iosua: “Inā fuli atu ia ni maa tetele i le gutu o le ana, ma tofia ni tamāloloa e leoleoina i latou.
19 A o outou, aua tou te nofoaʻi. Ia tuliloa i o outou fili ma ia fasiotia i latou o i tua.+ Aua neʻi tuua i latou e ō atu i o latou aai, auā ua tuuina mai i latou e Ieova lo outou Atua i o outou lima.”+
20 Ina ua uma ona fasiotia o i latou e Iosua ma le fanauga a Isaraelu i le fasi tele, seʻia uma i latou,+ a o i latou na sao, na sosola ma ulu atu i aai malolosi,+
21 ona toe foʻi atu lea ma le filemu o tagata uma i le togālauapi iā Iosua i Maketa. E leai se tasi na mafai ona fai atu se upuleaga i le fanauga a Isaraelu.+
22 Ona faapea atu lea o Iosua: “Ia outou tatala le gutu o le ana ma aumai i fafo iā te aʻu nei tupu e toʻalima.”
23 Ona latou faia lea faapea, ma aumai iā te ia mai i le ana o nei tupu e toʻalima, o le tupu o Ierusalema,+ o le tupu o Heperona,+ o le tupu o Iaremuta, o le tupu o Lakisa,+ ma le tupu o Ekelona.+
24 Ina ua latou aumaia i fafo nei tupu iā Iosua, ona valaau lea o Iosua i tamāloloa o Isaraelu ma fai atu i taʻitaʻiʻau o tagata o le taua na ō ma ia: “Inā ō mai ia i luma. Ia tutū o outou vae i tua o ua o nei tupu.”+ Ona latou ō mai ai lea i luma ma tutū o latou vae i tua o o latou ua.+
25 Ona fai atu lea o Iosua iā i latou: “Aua le fefefe pe matataʻu.+ Ia lototetele ma faamalolosi, auā e faapenei ona faia e Ieova i o outou fili uma, o ē o loo siitaua mai iā te outou.”+
26 Ua mavae lenei mea, ona fasiotia lea o i latou e Iosua ma faatautau i luga o laau e lima, ma na tautau ai pea i luga o laau seʻia oo i le afiafi.+
27 Ina o le a goto le lā, ona poloaʻi atu lea o Iosua, ona latou ave ifo lea o i latou mai i luga o laau+ ma lafo i le ana lea na latou lalafi ai. Ona latou tuu lea o maa tetele i le gutu o le ana, e oo mai lava i aso nei.
28 Ua faatoʻilaloina e Iosua Maketa+ i lenā lava aso ma fasiotia i le pelu. Ae faaumatia+ lona tupu ma i latou uma na iai. E leai se tasi na sao mai ai. Na ia faia faapea i le tupu o Maketa,+ e pei lava ona ia faia i le tupu o Ieriko.
29 Ona ō atu lea o Iosua ma Isaraelu uma o faatasi ma ia mai i Maketa i Lipena, ma siitaua atu i Lipena.+
30 Na tuuina atu foʻi e Ieova le aai ma lona tupu i lima o Isaraelu, ma na latou fasiotia i latou uma na iai i le pelu. E leai se tasi na sao mai ai. Na latou faia faapea i lona tupu, e pei lava ona latou faia i le tupu o Ieriko.+
31 Ona ō atu foʻi lea o Iosua ma Isaraelu uma o faatasi ma ia mai i Lipena i Lakisa,+ ma tolauapi i ai ma siitaua atu foʻi i ai.
32 Na tuuina atu e Ieova Lakisa i lima o Isaraelu, ona latou faatoʻilalo ai lea o le aai i le aso lona lua, ma fasiotia i latou uma na iai i le pelu,+ e pei lava o mea uma na latou faia i Lipena.
33 Ona alu atu ai lea o Orama le tupu o Kasera+ e fesoasoani i le aai o Lakisa. Ua fasiotia ai o ia ma ona tagata e Iosua, seʻia leai se tasi na sao mai ai.+
34 Ua ō atu Iosua ma Isaraelu uma o faatasi ma ia mai i Lakisa i Ekelona,+ ua tolauapi i ai ma siitaua atu foʻi i ai.
35 Ua latou faatoʻilaloina le aai i lenā aso ma fasiotia i le pelu, ma latou faaumatia tagata uma sa iai i lenā aso, e pei lava o mea uma na latou faia i Lakisa.+
36 Ona ō atu lea o Iosua ma Isaraelu uma o faatasi ma ia mai i Ekelona i Heperona,+ ma siitaua atu i ai.
37 Ua latou faatoʻilaloina le aai ma fasiotia i le pelu tagata ma lona tupu, o ona nuu uma ma tagata uma na iai. E na te leʻi faasaoina foʻi se tasi, e pei o mea uma na ia faia i Ekelona. Na ia faaumatia le aai ma tagata uma sa iai.+
38 Mulimuli ane, ua toe foʻi mai Iosua ma Isaraelu uma o faatasi ma ia i Tiperi,+ ma siitaua i ai.
39 Ua ia faatoʻilaloina le aai ma ona nuu uma ma puʻea lona tupu, ona latou fasiotia lea o i latou i le pelu ma latou faaumatia tagata uma sa iai.+ E na te leʻi faasaoina foʻi se tasi.+ E pei ona ia faia i Heperona, e faapea foʻi ona ia faia i Tiperi ma lona tupu, e faapea foʻi ona ia faia i Lipena ma lona tupu.+
40 Ua fasia foʻi e Iosua le nuu atoa o vaega maugā,+ o le vaipanoa o Nekepi+ ma Sefila,+ o malifa+ ma o latou tupu uma. E na te leʻi faasaoina foʻi se tasi, ae na ia faaumatia+ mea uma e mānava,+ e pei lava ona poloaʻi+ mai ai Ieova le Atua o Isaraelu.
41 Ona fasiotia foʻi lea e Iosua o i latou mai i Katesapanea+ e oo atu i Kasa,+ ma le nuu uma o Kosena+ e oo atu i Kipeona.+
42 Ua puʻea foʻi e Iosua o nei tupu uma ma o latou nuu i le taimi e tasi,+ auā sa tau Ieova le Atua o Isaraelu mo Isaraelu.+
43 Mulimuli ane, ona toe foʻi atu lea o Iosua ma Isaraelu uma o faatasi ma ia i le togālauapi i Kilikala.+
