Iosua 4:1-24
4 Ina ua uma ona sopoʻia e le nuu atoa le vai o Ioritana,+ ona fetalai mai lea o Ieova iā Iosua:
2 “Inā ave ia ni tamāloloa se toʻasefulu lua mai i le nuu, e toʻatasi mai i le ituaiga,+
3 ma poloaʻi atu iā i latou e faapea, ‘Ia outou ave ni maa se sefulu lua+ mai i le ogatotonu o Ioritana, mai i le mea na tutū lē gaoioi+ ai vae o ositaulaga, ia outou avatu nei maa ma tuu i le mea o le a outou api+ ai i le pō a nanei.’”
4 Ua valaau atu Iosua i tamāloloa e toʻasefulu lua+ na ia tofia mai i le fanauga a Isaraelu, e taʻitasi mai i le ituaiga;
5 ona fai atu lea o Iosua iā i latou: “Ia muamua atu i le atolaau a Ieova lo outou Atua, ma ia ō atu i le ogatotonu o Ioritana, ona taʻitasi lea o outou ma sii aʻe i luga lana maa i lona tauʻau, e tusa ma le aofaʻi o ituaiga o le fanauga a Isaraelu,
6 ina ia fai ai lenei mea ma faailoga iā te outou.+ Pe a fesili mai foʻi a outou fanau i se taimi o i luma e faapea, ‘Aiseā ua outou tuu ai i inei nei maa?’+
7 Ia outou faapea atu iā i latou, ‘Auā na vaeluaina le vai o Ioritana i luma o le atolaau o le feagaiga a Ieova.+ Ina ua sopoʻia atu e le Atolaau le vai o Ioritana, ona vaeluaina ai lea o le vai, ma e fai pea nei maa ma faamanatuga i le fanauga a Isaraelu i taimi uma.’”+
8 Ua faapea foʻi ona faia e le fanauga a Isaraelu e pei ona poloaʻi atu ai Iosua, na latou ave maa e sefulu lua mai i le ogatotonu o le vai o Ioritana, e pei ona fetalai mai ai Ieova iā Iosua, e tusa ma le aofaʻi o ituaiga o le fanauga a Isaraelu;+ na latou ave foʻi na maa ma tuu i le mea na latou api ai.+
9 Na ati foʻi e Iosua maa e sefulu lua i le ogatotonu o Ioritana, i le mea na tutū+ ai vae o ositaulaga na aveina le atolaau o le feagaiga, ma o loo iai pea i inā e oo mai i aso nei.
10 Na tutū foʻi i le ogatotonu+ o le vaitafe o Ioritana ositaulaga na aveina le Atolaau, seʻia oo ina māeʻa mea uma na fetalai mai ai Ieova iā Iosua e taʻu atu i le nuu, e tusa ma mea uma na poloaʻi atu ai Mose iā Iosua.+ Ona ō atu faavave+ lea o le nuu ma latou sopoʻia atu.
11 Ina ua uma ona sopoʻia e le nuu atoa le vaitafe, ona muamua atu lea o ositaulaga ma le atolaau+ a Ieova i luma o le nuu.
12 Na sopoʻia foʻi e le fanauga a Reupena, o le fanauga a Kato, ma le ʻafa o le ituaiga o Manase+ e pei o se ʻautau+ i luma o le fanauga a Isaraelu, e pei ona taʻu atu e Mose iā i latou.+
13 E tusa ma le fā sefulu afe tagata faaauupegaina na ō atu i luma o Ieova i le taua e agaʻi i fanua laugatasi o Ieriko.
14 O le aso lava lea na faamamaluina ai e Ieova Iosua i luma o Isaraelu uma,+ ma amata ai ona latou matataʻu iā te ia e pei lava ona latou matataʻu iā Mose i aso uma o lona ola.+
15 Ona fetalai mai lea o Ieova iā Iosua:
16 “Ia e fai atu i ositaulaga o ē e aveina le atolaau o le feagaiga,*+ ina ia latou ō aʻe mai i le vaitafe o Ioritana.”
17 Ona poloaʻi atu lea o Iosua i ositaulaga e faapea: “Inā ō aʻe ia mai i le vaitafe o Ioritana.”
18 Ina ua ō aʻe mai i le ogatotonu o le vaitafe o Ioritana ositaulaga na aveina le atolaau+ o le feagaiga a Ieova, ma ua tutū o latou alofivae+ i le eleele mātūtū, ona toe tafe mai lea o le vai o Ioritana ma ua lofia+ ai ona auvai e pei ona iai muamua.
19 Ona ō aʻe ai lea o tagata mai i Ioritana i le aso sefulu o le masina muamua, ma tolauapi i Kilikala+ i le itu i sasaʻe o le tuaoi o Ieriko.
20 Na faatūina foʻi e Iosua i Kilikala+ o maa e sefulu lua na latou ave aʻe mai i le vaitafe o Ioritana.
21 Ua ia faapea atu foʻi i le fanauga a Isaraelu: “Pe a fesili atu a outou fanau i o latou tamā i se aso o i luma, ‘O le ā le uiga o nei maa?’+
22 ia outou faailoa atu i a outou fanau, e faapea: ‘Na sopoʻia e Isaraelu le ilitivai mātūtū o lenei vaitafe o Ioritana,+
23 ina ua faapaʻumātūina e Ieova lo outou Atua vai o Ioritana i o latou luma, seʻia o latou sopoʻia atu e pei lava ona faia e Ieova lo outou Atua i le Sami Ulaula, ina ua ia faapaʻumātūina i o tatou luma seʻia oo ina tatou sopo atu i le isi itu;+
24 ina ia iloa ai e nuu uma o le lalolagi e malosi+ le aao o Ieova;+ ma ia outou matataʻu ai pea iā Ieova lo outou Atua.’”+
Faamatalaga Pito i Lalo
^ Po o le “molimau.”
