Iosua 7:1-26
7 Ua faia e le fanauga a Isaraelu le agasala ona ua lē faamaoni e tusa ai ma mea e tatau ona faaumatia. Ina ua ave e Akana+ le atalii o Karame, o le atalii lea o Sapati, o le atalii o Sera, o le ituaiga o Iuta, nisi o mea e tatau ona faaumatia.+ O le mea lea na matuā toʻasā ai Ieova i le fanauga a Isaraelu.+
2 Ona aauina atu lea e Iosua o ni tamāloloa mai i Ieriko e ō i Ai,+ lea e lata ane i Petavene+ i le itu i sasaʻe o Peteli,+ ma faapea atu: “Inā ō atu faalilolilo ia e mataʻi le nuu.” Ona ō faalilolilo ai lea o tamāloloa e mataʻi le nuu o Ai.+
3 Ua mavae lenei mea, ona latou toe foʻi mai lea iā Iosua ma faapea mai: “Aua neʻi ō aʻe uma le nuu. Ia ō aʻe tau o se lua pe tolu afe tagata e fasiotia tagata o Ai. Aua le faatigāina le nuu i le ō atu uma i inā, auā e toʻaitiiti i latou.”
4 Ona ō atu ai lea i inā o tagata o le nuu pe tusa ma le toʻatolu afe, ae ua latou sosola ese ai luma o tagata o Ai.+
5 Ona fasiotia lea e tagata o Ai o le toʻatolu sefulu ono o i latou, ma tuliloa+ iā i latou e amata mai i le faitotoʻa o le aai e faaifo atu i Separema, ma faaauau pea ona fasia i latou i le ala. Ona vaivai ai lea o loto o le nuu e pei ua liusuavai.+
6 Ona saeia lea e Iosua o lona ofu, ma faapaʻū faō+ i le eleele i luma o le atolaau a Ieova seʻia oo i le afiafipō, o ia ma toeaina o Isaraelu, ma ua latou asu aʻe pea efuefu i luga o o latou ulu.+
7 Ona faapea atu lea o Iosua: “Auē, le Alii Pule Silisili Ese Ieova e, aiseā na e aumaia ai lenei nuu e sopoʻia mai le la itu o le vaitafe o Ioritana, ina ia tuuina atu i matou i lima o tagata Amorī e faaumatia ai i matou? E lelei pe ana matou nonofo ai pea i le isi itu o Ioritana!+
8 Ieova e, faamolemole, o le ā laʻu tala o le a fai atu ina ua liliu ma sosola ese Isaraelu mai i luma o ona fili?
9 Pe a faalogo i ai tagata Kanana ma ē uma o loo nonofo i le nuu i lenei mea, ona latou siʻomia lea o i matou ma soloia lo matou igoa mai i le lalolagi;+ ae o le a faapefea lou suafa silisili?”+
10 Ona fetalai mai lea o Ieova iā Iosua: “Inā e tulaʻi ia! Aiseā ua e faō ai faapena?
11 Ua agasala Isaraelu ma ua latou solia foʻi laʻu feagaiga+ na ou poloaʻi atu ai iā i latou ina ia tausia; ua latou ave nisi o mea e tatau ona faaumatia,+ ua latou gaoia+ ma ua nanā+ foʻi ma tuufaatasi ma a latou oloa.+
12 Ua lē mafai ai ona tutū atu le fanauga a Isaraelu i o latou fili.+ Ua latou liliu ma sosola ese mai i luma o o latou fili, auā ua tatau ona faaumatia i latou. Ou te lē toe faatasi atu iā te outou, seʻi vaganā ua faaumatia lē e tatau ona faaumatia o loo iā te outou.+
13 Inā tulaʻi ia! Ia faapaia le nuu+ ma ia e faapea atu, ‘Ia faapaiaina outou a taeao, auā o le mea lea ua fetalai mai ai Ieova le Atua o Isaraelu: “Isaraelu e, o loo iā te outou lē e tatau ona faaumatia.+ E lē mafai lava ona outou tutū atu i o outou fili, seʻia outou aveesea lē e tatau ona faaumatia o loo iā te outou.
