Isaia 13:1-22
13 O le feʻau faasaga iā Papelonia+ lea na vaaia e Isaia le atalii o Amota+ i se faaaliga:
2 “Inā outou faatū ia se faailoilo i luga o mauga e leai ni laau.+ Ia leotetele atu iā i latou, ia talotalo atu le lima+ ina ia latou ō mai ai i faitotoʻa o tamālii.+
3 O aʻu lava, ua ou tuuina atu le poloaʻiga i ē ua ou filifilia.*+ Ua ou valaauina oʻu tagata totoa ina ia faatinoina loʻu ita,+ o oʻu tagata o ē ua matuā olioli.
4 Inā faalogo ia! Ua iai le motu o tagata e toʻatele i le mauga e pei o se nuu e toʻatele lava! Inā faalogo ia!+ Ua iai le pisapisaō o malo, o atunuu ua aoaoina faatasi!+ O loo faapotopotoina e Ieova o ʻau ʻautau o le taua.+
5 O loo ō mai i latou mai i se nuu mamao,+ mai i le taufaasiʻusiʻuga o le lagi, o Ieova ma auupega o lana faasalaga, ina ia faaumatia le lalolagi uma.+
6 “Inā tagiauē ia outou,+ auā ua latalata mai le aso o Ieova!+ E oo mai e pei o se malaia mai i Lē e ona le malosi uma lava.+
7 O le mea lea o le a paʻuʻū ai lima uma, ma e liusuavai ai lotoatoa o tagata.+
8 Ua atuatuvale tagata.+ Ua oo iā i latou le tafitivale ma le tigā o le a fanau; e pei o le fafine o le a fanau ua faapena foʻi o latou tigā.+ Ua fevaaiaʻi i latou ma le fememeaʻi. Ua mūmū foʻi o latou foliga.+
9 “Faauta! O loo sau le aso o Ieova, e ogaoga i le maʻemaʻeā ma le toʻasā tele, ina ia avea le laueleele ma mea e ofo ai,+ ma ia faaumatia tagata agasala o loo iai.+
10 Auā o le a lē pupula mai le malamalama o fetu ma faaputuga fetu o Kisila;+ e pogisa le lā pe a oso aʻe, ma e lē susulu foʻi le malamalama o le masina.
11 O le a ou taui atu le leaga i le laueleele ua fua tele mai,+ ma tagata amioleaga ona o a latou mea sesē. O le a ou faamutaina le mimita o ē e faamaualuluga, ma ou lafotuina le faasausili o ē e pule sauā.+
12 O le a ou faia ia sili ona toʻaitiiti tagata nai lo o le auro lelei,+ ma e sili ona toʻaitiiti tagata nai lo o auro o Ofeira.+
13 O le mea lea o le a ou faaatuatuvaleina ai le lagi,+ ma e lūlūeseina le lalolagi ona o le maʻemaʻeā o Ieova o ʻau+ i le aso o lona toʻasā tele.+
14 E pei o le sevi* ua tuliesea ma e pei o le lafu e leai se tasi e aoaoina faatasi,+ e latou te liliu atu, e taʻitasi i ona lava tagata; ma e latou te sosola, e taʻitasi i lona lava atunuu.+
15 O le a tuia i latou uma e maua, e fasiotia foʻi i le pelu o i latou uma e puʻea;+
16 ma e nutipalaina a latou fanau i o latou luma.+ O le a faoa a latou meafale ma e toso faamalosi foʻi a latou lava avā.+
17 “Ou te faaosoina Metai e faasagatau iā i latou,+ latou te lē manatu i siliva, e latou te lē fiafia foʻi i auro.
18 E nutipalaina foʻi talavou i a latou ʻaufana.+ E latou te lē tigā alofa i fanau;+ e latou te lē alolofa foʻi i atalii.
19 O Papelonia foʻi, ua sili lona matagofie i isi malo,+ o le aai matagofie e mitamita ai Kaletaia,+ o le a iʻu ina pei o Sotoma ma Komoro ina ua faaumatia e le Atua.+
20 O le a lē toe ʻainā lenā aai,+ pe tumau ai i lea tupulaga ma lea tupulaga.+ O le a lē faatūina ai e se Arapi lona faleʻie i inā, e lē avatua ai foʻi e se leoleo mamoe lana lafu e taooto ai i lea mea.
21 O le a taooto ai i lea mea manu mai i laufanua e leai ni vai, ma o fale sa nonofo ai tagata o le a tumu i lulu.+ E nonofo foʻi i lea mea o iaena,* ma e osooso solo ai temoni* i inā.+
22 E uiō taʻifau ʻaivao i maota+ o Papelonia, ma o le a iai gata tetele i maota sa fiafia i ai tagata. Ua lata mai ona vaitaimi, e lē tolopōina foʻi ona aso.”+
Faamatalaga Pito i Lalo
^ O lona uiga ua faapaiaina po ua vavaeese mo le taua a Ieova.
^ O le manu o le ʻaila e saosaoa.
^ O se manu e umī lona ua, e iai ona apaau ae e lē lele. O le upu Peretania o le ostrich.
^ I le gagana Eperu, “O temoni e foliga e pei o ni ʻoti.” Atonu na manatu i latou na tapuaʻi i ai o ni meaola taufulufulua ma na foliga e pei o ni ʻoti poʻa.
