Iosua 9:1-27
9 Ina ua faalogo i lenei mea o tupu+ uma sa i le itu mai o Ioritana i vaega maugā, ma Sefila, faapea ma le talafatai atoa o le Sami Tele,+ e feagai ma Lepanona+ o le nuu o tagata Heti,+ o tagata Amorī, o tagata Kanana,+ o tagata Perise,+ o tagata Hivī, ma tagata Iepusē,+
2 ona latou faapotopoto uma ai lea ma le lotogatasi e sii atu le taua iā Iosua ma Isaraelu.+
3 Ua faalogo tagata o Kipeona+ i le mea na faia e Iosua iā Ieriko+ ma Ai.+
4 Ona latou gaoioi lea ma le utaga mamao+ e tusa ma o latou manatu, ua ō atu ma ave a latou meaʻai, o taga tuai ua masaesae mo a latou asini, ma latou noanoa fagupaʻu uaina ua pāpā,+
5 ma ua latou see i seevae masaesae ua fonofono, ma ofu o latou ofu tuai, o falaoa uma foʻi mo a latou meaʻai ua magumagu ma ua nuti.
6 Ona latou ō atu lea iā Iosua i le togālauapi o le ʻautau i Kilikala,+ ma faapea atu iā te ia ma tamāloloa o Isaraelu: “Ua matou ō mai i se nuu mamao lava. O lea ia outou osia se feagaiga+ ma i matou nei.”
7 Ona fai mai lea o tamāloloa o Isaraelu i tagata Hivī:+ “Atonu o loo outou nonofo latalata mai lava iā i matou. E faapefea ona matou osia se feagaiga ma outou?”+
8 Ona latou tali atu lea iā Iosua: “O matou o au auauna.”+
Ona fai mai lea o Iosua iā i latou: “O ai ea outou, ma o fea foʻi tou te ō mai ai?”
9 Ona latou faapea atu lea iā Iosua: “E mamao lava le nuu+ e ō mai ai au auauna, ona o le suafa+ o Ieova lou Atua, auā ua matou faalogo i lona taʻutaʻua ma mea uma na ia faia i Aikupito,+
10 ma mea uma na ia faia i tupu e toʻalua o tagata Amorī o ē sa i le isi itu o Ioritana, o Sekono+ le tupu o Hesepona, ma Oko+ le tupu o Vasana, o lē sa i Aserota.+
11 O le mea lenei ua fai mai ai o matou toeaina, ma tagata uma o lo matou nuu iā i matou,+ ‘Ia outou ave ni meaʻai i o outou lima mo le malaga ma ō atu e faafeiloaʻi i latou, ma ia outou fai atu iā i latou: “O i matou o a outou auauna.+ O lea ia outou osia se feagaiga ma i matou.”’+
12 O a matou falaoa nei, sa vevela foʻi ina ua matou aumaia mai o matou fale i le aso na matou ō mai ai i inei iā te outou, ae faauta! ua magumagu ma ua nuti.+
13 O fagupaʻu uaina foʻi nei na matou faatutumuina a o fou, ae faauta! ua pāpā,+ ua masaesae foʻi o matou ofu ma o matou seevae ona o le mamao o le mea matou te ō mai ai.”
14 Ona ave lea e tamāloloa nisi o a latou meaʻai, ma e latou te leʻi fesili+ atu foʻi iā Ieova.
15 Na faia e Iosua se leleiga ma i latou,+ ma osia se feagaiga ina ia ola i latou, ona tautō ai lea o taʻitaʻi+ o le faapotopotoga iā i latou.+
16 Ae ina ua mavae aso e tolu talu ona osia o le feagaiga ma i latou, ona latou faalogo ai lea o loo felataʻi lava ma i latou, ma e nonofo latalata ane foʻi iā i latou.
17 Ona ō atu ai lea o le fanauga a Isaraelu ma oo atu i o latou aai i le aso lona tolu, o o latou aai o Kipeona,+ o Kafira,+ o Perota,+ ma Kiriata-iarima.+
18 E leʻi fasiotia foʻi i latou e le fanauga a Isaraelu, auā na tautō+ alii sili o le faapotopotoga iā i latou iā Ieova le Atua o Isaraelu.+ Ona muimui ai lea o le faapotopotoga i taʻitaʻi.+
19 Ona fai atu lea o taʻitaʻi uma i le faapotopotoga: “O i matou, ua matou tautō atu iā i latou iā Ieova le Atua o Isaraelu, o le mea lea e lē mafai ai ona matou fasia i latou.+
20 O le mea lenei o le a tatou faia iā i latou a o faaola pea i latou, ina neʻi oo mai iā i tatou le toʻasā ona o le tautoga na tatou tautō ai iā i latou.”+
21 Ona fai atu lea o taʻitaʻi: “Ia ola pea i latou ma ia avea ma ē e fai fafie ma asu vai mo le faapotopotoga+ uma, e pei ona folafola atu e taʻitaʻi iā i latou.”+
22 Ona valaau atu lea o Iosua iā i latou ma faapea atu: “Aiseā ua outou ʻolegia ai i matou, i le faapea mai, ‘E mamao lava le mea e matou te ō mai ai,’+ ae o loo outou nonofo latalata mai lava?+
23 O lenei, o tagata ua faamalaiaina+ outou, e lē toe teʻa ese outou+ mai i le avea ma pologa,+ ma ē e fai fafie, ma asu vai mo le fale o loʻu Atua.”
24 Ona latou tali mai lea iā Iosua ma faapea mai: “Auā na faailoa manino mai i au auauna, na poloaʻi Ieova lo outou Atua i lana auauna o Mose e avatu iā te outou le nuu uma, ma ia faaumatia ē uma i le nuu o loo i o outou luma.+ O le mea lea ua matou matuā fefefe ai ona o outou ina neʻi o matou oti.+ Ua matou faia ai loa lenei mea.+
25 O i matou nei ua i ou lima, o le mea e lelei ma tonu iā te oe e faia iā i matou, ia faia faapea.”+
26 Ona ia faia lea faapea iā i latou, ma laveaʻi i latou mai i lima o le fanauga a Isaraelu, e leʻi fasiotia foʻi i latou.+
27 Ona faia+ lea e Iosua o i latou i lenā aso ma ē e fai fafie, ma ē e asu vai mo le faapotopotoga+ ma le fata faitaulaga a Ieova, e oo mai i aso nei i le mea e filifilia e ia.+