14 Ia outou faapotopoto mai i le taeao e tusa ai ma ituaiga, ma o le ituaiga e maua+ e Ieova ia faalatalata mai, o le puiaiga e maua e Ieova ia faalatalata mai, o le aiga foʻi e maua e Ieova ia faalatalata mai, o le tagata e maua e Ieova ia faalatalata mai foʻi.
15 O lē e maua e Ieova o iai le mea e tatau ona faaumatia, e susunuina i le afi,+ o ia ma tagata uma o loo faatasi ma ia, auā ua ia solia le feagaiga+ a Ieova ma ua ia faia le mea e matuā leaga i Isaraelu.”’”+
16 Ona tulaʻi lea o Iosua i le taeaopō ua faapotopoto ane foʻi Isaraelu i ituaiga, ma ua maua ai le ituaiga o Iuta.
17 Ona ia faalatalata mai lea o puiaiga o Iuta ma maua ai le puiaiga o Sera,+ ona faalatalata mai foʻi lea o le puiaiga o Sera, o tagata taʻitasi, ma maua ai le tagata o Sapati.
18 Mulimuli ane, ona faalatalata mai lea o lona aiga, o tagata taʻitasi, ma na maua ai Akana le atalii o Karame, o le atalii o Sapati, o le atalii ia o Sera, o le ituaiga o Iuta.+
19 Ona fai atu lea o Iosua iā Akana: “Loʻu atalii e, seʻi e faamamaluina Ieova le Atua o Isaraelu+ ma taʻutino atu iā te ia,+ seʻi e taʻu mai iā te aʻu+ faamolemole, O le ā le mea na e faia? Aua neʻi e natia+ lea mea mai iā te aʻu.”
20 Ona tali mai lea o Akana iā Iosua, ua faapea mai: “E moni ua ou agasala iā Ieova le Atua o Isaraelu,+ ma na faapenei ma faapena ona ou faia.
21 Ina ua ou vaaia+ i le vete se ofu matagofie taugatā mai i Senara,+ ma tupe siliva e lua selau sekeli, ma le auro e lima sefulu sekeli lona mamafa, ona ou manaʻo lea i ai+ ma ou aveina;+ faauta! o loo natia i le eleele i totonu o loʻu faleʻie o loo pito i lalo le tupe.”+
22 Ona aauina atu lea e Iosua o ni avefeʻau, ua latou taufetuli atu foʻi i le faleʻie, ma faauta! sa natia i lona faleʻie faatasi ma tupe o loo pito i lalo.
23 Ona latou aumaia lea o na mea ma avatu iā Iosua ma le fanauga uma a Isaraelu, ona latou sasaa atu lea o na mea i luma o Ieova.
24 Ona ave lea e Iosua ma le fanauga uma a Isaraelu o Akana+ le atalii o Sera, o tupe siliva, o le ofu taugatā, o le auro,+ o ona atalii, o ona afafine, o lana povi poʻa, o lana asini, o lana lafu, o lona faleʻie, ma mea uma ua iā te ia, ua latou aumaia uma i le vanu o Akori.+
25 Ona fai atu lea o Iosua: “Aiseā ua e aumaia ai mala iā i matou?+ O le aso nei e faaoo atu ai e Ieova mala iā te oe.” Ona fetogi ai lea e Isaraelu uma o ia i maa,+ ma latou susunu iā te i latou i le afi.+ O lea, na latou fetogia ai i latou i maa.
26 Ua latou faaputu foʻi i luga o ia se faaputuga maa telē, o loo iai pea e oo mai i aso nei.+ Ona liliuese ai lea o le toʻasā tele+ o Ieova. O le mea lenā ua faaigoa ai lea nofoaga o le Vanu o Akori,*+ e oo mai i aso nei.
Faamatalaga Pito i Lalo
^ O lona uiga, o le “malaia.”
