Iosua 17:1-18
17 Ua maua e le ituaiga o Manase+ lo latou tofi,+ auā o ia o le ulumatua+ a Iosefa, o Makiro+ foʻi o le ulumatua a Manase le tamā o Kiliata,+ ua maua e ia o Kiliata+ ma Vasana, auā o ia o le tagata tau.+
2 Ua maua foʻi le tofi o le fanauga a Manase, o ē ua totoe e tusa ma o latou aiga, e mo le fanauga a Apieseru,+ o le fanauga a Eleka,+ o le fanauga a Aserieli, o le fanauga a Sekema,+ o le fanauga a Eferu, ma le fanauga a Semita.+ O fanauga ia a Manase le atalii o Iosefa, o tane e tusa ma o latou aiga.
3 A o Selofeata+ le atalii o Eferu, le atalii o Kiliata, le atalii o Makiro, le atalii o Manase, e leai ni ona atalii ae e na o ona afafine, ma o igoa nei o ona afafine: o Maala, o Noa, o Hakelu, o Meleka ma Tiresa.+
4 Ona latou ō mai lea i luma o Eleasaro+ le ositaulaga, o Iosua le atalii o Nuno ma ē e taʻitaʻi, ua faapea mai: “Ua poloaʻi mai Ieova iā Mose e aumai iā i matou se tofi faatasi ma o matou tuagane.”+ Ona ia avatu lea iā i latou o le tofi e tusa ma le faatonuga a Ieova, faatasi ma uso o lo latou tamā.+
5 E sefulu tofi na maua e Manase e ese mai i le laueleele o Kiliata ma Vasana, ia sa i le isi itu o Ioritana;+
6 ua maua e afafine o Manase le tofi faatasi ma ona atalii; ua maua foʻi le laueleele o Kiliata e atalii o Manase ua totoe.
7 O le tuaoi o Manase e mai i Asera e oo i Mekemeta+ lea e i luma o Sekema,+ ona oo atu lea o le tuaoi i le itu taumatau i tagata o loo nonofo i Enetapua.
8 Ua maua e Manase le laueleele o Tapua,+ ae ua maua e le fanauga a Efaraima o Tapua, i le tuaoi o Manase.
9 Ua alu ifo le tuaoi i le ālia o Kana, e agaʻi i le itu i saute i le ālia o aai+ o Efaraima i totonu o aai o Manase, o le tuaoi o Manase sa i le itu i mātū o le ālia, ma ua gata mai i le sami.+
10 E maua e Efaraima le itu i saute, a o Manase le itu i mātū, ma e tuaoi i le sami;+ a o le tuaoi i mātū e oo atu i Asera, ma le itu i sasaʻe e oo iā Isakara.
11 Ua maua e Manase+ i Isakara ma i Asera o Peteseana+ ma ona tamaʻi aai, o Ipelamo+ ma ona tamaʻi aai, o ē o loo nonofo i Toro+ ma ona tamaʻi aai, o ē o loo nonofo i Enetoro+ ma ona tamaʻi aai, o ē o loo nonofo i Tanaka+ ma ona tamaʻi aai, ma ē o loo nonofo i Mekito+ ma ona tamaʻi aai, o nuu maualuluga e tolu.
12 E leʻi mafai e le fanauga a Manase ona fai mo i latou nei aai,+ ae ua faaauau ona nonofo ai tagata Kanana i lenei nuu.+
13 Ua oo ina malolosi+ le fanauga a Isaraelu, ma ua latou faatigāina i tagata Kanana i galuega mamafa,+ ae latou te leʻi tuliesea uma i latou.+
14 Ua faapea mai le fanauga a Iosefa iā Iosua: “Aiseā ua e tuuina mai ai iā te aʻu le tofi e tasi,+ ma le vaega e tasi o le laueleele e fai ma oʻu tofi, ae o aʻu o le nuu e matuā toʻatele, auā ua faamanuia aʻu e Ieova seʻia oo mai i le aso nei?”+
15 Ona fai atu lea o Iosua iā i latou: “Afai o oe o le nuu ua matuā toʻatele, inā alu ia i le vaomatua, ma ia e tāina i lalo mo oe le laueleele o tagata Perisē+ ma Rafaimi,+ auā ua laʻitiiti tele le vaega maugā+ o Efaraima mo oe.”
16 Ona fai mai lea o le fanauga a Iosefa: “E lē lava ia vaega maugā mo i matou, ma o tagata Kanana uma o loo nonofo ai i fanua laugatasi, e tofu ma kariota o le taua+ e iai uʻamea maamaʻai, o i latou o loo nonofo i Peteseana+ ma ona tamaʻi aai, ma i latou o loo nonofo i fanua laugatasi o Isereelu.”+
17 Ona fai atu lea o Iosua i le fanauga a Iosefa, o Efaraima ma Manase: “O oe o le nuu ua matuā toʻatele, ma ua tele foʻi lou malosi.+ E lē lava le tofi e tasi mo oe,+
18 ae ia fai mo oe le vaega maugā.+ Auā o le vaomatua lenā, ia e tāina i lalo ma o i inā e gata mai ai lou tuaoi. Ia e tuliesea tagata Kanana, e ui e iai a latou kariota o le taua e iai uʻamea maamaʻai, ma e malolosi foʻi i latou.”+
